ដោយ ម៉ែន សុធីរ
2016-06-25
កសិកររស់នៅឃុំសាមឃួយ ក្នុងខេត្តស្ទឹងត្រែង លោកស្រី ថាត់ សោភា ផ្ដល់បទសម្ភាសន៍ដល់វិទ្យុអាស៊ីសេរី អំពីដង្កូវស៊ីដំណាំ កាលពីថ្ងៃទី២៤ ខែមិថុនា ឆ្នាំ២០១៦។
RFA/Men Sothyr
កសិករនៅស្រុកសេសាន ខែត្រស្ទឹងត្រែង បារម្ភពីហ្វូងដង្កូវម្យ៉ាងដែលកំពុងបំផ្លាញដំណាំពួកគាត់អស់ជាច្រើនហិកតារ។ អ្នកភូមិក៏អំពាវនាវឲ្យក្រសួងកសិកម្ម និងស្ថាប័នពាក់ព័ន្ធរកមធ្យោបាយកម្ចាត់ហ្វូងដង្កូវទាំងនោះ ខណៈពួកគាត់កំពុងត្រៀមសាបព្រោះធ្វើស្រែ។ ពួកគាត់ចាត់ទុកដង្កូវហ្វូងទាំងនោះថា ជាសត្វល្អិតលំបាកនឹងរកថ្នាំកម្ចាត់ និងបង្ការដោយសារវាពួនក្នុងរន្ធដី។
កសិករនៅឃុំសាមឃួយ ឃុំស្ដៅ និងឃុំកំផុន ស្រុកសេសាន កំពុងរកមធ្យោបាយកម្ចាត់ និងបង្ការដង្កូវហ្វូង ដែលបំផ្លាញដំណាំពួកគាត់អស់ជាច្រើនហិកតារ រយៈពេលជាង ២សប្ដាហ៍មកហើយ។ កសិករមួយចំនួនបានទិញថ្នាំបាញ់កម្ចាត់ តែពុំមានប្រសិទ្ធភាពដោយសារតែហ្វូងដង្កូវនោះលាក់ខ្លួនក្នុងរន្ធដីនៅពេលថ្ងៃ និងរកស៊ីចំណីពេលយប់។
កសិករម្នាក់ក្នុងចំណោមកសិករច្រើនទៀត រស់នៅឃុំសាមឃួយ គឺលោកស្រី ផាត់ សោភា កត់សម្គាល់ថា សត្វដង្កូវហ្វូងទាំងនោះបានបំផ្លាញដំណាំអ្នកភូមិស្ទើរគ្រប់ក្រុមគ្រួសារ មានពោត សណ្ដែកបាយ ស្រូវ និងដំឡូងមីជាដើម។ លោកស្រីថា អ្នកភូមិពុំមានតួលេខស្ដីពីទំហំផ្ទៃដីដែលសត្វដង្កូវហ្វូងបំផ្លាញដាំដំណាំពួកគាត់នោះទេ ខណៈកសិករខ្លះដាំពោត ចាប់ពីកន្លះហិកតារដល់ ៥ហិកតារ និងខ្លះដាំស្រូវតាមចន្លោះព្រៃ និងមាត់ទន្លេ ត្រូវដង្កូវបំផ្លាញពុំអាចប្រមូលផលបាន។ លោកស្រីបារម្ភថា ប្រសិនបើស្ថាប័នជំនាញមិនរកមធ្យោបាយកម្ចាត់ដង្កូវនេះឲ្យទាន់ពេលទេ ស្រូវពូជអ្នកភូមិត្រៀមសាបព្រោះ អាចនឹងប្រឈមដង្កូវហ្វូងទាំងនោះបំផ្លាញ៖ «ពលរដ្ឋគាត់បារម្ភនៅភូមិគេ គេសាបមុនវាស៊ីអស់ហើយ ទម្រាំយើងសាបក្រោយរឹតតែណាស់ហើយ។ គេដាំគេចង់បានពោតលក់ ដើម្បីយកលុយទុកឆ្នាំក្រោយ។ តែឥឡូវដង្កូវស៊ីអស់ហើយឆ្នាំក្រោយក៏អត់មានលុយ»។
ឆ្លើយតបរឿងនេះ មន្ត្រីកសិកម្មខែត្រស្ទឹងត្រែង លោក ស្វាយ ពុទ្ធារ៉ា មានប្រសាសន៍នៅថ្ងៃទី២៤ ខែមិថុនា ថា រយៈពេលពីរសប្ដាហ៍មកហើយ ដែលដង្កូវហ្វូងបំផ្លាញដំណាំពលរដ្ឋនៅស្រុកចំនួន២ គឺស្រុកថាឡាបរិវ៉ាត់ និងស្រុកសេសាន។ លោកថា នៅស្រុកថាឡាបរិវ៉ាត់ ដំណាំពលរដ្ឋ មានស្រូវពោត និងដំឡូងជាដើមត្រូវដង្កូវបំផ្លាញអស់ ១៥ហិកតារ ហើយមន្ត្រីជំនាញកសិកម្មបានចុះស្រាវជ្រាវបញ្ហានេះហើយ ហើយបានណែនាំបច្ចេកទេសបង្ការមួយចំនួនដល់កសិករកាលពីសប្ដាហ៍មុន។ លោកថា កសិករប៉ះពាល់ដោយសារដង្កូវហ្វូងនោះ ភាគច្រើនជាដំណាំបន្ទាប់បន្សំលក្ខណៈគ្រួសារ នៅចន្លោះដីទំនេរមាត់ទន្លេ៖ «ចុះទៅផ្សព្វផ្សាយគាត់នឹងណែនាំបញ្ជាក់បន្ថែមពីមូលហេតុ។ ដង្កូវនៅកន្លែងណា វិធានការយ៉ាងម៉េចហើយ ដោយសារគាត់ភ្ជួរដីមិនបានច្រើនដង»។
