 |
| ជនជាប់ចោទ អៀង ធីរិទ្ធ នៅក្នុងសវនាការបឋមក្នុងសំណុំរឿង ០០២ កាលពីថ្ងៃទី៣០ ខែមិថុនា ឆ្នាំ២០១១។
Photo courtesy of ECCC
|
2015-08-31 rfa
អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងបន្តសវនាការស្ដាប់ការថ្លែងទុក្ខសោករបស់ជនរងគ្រោះ ទាក់ទងនឹងការដ្ឋានការងារដោយបង្ខំចំនួន៣ នៅក្នុងសំណុំរឿង០០២ វគ្គ២។ ទន្ទឹមគ្នានេះ ក៏បញ្ចប់នីតិវិធីប្រឆាំងនឹងជនជាប់ចោទ អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចកម្ពុជាប្រជាធិបតេយ្យ ដែរ។
សាលាក្ដីខ្មែរក្រហម ប្រកាសនៅថ្ងៃច័ន្ទ ទី៣១ សីហា ថា អង្គជំនុំជម្រះសាលាដំបូង សម្រេចរំលត់បណ្ដឹងអាជ្ញា និងបញ្ចប់បណ្ដឹងរដ្ឋប្បវេណីប្រឆាំងជនជាប់ចោទ អៀង ធីរិទ្ធ នៅសាលាក្ដីនេះហើយ។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍បញ្ជាក់ថា អង្គជំនុំជម្រះសាលាដំបូង បានចេញសេចក្ដីសម្រេចបញ្ចប់កិច្ចដំណើរការនីតិវិធីនេះ កាលពីថ្ងៃទី២៧ សីហា យោងតាមលិខិតរបស់ចៅសង្កាត់ក្រុងប៉ៃលិន និងអនុប្រធានមន្ទីរពេទ្យបង្អែកខេត្តប៉ៃលិន ដែលបញ្ជាក់ពីមរណភាពរបស់ អ្នកស្រី អៀង ធីរិទ្ធ៖ «លិខិតបង្ហាញថា អៀង ធីរិទ្ធ បានទទួលមរណភាពនៅខេត្តប៉ៃលិន ប្រទេសកម្ពុជា នៅថ្ងៃទី២២ ខែសីហា ឆ្នាំ២០១៥។ គាត់បានទទួលមរណភាពនៅឯគេហដ្ឋានរបស់គាត់ ដោយសារតែគាំងបេះដូង។ យោងតាមច្បាប់ដែលមានជាធរមាន ដូចជាទីមួយ គឺអនុលោមតាមមាត្រា៧ (១) នៃក្រមនីតិវិធីព្រហ្មទណ្ឌកម្ពុជា គឺមរណភាពរបស់ជនជាប់ចោទ ត្រូវរលត់បណ្ដឹងអាជ្ញាប្រឆាំងនឹងរូបគាត់ ហើយអនុលោមតាមវិធាន ២៣ស្ទួន នៃវិធានផ្ទៃក្នុងរបស់សាលាក្ដីខ្មែរក្រហម មរណភាពជនជាប់ចោទ ក៏បញ្ចប់កិច្ចដំណើរការនីតិវិធីបណ្ដឹងរដ្ឋប្បវេណីផងដែរ នៅអង្គជំនុំជម្រះវិសាមញ្ញក្នុងតុលាការកម្ពុជា។ ដូច្នេះ សំណុំរឿងរបស់គាត់ ត្រូវបានបិទបញ្ចប់ហើយនៅចំពោះមុខអង្គជំនុំជម្រះ»។
កាលពីខែមិថុនា កន្លងទៅ អង្គជំនុំជម្រះសាលាដំបូង បានទទួលរបាយការណ៍ពីអ្នកជំនាញផ្នែកជំងឺមនុស្សចាស់ ដោយបញ្ជាក់ថា ជនជាប់ចោទ អៀង ធីរិទ្ធ មានជំងឺវង្វេងវង្វាន់ស្មារតីកម្រិតធ្ងន់ធ្ងរ។ អ្នកជំនាញសន្និដ្ឋានថា គ្មានការព្យាបាលផ្នែកណាមួយ អាចធ្វើឲ្យស្ថានភាពសតិបញ្ញារបស់ អ្នកស្រី អៀង ធីរិទ្ធ ប្រសើរឡើងវិញបានទេ។ មុនពេលស្លាប់នោះ អ្នកជំនាញថា អ្នកស្រី អៀង ធីរិទ្ធ មិនអាចក្រោកចេញពីគ្រែបាន និងមានជំងឺក្នុងខ្លួនច្រើន។
