ដោយ ប្រាជ្ញ ចេវ
2015-08-30 rfa
2015-08-30 rfa
 |
| ពលរដ្ឋមានជម្លោះដីធ្លីលើកបដាតវ៉ាមិនឲ្យទទួលយកជនភៀសខ្លួនពីប្រទេសអូស្ត្រាលី នៅព្រឹកថ្ងៃទី១៧ ខែតុលា ឆ្នាំ២០១៤។
RFA/Rann Samnang
|
មន្ត្រីសង្គមស៊ីវិល និងអ្នកនាំពាក្យបក្សប្រឆាំង ស្វាគមន៍ជំហររបស់រដ្ឋាភិបាលដែលគ្មានគម្រោងទទួលយកជនភៀសខ្លួនបន្ថែមពីកោះណាវរូ (Naurau) ដែលសុំសិទ្ធិជ្រកកោននៅប្រទេសអូស្ត្រាលី ខណៈដែលជនភៀសខ្លួន ៤នាក់របស់ប្រទេសអូស្ត្រាលី កំពុងរស់នៅក្នុងប្រទេសកម្ពុជា អស់រយៈពេល ៣ខែមកហើយ។ ក្រៅពីនេះ សង្គមស៊ីវិល និងមន្ត្រីបក្សប្រឆាំង ចង់ឃើញរដ្ឋាភិបាលដោះស្រាយបញ្ហារបស់ពលរដ្ឋខ្លួនជាមុនសិន មុននឹងជួយអ្នកដទៃ។ទាញយកកម្មវីធី
ថ្លែងបែបនេះរបស់អ្នកនាំពាក្យក្រសួងមហាផ្ទៃ ស្របពេលដែលព័ត៌មានទាក់ទងជនភៀសខ្លួន ៤នាក់ កំពុងរស់នៅក្នុងប្រទេសកម្ពុជា ស្ថិតក្នុងភាពអាថ៌កំបាំងនៅឡើយ។ លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រទេសកម្ពុជា និយាយថា មិនមានផែនការណាមួយដើម្បីនាំជនភៀសខ្លួនច្រើនទៀតពីកោះណាវរូ មកកម្ពុជា ទេ។
កាសែត ឌឹ ខេមប៊ូឌា ដេលី (The Cambodia Daily) បានដកស្រង់ប្រសាសន៍របស់ លោក ខៀវ សុភ័គ អ្នកនាំពាក្យក្រសួងមហាផ្ទៃ កាលពីថ្ងៃទី២៨ ខែសីហា ថា បើកម្ពុជា ទទួលជនភៀសខ្លួនកាន់តែតិចកាន់តែល្អ។
វិទ្យុអាស៊ីសេរី មិនអាចសុំការពន្យល់បន្ថែមពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងមន្ត្រីក្រសួងមហាផ្ទៃ ដែលធ្វើការងារទាក់ទងរឿងជនភៀសខ្លួនបានទេ នៅថ្ងៃទី៣០ ខែសីហា។
យ៉ាងណាក៏ដោយចុះ រដ្ឋលេខាធិការ និងជាអ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់នៅថ្ងៃទី៣០ សីហា ថា បន្ទាប់ពីជនភៀសខ្លួន ៤នាក់បានមកដល់ប្រទេសកម្ពុជា ពុំមានជនភៀសខ្លួនរូបណាថាយល់ព្រមមកប្រទេសកម្ពុជា ទៀតទេ៖ «អត់ទាន់ការផុលផុសពីអ្នកនៅជំរំមកស្រុកខ្មែរនៅឡើយ ជាគោលការណ៍ លុះត្រាអ្នកទាំងនោះយល់ព្រមមក ទើបរដ្ឋាភិបាលកម្ពុជា ទទួលយកពួកគេ»។
ប្រធានផ្នែកស៊ើបអង្កេត និងគ្រប់គ្រងផ្នែកច្បាប់នៃសមាគមការពារសិទ្ធិមនុស្សអាដហុក (ADHOC) លោក នី ចរិយា ស្វាគមន៍ និងគាំទ្រប្រសាសន៍របស់អ្នកនាំពាក្យក្រសួងមហាផ្ទៃ លោក ខៀវ សុភ័គ។ លោកបន្តថា នេះជាការសម្រេចចិត្តមួយត្រឹមត្រូវ ហើយរដ្ឋាភិបាលកម្ពុជា គួរតែធ្វើការងារបន្ថែមទៀតក្នុងការលើកស្ទួយផ្នែកសិទ្ធិមនុស្ស ប្រសើរជាងការទទួលយកជនភៀសខ្លួន ខណៈពលរដ្ឋខ្មែរកំពុងប្រឈមនឹងបញ្ហាដីធ្លី និងលំនៅឋាន៖ «នេះជាការសម្រេចចិត្តមួយត្រឹមត្រូវ ហើយយើងធ្វើម៉េចខិតខំធ្វើការលើកស្ទួយការពារសិទ្ធិមនុស្សនេះប្រសើរជាង»។
