ដោយ សេក បណ្ឌិត
2015-08-27 rfa
 |
កម្លាំងអាជ្ញាធរខេត្តកោះកុង ដាក់របាំងមិនឲ្យពលរដ្ឋដើរឆ្លងកាត់ ឬតវ៉ាមុខតុលាការ ខណៈពួកគេប្រមូលផ្ដុំគ្នាតវ៉ាទាមទារដោះលែងសកម្មជនបរិស្ថាន ៣នាក់ នៅថ្ងៃទី២១ សីហា ឆ្នាំ២០១៥។
|
ប្រជាពលរដ្ឋដែលមានជម្លោះដីធ្លី និងសកម្មជនបរិស្ថានមកពីបណ្ដាស្រុកមួយចំនួនក្នុងខេត្តកោះកុង នៅតែបន្តស្នាក់នៅក្នុងបរិវេណមណ្ឌលកីឡាខេត្ត ដើម្បីតស៊ូមតិទាមទារឲ្យតុលាការដោះលែងយុវជននៃអង្គការមាតាធម្មជាតិ ៣នាក់ ឲ្យមានសេរីភាពវិញ។ ការតវ៉ានេះ ត្រូវអាជ្ញាធររារាំង និងគំរាមកំហែងជាបន្តបន្ទាប់ ដោយលើហេតុផលថា ពួកគាត់ធ្វើឲ្យខូចសណ្ដាប់ធ្នាប់សាធារណៈ។
ការតវ៉ាដោយដើរដង្ហែក្បួនលើកបដាក្នុងក្រុងខេមរភូមិន្ទ ខេត្តកោះកុង នៅថ្ងៃទី២៧ ខែសីហា ត្រូវសមត្ថកិច្ចបង្ក្រាបនៅម្ដុំខាងកើតឆៀងខាងត្បូងផ្សារដងទង់។
ប្រជាសហគមន៍ដែលមានជម្លោះដីធ្លីមកពីស្រុកស្រែអំបិល ខេត្តកោះកុង បានឲ្យដឹងថា អ្នកភូមិប្រមាណជាង ៣០នាក់ បានដើរជាក្បួនទាមទារឲ្យដោះលែងយុវជនដែលជាសកម្មជនបរិស្ថានមកវិញ ប៉ុន្តែសមត្ថកិច្ចប៉េអិម (PM) មានចំនួនច្រើនជាងពលរដ្ឋជិតពាក់កណ្ដាល មករារាំង និងគំរាមកំហែងរកចាប់ខ្លួនអ្នកដែលសកម្មក្នុងការវ៉ានោះ៖ «»។
លោកស្រីបន្តថា ទោះយ៉ាងណា ការបង្ក្រាបនោះមិនបានជោគជ័យទេ ដោយសារប្រជាពលរដ្ឋមិនដកថយ ហើយសុខចិត្តស្រាក់ដៃគ្នាក្រាបចុះទៅនឹងដី ដោយមានអ្នកផ្សារចោមរោមមើលច្រើនផង សមត្ថកិច្ចក៏ដកថយវិញ ហើយប្រើវិធីលួងលោមឲ្យពលរដ្ឋទៅសម្រាកនៅតារាងបាល់វិញដោយសន្តិវិធី។ ប៉ុន្តែពួកគាត់មិនស្តាប់តាមអាជ្ញាធរឡើយ ដោយនៅតែបន្តដើរជាក្បួនកាត់មុខតុលាការ និងទីប្រជុំជនមួយចំនួនទៀតក្នុងខេត្ត។
ចំណែកអភិបាលរងក្រុងខេមរភូមិន្ទ លោក ប៉ែន ប៉ុនឈួយ បដិសេធថា ពុំមានការបង្ក្រាបដោយប្រើហិង្សានោះទេ គឺសមត្ថកិច្ចគ្រាន់តែណែនាំឲ្យពលរដ្ឋតវ៉ានៅមួយកន្លែង ដោយអាជ្ញាធរមិនចង់ឲ្យដើរជាក្បួនដែលនាំឲ្យរំខានដល់អ្នកដទៃ ខូចសណ្ដាប់ធ្នាប់សាធារណៈ ឬអាចនាំឲ្យមានគ្រោះថ្នាក់ដោយប្រការណាមួយ៖ «»។
ទោះបែបនេះក្តី មន្ត្រីសិទ្ធិមនុស្សនៃអង្គការលីកាដូ ប្រចាំខេត្តកោះកុង លោក ហួ អ៊ីន បានរិះគន់អាជ្ញាធរដែលប្រើកម្លាំងសមត្ថកិច្ចច្រើនហួសហេតុពីចំនួនប្រជាពលរដ្ឋអ្នកតវ៉ានោះជារូបភាពអាក្រក់មួយ និងជាការរំលោភដល់សិទ្ធិសេរីភាពបញ្ចេញមតិរបស់ប្រជាពលរដ្ឋ៖ «»។
តំណាងអ្នកភូមិចំនួន ៥ស្រុក នៃខេត្តកោះកុង មានស្រុកបុទុមសាគរ ស្រុកគីរីសាគរ ស្រុកកោះកុង ស្រុកថ្មបាំង និងស្រុកស្រែអំបិល បានបន្តប្រមូលផ្ដុំស្នាក់នៅ និងដើរហែក្បួនលើកបដាតវ៉ាទាមទារឲ្យតុលាការដោះលែងយុវជនការពារបរិស្ថានទាំង ៣នាក់នេះ អស់រយៈពេល ១០ថ្ងៃមកហើយ។
អាជ្ញាធរក្រុងខេមរភូមិន្ទបានចេញសេចក្ដីជូនដំណឹងពីលើកមកហើយ ដោយអំពាវនាវឲ្យប្រជាពលរដ្ឋត្រឡប់ទៅលំនៅឋានវិញ និងបានដាក់លក្ខខណ្ឌចំនួន ៥ចំណុច ឲ្យប្រជាពលរដ្ឋអនុវត្ត។ ខ្លឹមសារ ៥ចំណុច ក្នុងលិខិតនោះ បានតម្រូវឲ្យពលរដ្ឋធ្វើសកម្មភាពឲ្យស្របតាមច្បាប់។ រាល់ការដើរហែក្បួន ឬប្រមូលផ្តុំណាមួយ ត្រូវធ្វើលិខិតសុំការអនុញ្ញាតច្បាប់ពីអាជ្ញាធរជាមុនយ៉ាងតិច ២ថ្ងៃ។ ហាមការចងតង់ដាំបាយ ឬធ្វើម្ហូបអាហារផ្សេងៗនