ដោយ៖ អុិត សូធឿត | ថ្ងៃព្រហស្បតិ៍ ទី24 កញ្ញា 2015,
ស្តាប់សំឡេង៖ | ចម្លងទុក |
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្ម៊ីត (Rhona Smith)ថ្លែងក្នុសន្និសីទសារព័ត៌មាននៅថ្ងៃព្រហស្បតិ៍នេះ (រូបថត៖ ទេព សូនី)
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្ម៊ីត(Rhona Smith)លើកឡើងថា លោកស្រីបានពិភាក្សាជាមួយមន្ត្រីរដ្ឋាភិបាល និងភាគីពាក់ព័ន្ធ ពីតម្រូវការប្រព័ន្ធតុលាការរឹងមាំ និងឯករាជ្យមួយនៅក្នុងប្រទេសកម្ពុជា ដើម្បីធានាពីការការពារសិទ្ធិមនុស្ស។
លោកស្រីបានថ្លែងបែបនេះនៅក្នុងសន្និសីទសារព័ត៌មាននៅរសៀលថ្ងៃព្រហស្បតិ៍នេះ ក្រោយពីបញ្ចប់បេសកកម្មផ្លូវការលើកដំបូងរបស់លោកស្រី។
លោកស្រី រ៉ូណា ស្មីត មានប្រសាសន៍ថា អ្នករាយការណ៍ពិសេសរបស់អង្គការសហប្រជាជាតិមុនៗ បានលើកឡើងពីបញ្ហាឯករាជ្យភាពនៃប្រព័ន្ធតុលាការនៅកម្ពុជា ហើយលោកស្រីក៏បានដឹងផងដែរថា វាជាបញ្ហាសំខាន់មួយ ដោយលោកស្រីបានពិភាក្សាពីបញ្ហានេះជាមួយក្រសួងយុត្តិធម៌ និងអនុទី១នៃរដ្ឋសភានិងជាអនុប្រធានគណបក្សសង្គ្រោះជាតិលោក កឹម សុខាផងដែរ។
លោកស្រីមានប្រសាសន៍ថា៖ "ទាក់ទងជាមួយនឹងប្រព័ន្ធតុលាការ អ្នករាយការណ៍ពិសេសមុនខ្ញុំក៏បានលើកឡើងពីការបារម្ភផងដែរ ហើយក៏ជាបញ្ហាដែលខ្ញុំបានដឹង ហើយគឺជាបញ្ហាដ៏ធំមួយនៅក្នុងរូបភាពជាច្រើន។ យើងបាននិយាយជាមួយក្រសួងយុត្តិធម៌ ហើយកាលពីម្សិលមិញ (ជាមួយលោក កឹម សុខា) គឺយើងបានលើកឡើងពីតម្រូវការបង្កើតឲ្យមានប្រព័ន្ធតុលាការដ៏រឹងមាំ និងឯករាជ្យមួយ ដើម្បីលើកកម្ពស់ និងការពារសិទ្ធិមនុស្សទាំងអស់"។
លោកស្រី រ៉ូណា ស្មីត បានលើកឡើងផងដែរថា លោកស្រីនឹងបន្តការងារដែលបំពេញដោយអ្នករាយការណ៍ពិសេសមុនៗ ដោយប្តេជ្ញាត្រួតពិនិត្យមើលច្បាប់ដែលមានឥទ្ធិពលលើសិទ្ធិមនុស្ស។ លោកស្រីថា នៅសប្ដាហ៍ក្រោយ លោកស្រីនឹងធ្វើសេចក្ដីរាយការណ៍ទៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅក្នុងក្រុងហ្សឺណែវ ប្រទេសស្វ៊ីសពីការងាររបស់លោកស្រី។