ផ្ទះជនភៀសខ្លួន ៤នាក់ ៦២០
កាលពីដើមខែមិថុនា រដ្ឋាភិបាលកម្ពុជា យល់ព្រមទទួលជនភៀសខ្លួនចំនួន ៤នាក់ ក្នុងនោះ ៣នាក់ជាជនជាតិអ៊ីរ៉ង់ (Iran) និងម្នាក់ទៀតជាជនជាតិដើមភាគតិចរ៉ូហ៊ីងយ៉ា (Rohingya) ដែលភៀសខ្លួនពីប្រទេសមីយ៉ាន់ម៉ា ឬភូមា ទៅកាន់ប្រទេសអូស្ត្រាលី។ ស្របពេលគ្នានោះដែរ រដ្ឋាភិបាលអូស្ត្រាលី បានផ្តល់ជំនួយប្រមាណ ៣០លានដុល្លារសហរដ្ឋអាមេរិក ដល់រដ្ឋាភិបាលកម្ពុជា។
ចំណែកនាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ យល់ថា លោកលើកទឹកចិត្តដល់ក្រសួងមហាផ្ទៃ ដើម្បីអនុវត្តការងារដូចអ្វីទៅនឹងអ្នកនាំពាក្យក្រសួងនេះអះអាងថា មិនមានផែនការណាមួយបញ្ជូនជនភៀសខ្លួនបន្ថែម។ ទោះបែបនេះ មន្ត្រីសង្គមស៊ីវិលរូបនេះ ស្នើមន្ត្រីមានសមត្ថកិច្ច បើកទូលាយព័ត៌មានទាក់ទងស្ថានភាពជនភៀសខ្លួនអ្នកដែលកំពុងរស់នៅប្រទេសកម្ពុជា៖ «មន្ត្រីមានសមត្ថកិច្ច គួរតែបង្ហាញពីការរស់នៅរបស់ជនភៀសខ្លួន ជីវភាពពួកគាត់ គាត់នៅកន្លែងមួយខែម្តង ឬបីខែម្តង»។
ទាក់ទងស្ថានភាពជនភៀសខ្លួននេះដែរ អ្នកនាំពាក្យក្រសួងមហាផ្ទៃ ឲ្យដឹងថា ពួកគេរីករាយនឹងការរស់នៅរបស់ខ្លួន ដែលសព្វថ្ងៃនេះកំពុងស្នាក់នៅបណ្ដោះអាសន្នក្នុងផ្ទះវីឡាព័ទ្ធដោយរបងខ្ពស់ៗ ស្ថិតនៅខណ្ឌច្បារអំពៅ ជាយក្រុងភ្នំពេញ ក្រោមការរៀបចំរបស់ក្រសួងមហាផ្ទៃ។
ដោយឡែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា គណបក្សសង្គ្រោះជាតិ គោរពកាតព្វកិច្ចអន្តរជាតិ ប៉ុន្តែស្ថានភាពកម្ពុជា នៅពេលនេះ រដ្ឋាភិបាលគួរដោះស្រាយបញ្ហារបស់ពលរដ្ឋខ្លួនដែលកំពុងកើតឡើងជាមុនសិន៖ «ក្នុងស្ថានភាពកម្ពុជា ដែលប្រទេសយើងក្រ ពលរដ្ឋយើងជួបការលំបាក យើងត្រូវការប្រមូលធនធានពេលវេលាជួយពលរដ្ឋយើងសិន»។
អ្នកនាំពាក្យក្រសួងមហាផ្ទៃ លោក ខៀវ សុភ័គ ឲ្យដឹងថា យ៉ាងហោចណាស់ រដ្ឋាភិបាលចំណាយពេល ៦ខែដើម្បីឲ្យជនភៀសខ្លួនហាត់រៀនពីវប្បធម៌ អក្សរសាស្ត្រ ដើម្បីឲ្យស៊ាំនឹងសង្គមកម្ពុជា ប៉ុន្តែលោកថា ប្រសិនបើពួកគេនៅតែមិនទាន់អាចប្រាស្រ័យទាក់ទងបានក្រោយការបណ្ដុះបណ្ដាល ពួកគេនឹងត្រូវបន្តរស់នៅក្រោមការរៀបចំរបស់ក្រសួងមហាផ្ទៃ បន្តទៀត៕
No comments:
Post a Comment