ដំណាំពោតរបស់កសិករនៅឃុំសាមឃួយ ស្រុកសេសាន ខែត្រស្ទឹងត្រែង ត្រូវដង្កូវហ្វូងបំផ្លាញ។ រូបថតថ្ងៃទី២៤ ខែមិថុនា ឆ្នាំ២០១៦។ RFA/Men Sothyr
កសិករម្នាក់ទៀត គឺលោកស្រី ថែង បែង កត់សម្គាល់ថា ដង្កូវហ្វូងដែលបំផ្លាញដំណាំមាន ៣ប្រភេទ។ ប្រភេទទី១ ប៉ុនម្រាមដៃ ទី២ ប៉ុនចង្កឹះ និងទី៣ ប៉ុនចង្កឹះមានរោម។ ដង្កូវ៣ប្រភេទនោះច្រើនរកចំណីពេលយប់ និងពូនក្នុងរន្ធដី។ លោកស្រីកត់សម្គាល់ថា ដំណាំដែលដង្កូវទាំងនោះរាតត្បាតហើយ មិនអាចប្រមូលផលបានទេ ជាក់ស្ដែងគ្រួសារលោកស្រីដាំពោត ជាង ១ហិកតារត្រូវដង្កូវទាំងនោះបំផ្លាញស្លឹកអស់ពុំអាចប្រមូលផលបាន។ លោកស្រីត្អូញត្អែរថា បាតុភាពនេះបណ្ដាលឲ្យប៉ះពាល់ជីវភាពពលរដ្ឋដែលរស់ពឹងផ្អែកលើកសិកម្ម៖ «ដង្កូវវាពូនក្នុងដី យប់វាឡើងស៊ី។ បារម្ភអស់លុយ អស់ទាំងកម្លាំងអត់បានផល»។
មន្ត្រីជំនាញកសិកម្មពន្យល់ថា ដង្កូវហ្វូងកើតឡើងដោយសារអាកាសធាតុក្ដៅអូសបន្លាយពេលបណ្ដាលឲ្យពងមេអំបៅក្នុងដីអាចញាស់ចេញជាដង្កូវច្រើន ស្របពេលដែលកសិករដាំដំណាំ។ កសិករកត់សម្គាល់ថា វាជាលើកដំបូងដែលកសិករប្រទះឃើញដង្កូវហ្វូងទាំងនោះកើតមានរដូវវស្សាឆ្នាំនេះ។ យ៉ាងណាមន្ត្រីជំនាញផ្ដល់អនុសាសន៍ថា ដើម្បីកម្ចាស់ការរីករាលដាលដង្កូវទាំងនោះ គឺត្រូវជីកប្រឡាយមិនឲ្យដង្កូវឆ្លងកាត់ ឬប្រើថង់ប្លាស្ទិកបាំង ហើយជីករណ្ដៅដើម្បីឲ្យដង្កូវធ្លាក់ចូល និងត្រូវភ្ជួររាស់ដីច្រើនដងមុនសាបព្រោះ។ ក៏ប៉ុន្តែកសិករមួយចំនួនយកពិធីនេះអនុវត្តពុំមានប្រសិទ្ធភាពនោះទេ។
អ្នកនាំពាក្យសាលាខែត្រស្ទឹងត្រែង លោក ម៉ែន គុង ឲ្យដឹងថា អាជ្ញាធរខែត្របានទទួលព័ត៌មាននេះហើយ នឹងបានចាត់ឲ្យមន្ត្រីជំនាញច្រើនរួបចុះពិនិត្យ និងរកមធ្យោបាយបង្ការ និងកម្ចាត់ដង្កូវហ្វូងទាំងនោះ។ លោកបញ្ជាក់ថា អាជ្ញាធរខែត្រនៅមិនទាន់មានរបាយការណ៍ស្ដីពីទំហំផ្ទៃដីរបស់កសិករដែលប៉ះពាល់ដោយដង្កូវនោះទេ ខណៈអាជ្ញាធរជំនាញបានចុះផ្សព្វផ្សាយពិធីបង្ការ មិនឲ្យរីករាលដាល៖ «អភិបាលខែត្របានចាត់ឲ្យមន្ទីរជំនាញចុះទៅធ្វើការស្រាវជ្រាវរកព័ត៌មានទាំងអស់ហ្នឹង ហើយឲ្យរដ្ឋបាលធ្វើរបាយការណ៍ពីស្ថានភាពជាក់ស្ដែង»។
មន្ត្រីកសិកម្មខែត្រកំពុងរកមធ្យោបាយកម្ចាត់ដង្កូវទាំងនោះ និងត្រៀមផ្ដល់ថ្នាំកម្ចាត់ឲ្យកសិករ និងណែនាំកសិករឲ្យយល់ដឹងពិធីបង្ការ៕
No comments:
Post a Comment