អ្នកនាំពាក្យក្រសួងយុត្តិធម៌លោក ជិន ម៉ាលីន មានប្រសាសន៍ថា ការលើកកម្ពស់ឯករាជ្យភាពនៃអំណាចតុលាការជាចំណុចសំខាន់មួយរបស់រដ្ឋាភិបាលក្នុងការកែទម្រង់វិស័យយុត្តិធម៌។ លោកថា រដ្ឋាភិបាលបានធ្វើការងារជាច្រើនដើម្បីលើកកម្ពស់ឯករាជ្យភាពប្រព័ន្ធយុត្តិធម៌។ លោកមានប្រសាសន៍ថា៖ "ការរៀបចំច្បាប់៣ (ស្ដីពីប្រព័ន្ធតុលាការ) របស់យើងហ្នឹង ដែលបានដាក់ឲ្យប្រើប្រាស់កន្លងមកហ្នឹងគឺដើម្បីលើកដម្កើននូវឯករាជ្យភាពអំណាចតុលាការដែរ តាមរយៈការរៀបចំរចនាសម្ព័ន្ធតុលាការឡើងវិញ ការរៀបចំមនុស្សដែលត្រូវធ្វើការនៅតុលាការ របៀបរបបក្នុងការធ្វើការ ហើយនិងយន្តការនៃការត្រួតពិនិត្យតាមដាននូវការពិត ថាតើ មានកំហុសខុសឆ្គងឬក៏មានភាពមិនប្រក្រតី ហើយនិងចំណាត់ការដែលត្រូវចាត់ការនៅពេលដែលមានភាពមិនប្រក្រតី ឬក៏កំហុសខុសឆ្គងកើតឡើងនៅក្នុងវិស័យយុត្តិធម៌នេះ"។
នៅក្នុងខែកញ្ញានេះ វិទ្យាស្ថានសិទ្ធិមនុស្សនៃគណៈមេធាវីអន្តរជាតិ(IBAHRI) ដែលមានមូលដ្ឋាននៅទីក្រុងឡុងដ៍ប្រទេសអង់គ្លេស បានចេញរបាយការណ៍មួយដោយលើកឡើងថា រដ្ឋាភិបាលកម្ពុជាបានដាក់សម្ពាធលើប្រព័ន្ធតុលាការ។ វិទ្យាស្ថាននេះបានផ្តល់អនុសាសន៍ទៅរដ្ឋាភិបាលកម្ពុជានិងក្រសួងយុត្តិធម៌ ឲ្យបញ្ឈប់ជាបន្ទាន់ការដាក់សម្ពាធនយោបាយលើប្រព័ន្ធតុលាការនិងស្នើឲ្យរដ្ឋាភិបាលប្តេជ្ញាធានានិងការពារការបែងចែកអំណាចនៅកម្ពុជា។
គួរបញ្ជាក់ថា លោកស្រី រ៉ូណា ស្ម៊ីត ត្រូវបានតែងតាំងដោយក្រុមប្រឹក្សាសិទ្ធិមនុស្សអង្គការសហប្រជាជាតិក្នុងខែមីនា ឆ្នាំ២០១៥ ដើម្បីជំនួសតំណែងរបស់លោក សុរិយា ប្រាសាទស៊ូប៊ែឌី ក្នុងការធ្វើសេចក្តីរាយការណ៍និងផ្តល់ប្រឹក្សាយោបល់ស្តីពីស្ថានភាពសិទ្ធិមនុស្សនៅកម្ពុជា។ លោកស៊ូប៊ែឌី ធ្លាប់បានផ្តល់ជាអនុសាសន៍ដល់រាជរដ្ឋាភិបាលកម្ពុជាឲ្យបង្កើតគណៈកម្មការឯករាជ្យរបស់នគរបាល សម្រាប់ទទួលពាក្យបណ្តឹងពីប្រជាពលរដ្ឋ ចំពោះមន្ត្រីនគរបាលដែលបានបំពានទៅលើពួកគាត់៕
សរសេរមកលោក អុិត សូធឿត តាមរយៈ sothoeuth@vodhotnews.com
No comments:
Post a Comment