ដោយ សិរីមុនី
2016-01-30 rfa
 |
លោកស្រី ផាន់ ឈុនរ៉េត និងស្វាមី ថ្លែងការពារមិនឲ្យអាជ្ញាធររុះរើផ្ទះលោកស្រីចេញពីតំបន់បឹងកក់ នៅថ្ងៃទី៣០ ខែមករា ឆ្នាំ២០១៦។ RFA/Sireymuny |
ប្រជាពលរដ្ឋនៅសហគមន៍បឹងកក់ ប្រមាណជិត ១០០នាក់ ប្រមូលផ្ដុំនៅគ្នានៅមុខផ្ទះរបស់លោកស្រី ផាន់ ឈុនរ៉េត ដើម្បីការពារកុំឱ្យសាលាខណ្ឌដូនពេញ ចុះរុះរើផ្ទះរបស់ពួកគាត់។ ផ្ទះលោកស្រី ផាន់ ឈុនរ៉េត នៅខាងជើងវិហារឥស្លាម ស្ថិតនៅភូមិ២២ សង្កាត់ស្រះចក ខណ្ឌដូនពេញ ដែលសាលាខណ្ឌដូនពេញ ចោទប្រកាន់ថា បានសង់លើដីរបស់រដ្ឋ ហើយតម្រូវឱ្យរុះរើផ្ទះនោះចេញត្រឹមថ្ងៃទី៣០ ខែមករា។
មន្ត្រីអង្គការសង្គមស៊ីវិលលើកឡើងថា រដ្ឋមិនគួរឈ្លោះនឹងរាស្ត្រនោះទេ និងគួរមានដំណោះស្រាយមួយឱ្យបានសមស្របទៅតាមការចង់បានរបស់ពលរដ្ឋ។
សាលាខណ្ឌដូនពេញ នៅព្រឹកថ្ងៃទី៣០ ខែមករា មិនទាន់ចុះរុះរើផ្ទះរបស់លោកស្រី ផាន់ ឈុនរ៉េត សកម្មជនដីធ្លីបឹងកក់ ដែលសាលាខណ្ឌដូនពេញ ចោទប្រកាន់ថា ផ្ទះនោះសង់ដោយគ្មានការអនុញ្ញាតពីអាជ្ញាធរ និងសង់នៅលើដីសាលាខណ្ឌដូនពេញ។
សកម្មជនបឹងកក់ លោកស្រី ផាន់ ឈុនរ៉េត និយាយថា លោកស្រីមកតាំងទីលំនៅបឹងកក់ តាំងពីឆ្នាំ១៩៩៣ ហើយលោកស្រីមិនបានរំលោភយកដីរបស់សាលាខណ្ឌដូនពេញ នោះទេ។ លោកស្រីនឹងមិនចាកចេញពីផ្ទះរបស់លោកស្រីឡើយ បើទោះបីសាលាខណ្ឌដូនពេញ ចេញលិខិតឱ្យលោកស្រីរុះរើផ្ទះក៏ដោយ ក៏ស្រីមិនព្រមរុះរើដែរ។
សកម្មជនបឹងកក់ ទាំងនោះ នៅក្នុងដៃកាន់បដាសរសេរថា អាជ្ញាធរមិនត្រូវរុះរើផ្ទះលោកស្រី ផាន់ ឈុនរ៉េត នោះទេ និងត្រូវចេញប័ណ្ណជូនលោកស្រី។ បន្ថែមពីលើបដានោះ សកម្មជនបឹងកក់ ក៏បាននិមន្តព្រះសង្ឃសូត្រធម៌ប្រោះព្រំក្នុងន័យការពារកុំឱ្យសាលាខណ្ឌដូនពេញ ចុះរុះរើផ្ទះរបស់ពួកគាត់។
លោកស្រីបន្តថា ទោះសាលាខណ្ឌដូនពេញ ដាក់ត្រាក់ទ័រមកឈូសកម្ទេចផ្ទះរបស់លោកស្រី ក៏លោកស្រីមិនចាកចេញដែរ។ លោកស្រីបន្ថែមថា លោកស្រីគ្មានផ្ទះ គ្មានទីពឹងសម្រាប់អាស្រ័យ និងគ្មានលទ្ធភាពទិញដី និងផ្ទះថ្មីសម្រាប់ជ្រកនោះទេ ម្ល៉ោះហើយលោកស្រីសុខចិត្តស្លាប់នៅនឹងផ្ទះនេះ៖ «សូមឱ្យសាលារាជធានីភ្នំពេញ ចេញប័ណ្ណកម្មសិទ្ធិឱ្យខ្ញុំមក។ ខ្ញុំមិនសុខចិត្តទេ ខ្ញុំតស៊ូលុះត្រាជីវិតខ្ញុំអស់។ ខ្ញុំសន្យារួចហើយ បើជីវិតខ្ញុំអស់ អ្នកឯងយកបានក៏យកទៅ ប៉ុន្តែជីវិតខ្ញុំនៅ ខ្ញុំសុខចិត្តស្លាប់នៅទីនេះ»។