ស្របពេលដែលបញ្ចប់ករណី អ្នកស្រី អៀង ធីរិទ្ធ អង្គជំនុំជម្រះសាលាដំបូង ក៏នឹងបន្តធ្វើសវនាការនៅថ្ងៃអង្គារ ទី១ ខែកញ្ញា ដោយស្ដាប់ការថ្លែងទុក្ខសោករបស់ជនរងគ្រោះ ទាក់ទងនឹងអង្គហេតុការដ្ឋានការងារដោយបង្ខំ ៣កន្លែង គឺការដ្ឋានធ្វើទំនប់ ១មករា ខេត្តកំពង់ធំ ការដ្ឋានវាលយន្តហោះកំពង់ឆ្នាំង និងការដ្ឋានទំនប់អាងត្រពាំងថ្ម ខេត្តបន្ទាយមានជ័យ។ សវនាការនេះ គឺធ្វើឡើងក្នុងពេលដែលអង្គជំនុំជម្រះ មិនទាន់បានចេញសេចក្ដីសម្រេចលើភាពចម្រូងចម្រាសរវាងភាគីសហព្រះរាជអាជ្ញា និងភាគីក្រុមមេធាវីការពារក្ដីជនជាប់ចោទនៅឡើយ។
កាលពីថ្ងៃទី២៦ សីហា ក្រុមមេធាវីការពារក្ដីជនជាប់ចោទ ធ្វើពហិការដើរចេញពីអង្គសវនាការដាក់បង្ហាញឯកសារគន្លឹះ ទាក់ទងនឹងអង្គហេតុការដ្ឋានការងារដោយបង្ខំនៅខេត្តកំពង់ធំ កំពង់ឆ្នាំង និងខេត្តបន្ទាយមានជ័យ។ ពហិការនេះ គឺក្រុមមេធាវីការពារក្ដីជនជាប់ចោទ ជំទាស់នឹងសហព្រះរាជអាជ្ញា ដែលដាក់ឯកសារកំណត់ហេតុស្ដាប់សាក្សីមួយចំនួនដែលស្លាប់ហើយ។ ម្យ៉ាងទៀត ឯកសារទាំងនោះមានបរិមាណច្រើនពេក មិនធ្លាប់មានក្នុងការជំនុំជម្រះកន្លងមក ហើយភាគីខ្លួនមិនមានលទ្ធភាពពិនិត្យទាន់ពេល។ ឯកសារទាំងនោះ សុទ្ធតែដកយកមកពីសំណុំរឿង០០៣ និង ០០៤។
អង្គជំនុំជម្រះយល់ឃើញថា មូលហេតុនៃពហិការ គឺមកពីការមិនយល់គ្នារឿងដាក់ឯកសារគន្លឹះនោះ។ បន្ទាប់ពីទុកពេលឲ្យភាគីមួយរយៈ អង្គជំនុំជម្រះគ្រោងធ្វើសវនាការស្ដាប់ការដាក់បង្ហាញឯកសារគន្លឹះបន្តទៀត នៅថ្ងៃទី៣ ទី៤ និងទី៧ ខែកញ្ញា។ លោក នេត្រ ភក្ដ្រា រំពឹងថា នៅថ្ងៃនោះនឹងមានសេចក្ដីសម្រេចលើភាពចម្រូងចម្រាសរបស់ភាគី៖ «យើងមិនទាន់អាចព្យាករថាយ៉ាងម៉េចទេ យើងរង់ចាំមើលការអញ្ជើញមកដល់ ហើយយើងរំពឹងថា ភាគីពាក់ព័ន្ធនានានឹងមិនធ្វើពហិការដូចថ្ងៃកន្លងទៅ ដែលធ្វើឲ្យដំណើរការសវនាការអាក់ខាន ដោយសារតែពហិការរបស់ភាគីពាក់ព័ន្ធទេ ហើយយើងសង្ឃឹមថា នឹងអាចមានដំណោះស្រាយមួយ ដើម្បីធ្វើម៉េចឲ្យដំណើរការនៃការជំនុំជម្រះក្ដីលើសំណុំរឿង០០២ វគ្គ២ នេះ ប្រព្រឹត្តទៅដោយរលូន»។
សវនាការនៅថ្ងៃទី១ ខែកញ្ញា អង្គជំនុំជម្រះសាលាដំបូង នឹងស្ដាប់ការថ្លែងទុក្ខសោករបស់ជនរងគ្រោះ ទាក់ទងនឹងអង្គហេតុការដ្ឋានការងារដោយបង្ខំទាំង៣ ដែលស្ថិតនៅក្នុងសំណុំរឿង ០០២ វគ្គ២ ប្រឆាំងនឹងជនជាប់ចោទ នួន ជា និង ខៀវ សំផន។ សវនាការស្ដាប់ការថ្លែងទុក្ខសោករបស់ជនរងគ្រោះ នឹងបន្តរហូតដល់ថ្ងៃទី២ ខែកញ្ញា៕
No comments:
Post a Comment