លោកនាយករដ្ឋមន្ត្រី ហ៊ុន សែន ថ្លែងក្នុងពិធីបើកសម្ពោធគម្រោងការពារទឹកជំនន់ និងកែលំអប្រព័ន្ធប្រឡាយលូ នៅទីតាំងសួនច្បារ មុខវត្តបទុមវតី នៅព្រឹកថ្ងៃទី៥ ខែវិច្ឆិកា ឆ្នាំ២០១៥។
RFA/Brach Chev
ក្រុមអ្នកវិភាគយល់ឃើញថា ប្រតិកម្មរបស់លោកនាយករដ្ឋមន្រ្តី ហ៊ុន សែន ប្រឆាំងអ្នកវិភាគគឺមិនខុសអ្វីខឹងគោទៅវ៉ៃរទេះនោះទេ។ ការថ្លែងរបស់អ្នកវិភាគបែបនេះ បន្ទាប់ពីលោកនាយករដ្ឋមន្ត្រីថ្លែងជាសាធារណៈថា កុំចេះតែហ៊ាន បើទោះជាការវិភាគណាមួយវាជាសិទ្ធិរបស់ពួកគេក៏ពិតមែន ក៏ប៉ុន្តែត្រូវធ្វើឡើងដោយចេះយោគយល់ចំពោះអ្នកដទៃដែរ។
ប្រតិកម្មរបស់លោកនាយករដ្ឋមន្ត្រីទៅលើអ្នកវិភាគ បន្ទាប់ពីមានការលើកឡើងថា ការផ្អាកព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ តាមដងទន្លេសាបក្នុងឆ្នាំ២០១៥ នេះ ដោយសារគណបក្សកាន់អំណាចបារម្ភខ្លាចមានបាតុកម្មរបស់ពលរដ្ឋ។
ការព្រមានរបស់លោក ហ៊ុន សែន ជាថ្មីទៀតនេះ ត្រូវបានអ្នកវិភាគប្រៀបធៀបទៅនឹងឆាកល្ខោនមួយរោងដែលលោកនាយករដ្ឋមន្ត្រីបែរជាខឹងអ្នករូតខ្សែវាំងនន ដែលគ្រាន់តែដើម្បីកំដរល្ខោន ដោយឡែកតួសំដែងវិញបែរជារួចខ្លួន។
ការរិះគន់របស់ក្រុមអ្នកវិភាគចំពោះសារនយោបាយរបស់លោក ហ៊ុន សែន នេះ ធ្វើឡើងភ្លាមៗក្រោយពីលោកនាយករដ្ឋមន្ត្រីប្រតិកម្មចោទប្រកាន់ថា អ្នកវិភាគអាងតែមានមាត់ចេះតែនិយាយ ហើយថែមទាំងគំរាមថា កុំចេះតែហ៊ាន។
ទាក់ទិនបញ្ហានេះ លោក កែម ឡី អ្នកស្រាវជ្រាវការអភិវឌ្ឍសង្គមយល់ឃើញថា សារនយោបាយរបស់លោក ហ៊ុន សែន ដែលប្រតិកម្មចំពោះការវិភាគរបស់អ្នកនៅក្រៅសៃវៀននយោបាយនេះ វាជារឿងដែលគួរឲ្យហួសចិត្តទៅវិញទេ។
លោក កែម ឡី អះអាងថា មានអ្នកនយោបាយជាច្រើនដែលលោក ហ៊ុន សែន គួរតស៊ូមតិជាមួយ ក៏ប៉ុន្តែនៅពេលនេះបែរជាខឹងសម្បាចំពោះអ្នកដែលនៅក្រៅឆាកនយោបាយទៅវិញ។ លោកបន្តថា «ខ្ញុំមើលទៅរបៀបខឹងគោវាយនង្គ័លទេ។ តាមពិតទៅ យើងវិភាគទៅតាមស្ថានភាព ពីព្រោះលើកដំបូងនៅពេលដែលមានបញ្ហាម្ដងហើយម្ដងទៀត ពេលបុណ្យអុំទូកមានមនុស្សស្លាប់នៅស្ពានអីហ្នឹង យើងលើកចេញ។ នៅពេលដែលមានការបោះឆ្នោត ២០១៣ មានបញ្ហាបាតុកម្មច្រើនអ៊ីចឹង គឺយើងលើក។ មូលហេតុហ្នឹងមិនមែនយើងវិភាគទៅឥតមានភស្តុតាងទេ»។