លោកស្រី ផាន់ ឈុនរ៉េត ឋិតក្នុងចំណោមអ្នកមានបញ្ហាដីធ្លីចុងក្រោយប៉ុន្មាន ៤១គ្រួសារ ដែលសាលាក្រុងភ្នំពេញ មិនទាន់ដោះស្រាយរួចរាល់។ បន្ទាប់ពីផ្ទះចាស់ត្រូវបានក្រុមស៊ូកាគូ (Shukaku) ចាក់ខ្សាច់លុបបឹងកក់ ហើយបណ្ដាលឱ្យបាក់ផ្ទះរបស់លោកស្រី។ លោកស្រី ផាន់ ឈុនរ៉េត សង់ផ្ទះថ្មីនៅក្នុងឆ្នាំ២០១៥ ហើយលោកស្រីស្នើសុំឱ្យសាលាក្រុងភ្នំពេញ ចេញប័ណ្ណកម្មសិទ្ធិឱ្យលោកស្រី។
នាយកប្រតិបត្តិអង្គការក្រុមការងារសិទ្ធិលំនៅឋាន លោក សៀ ភារម្យ និយាយថា រដ្ឋាភិបាលគួរប្រើយុទ្ធសាស្ត្រក្នុងការអភិវឌ្ឍប្រកបដោយទស្សនវិស័យត្រឹមត្រូវ ហើយយកការរីកចម្រើនរបស់រាស្ត្រជាធំ ដោយគួរមានសំណងសមស្របជូនពលរដ្ឋ មិនគួរឱ្យប្រជាពលរដ្ឋស្រក់ទឹកភ្នែកដោយសារការអភិវឌ្ឍរបស់រដ្ឋាភិបាលនោះទេ៖ «វាអាចកើតមានអំពើហិង្សាកើតឡើង បើសិនអាជ្ញាធរនៅតែរឹងទទឹងចង់បានដីនោះ ជាដីរបស់រដ្ឋ ហើយគាត់មិនឱ្យទៅប្រជាពលរដ្ឋទេនោះ។ យើងមិនចង់ឱ្យរដ្ឋឈ្លោះជាមួយរាស្ត្រ ហើយរាស្ត្រឈ្លោះជាមួយរដ្ឋ ដោយហិង្សាទេ យើងចង់រដ្ឋដោះស្រាយជាមួយរាស្ត្រដោយសន្តិវិធី»។
លោកបន្តថា ជម្លោះដីធ្លីនៅបឹងកក់នេះ គឺអូសបន្លាយពេលវេលាជាយូរមកហើយ ប៉ុន្តែនៅមិនមានដំណោះស្រាយណាមួយល្អប្រសើរសម្រាប់ពលរដ្ឋនៅឡើយទេ។
វិទ្យុអាស៊ីសេរី មិនអាចសុំការបំភ្លឺពីអភិបាលខណ្ឌដូនពេញ លោក គួច ចំរើន បានទេ ដោយទូរស័ព្ទចូលពុំមានអ្នកទទួល។ យ៉ាងណាក៏ដោយ លិខិតរបស់សាលាខណ្ឌដូនពេញ ចុះថ្ងៃទី២៨ ខែធ្នូ ឆ្នាំ២០១៥ សរសេរថា សូមឱ្យលោកស្រី ផាន់ ឈុនរ៉េត រុះរើសំណង់ថ្មីឈើប្រក់ស័ង្កសីមានទំហំ ១៦,០៧ម៉ែត្រ ចេញវិញជាបន្ទាន់ដោយទុករយៈពេល ១៥ថ្ងៃ។
ក្នុងករណីលោកស្រី ផាន់ ឈុណារ៉េត មិនបានអនុវត្តតាមសេចក្ដីដំណឹងនេះទេ សាលាខណ្ឌដូនពេញ នឹងចុះអនុវត្តវិធានការរដ្ឋបាល ដោយមិនទទួលខុសត្រូវរាល់ការខូចខាត ឬបាត់បង់សម្ភារៈឡើយ។
មន្ត្រីអង្គការសង្គមស៊ីវិលលើកឡើងថា សាលាក្រុងភ្នំពេញ គួរត្រិះរិះពិចារណាឡើងវិញជុំវិញរឿងវិធានការនេះ ដោយមិនគួរចុះរុះរើផ្ទះលោកស្រី ផាន់ ឈុណារ៉េត នោះទេ ហើយគួរប្រើវិធីសាស្ត្រដែលល្អជាងនេះមកដោះស្រាយជូនពលរដ្ឋ៕
No comments:
Post a Comment