អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិប្រមូលផ្តុំដោយសន្តិវិធី លោក ម៉ៃណា គីអៃ (Maina Kiai) ថ្លែងទៅកាន់អ្នកយកព័ត៌មានក្រោយជំនួបជាមួយមន្ត្រីក្រសួងការបរទេសកម្ពុជា កាលពីថ្ងៃទី៦ ខែកុម្ភៈ ឆ្នាំ២០១៤។
RFA/Yeang Socheametta
អ្នករាយការណ៍ពិសេសរបស់អង្គការសហប្រជាជាតិ (អ.ស.ប) ទទួលបន្ទុកផ្នែកសេរីភាពប្រមូលផ្ដុំដោយសន្តិវិធី និងការបង្កើតសមាគម លោក ម៉ៃណា គីអៃ (Maina Kiai) នឹងធ្វើទស្សនកិច្ចមកប្រទេសកម្ពុជា ចំនួន ២ថ្ងៃ ដោយចាប់ផ្ដើមនៅថ្ងៃទី៧ វិច្ឆិកា។
មន្ត្រីការិយាល័យនៃឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា អ្នកស្រី គ្រីស្ទីន ភីគឃើរីង (Christine Pickering) ថ្លែងនៅថ្ងៃទី៥ វិច្ឆិកា ថា ខាងការិយាល័យនៃឧត្ដមស្នងការ មិនអាចបរិយាយពីដំណើរទស្សនកិច្ចរបស់ លោក ម៉ៃណា គីអៃ ទេ ព្រោះដំណើរទស្សនកិច្ចមកកម្ពុជា លើកនេះជាដំណើរផ្ទាល់ខ្លួនរបស់លោក។
ទោះជាដូច្នេះក្ដី មន្ត្រីអង្គការសិទ្ធិមនុស្សអាដហុក (ADHOC) លោក ណៃ វ៉ង់ដា មានប្រសាសន៍ថា លោកនឹងជួប លោក ម៉ៃណា គីអៃ នៅរសៀលថ្ងៃទី៨ វិច្ឆិកា ទាក់ទងនឹងរឿងសិទ្ធិសេរីភាពប្រមូលផ្ដុំដោយសន្តិវិធី និងការបង្កើតសមាគម៖ «ជួបជាមួយគាត់ ដោយសារគាត់ជាអ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសេរីភាពទាំងបី សេរីបញ្ចេញមតិ ការជួបជុំ និងការបង្កើតសមាគម។ ដល់អ៊ីចឹង នឹងផ្ដោតទៅលើសេរីភាពទាំងបី។ អាចមាននិស្សិតជួបនៅអង្គការ ខនរ៉ាដ ជួបក្រុមនិស្សិត អង្គការសង្គមស៊ីវិលផ្សេងៗ ហើយចំនួនមនុស្សប្រហែលជា ៥០ជាងអីទេ ដោយសារបន្ទប់តូច។ មានការចាត់ចែងផ្សេងទៀត ប៉ុន្តែខ្ញុំបានដឹងច្បាស់តែព័ត៌មានហ្នឹងមួយ»។
កន្លងមក លោក ម៉ៃណា គីអៃ បានលើកពីការព្រួយបារម្ភរបស់លោកចំពោះរាជរដ្ឋាភិបាល អំពីការហាមប្រាមមិនឲ្យពលរដ្ឋប្រមូលផ្ដុំតវ៉ា និងការបង្ក្រាបការប្រមូលផ្ដុំទាំងនោះ និងច្បាប់ស្ដីពីសមាគម និងអង្គការមិនមែនរដ្ឋាភិបាល។ លោកក៏ធ្លាប់ជួបមន្ត្រីរដ្ឋាភិបាល គណបក្សប្រឆាំង អង្គការសង្គមស៊ីវិល និស្សិត ដើម្បីស្វែងយល់ពីសិទ្ធិសេរីភាពទាំងបីនៅកម្ពុជា។
ដំណើរទស្សនកិច្ចរបស់ លោក ម៉ៃណា គីអៃ នៅថ្ងៃទី៧ វិច្ឆិកា គឺជាដំណើរទស្សនកិច្ចលើកទី២ មកកម្ពុជា បន្ទាប់ពីទស្សនកិច្ចសិក្សា និងមិនមែនផ្លូវការរបស់លោកលើកទី១ កាលពីខែកុម្ភៈ ឆ្នាំ២០១៤៕
No comments:
Post a Comment