ថ្លែងនៅក្នុងពិធីសម្ពោធគម្រោងការពារទឹកជំនន់ និងកែលម្អប្រព័ន្ធលូនៅទីក្រុងភ្នំពេញ កាលពីព្រឹកថ្ងៃទី៥ វិច្ឆិកា ប្រមុខរដ្ឋាភិបាលបានបញ្ចេញកំហឹងចំពោះអ្នកវិភាគដែលមិនសំដៅចំឈ្មោះដោយចាត់ទុកថា ជាការវិភាគដែលគ្មានទិសដៅហើយមានមាត់ចេះតែនិយាយ។ លោកបន្តថា «សូមអ្នកវិភាគទាំងឡាយយល់ឲ្យច្បាស់កុំព្រហើន។ ខ្ញុំទទួលខុសត្រូវដឹកនាំប្រទេសនេះ។ អស់លោកអ្នកមានសិទ្ធិ ក៏ប៉ុន្តែសូមអស់លោកអ្នកមានភាពថ្លៃថ្នូរ និងពិចារណាឲ្យបានម៉ត់ចត់ កុំអាងតែខ្លួនមានសិទ្ធិសេរីភាពក្នុងការបញ្ចេញមតិដោយខ្វះការទទួលខុសត្រូវ ខ្វះវិចារណញ្ញាណ»។
ជាទម្លាប់របស់លោកនាយករដ្ឋមន្ត្រីដែលតែងប្រើប្រាស់វេទិកាសាធារណៈ ហើយស្ដីបន្ទោសបក្សប្រឆាំង ឬគំរាមចាប់ដាក់គុក និងព្រមានវៃខ្នោះអ្នករិះគន់ជាដើមនោះ ដោយឡែកលើកនេះវិញ លោក ហ៊ុន សែន ក៏បានយកវេទិកាសាធារណៈរបស់លោក ហើយរិះគន់អ្នកវិភាគដូចមុនៗដែរ។
មូលហេតុដែលនាំឲ្យលោកនាយករដ្ឋមន្ត្រីប្រតិកម្មនឹងការរិះគន់ដែលសម្រេចលុបចោលពិធីបុណ្យអុំទូកឆ្នាំនេះ ព្រោះតែអ្នកវិភាគយល់ឃើញថា ប្រហែលជាលោក ហ៊ុន សែន ព្រួយបារម្ភខ្លាចមានបាតុកម្មផ្ទុះឡើងប្រឆាំងរូបលោកក្នុងថ្ងៃបុណ្យអុំទូកប៉ុណ្ណោះ ដែលពុំមានហេតុផលណាក្រៅពីនេះឡើយ។
បើទោះជាបែបណា លោកនាយករដ្ឋមន្ត្រីចំអកឲ្យអ្នកវិភាគ និងគណបក្សប្រឆាំងថា លោកមិនខ្លាចមានបាតុកម្មទេ។ ជាងនេះទៀត លោកថែមទាំងហ៊ានចំណាយលុយឲ្យធ្វើទៀតផង។ ក៏ប៉ុន្តែអ្វីដែលសម្រេចចិត្តលុបបុណ្យអុំទូកជាថ្មីទៀតក្នុងឆ្នាំនេះ ព្រោះតែកម្ពស់ទឹកមិនអាចបម្រើសេចក្ដីត្រូវការសម្រាប់រៀបចំព្រះរាជពិធីបាន។ ហេតុនេះ រដ្ឋាភិបាលបង្ខំលុបបុណ្យអុំទូកនេះ ប៉ុន្តែពិធីផ្សេងទៀតនៅតែអាចប្រារព្ធបានជាធម្មតា។ លោកបន្តថា«ឥឡូវសូមអ្នកអត្ថាធិប្បាយចេញមក ដើម្បីនិយាយគ្នា លោកឯងយកទូកមកអុំមក អុំខ្លួនឯងឥឡូវហ្នឹង។ ឲ្យទឹកប៉ុណ្ណឹងឲ្យលោកឯងអុំខ្លួនឯង ខ្ញុំជួយចេញលុយឲ្យ។ ជាពិសេសអ្នកធ្វើវិភាគ ហើយអ្នកតំណាងរាស្ត្របក្សប្រឆាំងខ្លះដល់រហូតថ្នាក់ថា រាជរដ្ឋាភិបាលមិនហ៊ានចាត់តាំងបុណ្យអុំទូក ខ្លាចគណបក្សសង្គ្រោះជាតិ ធ្វើបាតុកម្ម។ សូមអញ្ជើញចេញមកធ្វើបាតុកម្មចេញមក»។
