ដោយ សាន សែល
2016-03-29
២២-មីនា-២០១៦៖ ទីស្នាក់ការគណបក្សសង្គ្រោះជាតិ ឋិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ RFA/Morm Moniroth
RFA/Morm Moniroth
អភិបាលក្រុងតាខ្មៅ ខេត្តកណ្ដាល បញ្ជាក់ថា អាជ្ញាធរកំពុងសិក្សាពីការតវ៉ារបស់ប្រជាពលរដ្ឋដែលចោទថា ការសាងសង់អង់តែនទូរទស្សន៍ព្រះអាទិត្យនៅជិតភូមិឋានរបស់ពួកគាត់ នឹងប៉ះពាល់ដល់សុខភាព។ អាជ្ញាធរលើកឡើងបែបនេះ បន្ទាប់ពីមន្ត្រីគណបក្សសង្គ្រោះជាតិ មន្ទិលពីល្បឿន និងការធ្វើសេចក្តីសម្រេច ថាតើគួរផ្តល់សិទ្ធិសាងសង់អង់តែនទូរទស្សន៍ដល់គណបក្សសង្គ្រោះជាតិ ឬយ៉ាងណា?
អភិបាលក្រុងតាខ្មៅ លោក ហេង ធាម មានប្រសាសន៍ថា សេចក្តីសម្រេចអនុញ្ញាតតាមសំណើសាងសង់អង់តែនទូរទស្សន៍ព្រះអាទិត្យ ត្រូវប្រើពេលវេលាវែង បន្ទាប់ពីប្រជាពលរដ្ឋ ២១រូបដាក់ពាក្យតវ៉ា ស្នើឲ្យប្ដូរទីតាំងដំឡើងអង់តែនទូរទស្សន៍នេះ។
លោកគូសបញ្ជាក់ថា ក្រុមការងាររបស់លោក កំពុងពិនិត្យស្រាវជ្រាវពីការព្រួយបារម្ភរបស់ប្រជាពលរដ្ឋដែលរស់នៅជិតទីតាំងអង់តែនទូរទស្សន៍ព្រះអាទិត្យ សិក្សាពីផលប៉ះពាល់សុខភាពបណ្ដាលមកពីអង់តែនទូរទស្សន៍៖ «សាលាក្រុងកំពុងពិនិត្យកិច្ចការនេះ និងសម្របសម្រួល ហើយដាក់ជូនឯកឧត្តមអភិបាលខេត្តសុំគោលការណ៍ដឹកនាំ»។
ឆ្លើយតបនឹងការលើកឡើងនេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានអះអាងថា កន្លងមក គណបក្សសង្រ្គោះជាតិ សុំឲ្យប្រជាពលរដ្ឋជាង ២០គ្រួសារដែលប្ដឹងពីផលប៉ះពាល់ដូចដែលលោកអភិបាលក្រុងលើកឡើងនេះ តែពុំមានប្រជាពលរដ្ឋណាម្នាក់មកជួបថ្នាក់ដឹកនាំគណបក្សប្រឆាំង និយាយពីការមិនសុខចិត្តចំពោះការដំឡើងអង់តែននេះទេ។ លោក យឹម សុវណ្ណ សង្កត់ធ្ងន់ថា ការពន្យារពេលរបស់អាជ្ញាធរខេត្តនេះ អាចជាហេតុផលនយោបាយ៖ «ត្រូវស្មោះត្រង់ជាមួយគ្នា បើឲ្យគេសង់ហើយកុំបន្ទច់បង្អាក់។ ថ្ងៃមុនឲ្យគេមកទារលុយ ហើយខ្ញុំថាឲ្យគេមកចុះ ខ្ញុំបើកឲ្យ តែមិនឃើញមក។ ដល់ស្រាវជ្រាវមែនទែន ដឹងឈ្មោះនៅណា? យ៉ាប់មែនទែន»។