ពាក់ព័ន្ធនឹងបាតុកម្មនេះ លោក ហ៊ុន សែន ទទួលស្គាល់ថា ព្រឹត្តិការណ៍ដែលមានក្រុមអ្នកតវ៉ាប្រឆាំងនឹងរូបលោកនៅបូរីញីវយ៉ក សហរដ្ឋអាមេរិក និងនៅប៉ារីស ប្រទេសបារាំង គឺគណបក្សជំទាស់ជាអ្នកដែលស្ថិតនៅពីក្រោយខ្នង។ ដោយឡែកបាតុកម្មនៅទីក្រុងភ្នំពេញ ដែលប្រឆាំងលោក កឹម សុខា វិញ លោកនាយករដ្ឋមន្ត្រី ហ៊ុន សែន ទទួលស្គាល់ថា ក៏មានអ្នករៀបចំដែរ។ បើទោះជាយ៉ាងណា បាតុកម្មទាំងពីរនេះ មួយមានអំពើហិង្សាដែលបង្កឲ្យអ្នកតំណាងរាស្ត្ររងរបួសធ្ងន់ធ្ងរ។ ដោយឡែកបាតុកម្មនៅបូរីញីវយ៉ក សហរដ្ឋអាមេរិក និងនៅប៉ារីស ប្រទេសបារាំងវិញ ពុំមានអំពើហិង្សាដូចថ្ងៃទី២៦ ខែតុលា ទេ។
លោក អំ សំអាត មន្ត្រីជាន់ខ្ពស់អង្គការលីកាដូ យល់ឃើញថា នេះជាសញ្ញានៃការគំរាមកំហែង ដែលការគំរាមនេះគឺមានបញ្ញត្តិដោយច្បាប់ ហើយជាការរំលោភសិទ្ធិមនុស្សទៀតផង។ មិនតែប៉ុណ្ណោះ ហេតុផលដែលនាំឲ្យមានការរិះគន់នេះត្រូវបានលោក អំ សំអាត ចាត់ទុកថា នោះក៏ព្រោះតែការផ្អាកបុណ្យជាតិដ៏សំខាន់មួយនេះ ធ្វើឡើងដោយមានមន្ទិលសង្ស័យជាច្រើន ហើយពុំអាចទទួលយកបានថែមទៀតផង។
យ៉ាងណាក៏ដោយ លោកនាយករដ្ឋមន្ត្រីបានព្រមានថា រដ្ឋាភិបាលក៏អាចមានសិទ្ធិធ្វើបាតុកម្ម និងថា មែនមានតែកម្លាំងគាំទ្រគណបក្សប្រឆាំងនោះទេ។ កាលពីថ្ងៃទី៣១ ខែតុលា រដ្ឋាភិបាលបានចេញសេចក្ដីប្រកាសលុបបុណ្យអុំទូកឆ្នាំនេះទៀត ក្រោមហេតុផលកម្ពស់ទឹកមិនអាចអុំទូកបាន។ ក៏ប៉ុន្តែក្រុមអ្នកវិភាគយល់ឃើញថា អ្វីដែលរដ្ឋាភិបាលចេញបម្រាមនេះ គឺជាហេតុផលនយោបាយជាជាងកម្ពស់ទឹកទន្លេមានកម្រិតទាប៕
1 comment:
Prett Hun Sen is always warning to the public who has no arm to fight again with him,but with yuon he put his tail under his stomach as a dog.
Post a Comment