គណបក្សសង្គ្រោះជាតិ គ្រោងចាប់ផ្ដើមដំណើរការទូរទស្សន៍ព្រះអាទិត្យនៅដើមឆ្នាំ២០១៦ បន្ទាប់ពីទទួលបានអាជ្ញាប័ណ្ណពីរដ្ឋាភិបាល ក៏ប៉ុន្តែគម្រោងនេះ ត្រូវបានពន្យារពេល ខណៈដំណើរការស្នើសុំសាងសង់អង់តែនទូរទស្សន៍កំពុងជាប់គាំង។
ប្រធានប្រតិបត្តិគណបក្សសង្គ្រោះជាតិ ប្រចាំខេត្តកណ្ដាល លោក ភូ សុខា ឲ្យដឹងថា ក្រុមការងារលោក បានដាក់ពាក្យស្នើសុំសាងសង់អង់តែន ទៅសាលាក្រុងតាខ្មៅ អស់រយៈពេល ២សប្ដាហ៍មកហើយ។ លោកបញ្ជាក់ថា ក្រុមការងារលោក និងអាជ្ញាធរ កំពុងពិភាក្សាគ្នាលើនីតិវិធីពាក់ព័ន្ធសំណើនេះ ហើយថា ប្រសិនបើការសិក្សាស្រាវជ្រាវរកឃើញថា ប្រជាពលរដ្ឋពិតជាប៉ះពាល់សុខភាពដោយសារការសាងសង់អង់តែនទូរទស្សន៍ ក្រុមការងារលោកនឹងពិចារណាប្ដូរទីតាំង។ ទោះបីជាយ៉ាងណា លោកសង្ស័យថា ការតវ៉ារបស់ប្រជាពលរដ្ឋនេះ កើតឡើងដោយសារការញុះញង់៖ «កន្លែងដែលយើងរៀបចំសាងសង់អង់តែនទូរទស្សន៍នេះ ប្រជាពលរដ្ឋនៅជាប់ព្រំ (ដី) គ្នាហ្នឹង គាត់ថា មានអនុភូមិម្នាក់គាត់មានដីនៅចំពីមុខដីយើង គាត់ថាបើកាលណាសាងសង់អង់តែនហ្នឹងទៅ ប៉ះពាល់ដល់សុខភាព ហើយប្រជាពលរដ្ឋក្មេងៗដែលគ្រប់ការបានប្ដីប្រពន្ធទៅ ថ្ងៃក្រោយអត់មានកូនចៅអីទេ។ គាត់នាំគេផ្ដិតមេដៃជំទាស់ ដើម្បីកុំឲ្យសាងសង់។ គ្រួសារខ្លះមានអង់តែនណានៅជិត តែគ្មានកូន។ បើនៅភ្នំពេញដាក់អង់តែននៅលើផ្ទះ តែមានកូនបួនប្រាំ។ គាត់មិនជឿទេ រឿងបញ្ហាហ្នឹង»។
គម្រោងបង្កើតស្ថានីយទូរទស្សន៍របស់គណបក្សសង្គ្រោះជាតិ ត្រូវប្រើថវិកាប្រមាណ ៣លានដុល្លារសហរដ្ឋអាមេរិក។ មកទល់ពេលនេះ ថវិកាដែលទទួលបានពីការបរិច្ចាគរបស់សាធារណជន មានចំនួន ៧០ម៉ឺនដុល្លារសហរដ្ឋអាមេរិក។
មន្ត្រីជាន់ខ្ពស់នៃគណបក្សសង្គ្រោះជាតិ លោក អេង ឆៃអ៊ាង ថ្លែងថា នៅពេលអាជ្ញាធរអនុញ្ញាតឲ្យសាងសង់អង់តែនទូរទស្សន៍ ក្រុមការងារលោក នឹងបន្តការរៃអង្គាសថវិកាបន្ថែមដើម្បីយកមកទ្រទ្រង់ដំណើរការផ្សាយទូរទស្សន៍។
មន្ត្រីជាន់ខ្ពស់គណបក្សសង្គ្រោះជាតិ បញ្ជាក់ថា គណបក្សសង្គ្រោះជាតិ ទទួលបានប្លង់ដីទំហំជាង ១ពាន់ម៉ែត្រការ៉េនៅក្រុងតាខ្មៅ ខេត្តកណ្ដាល ដើម្បីសាងសង់អង់តែនទូរទស្សន៍ព្រះអាទិត្យ៕
No comments:
Post a Comment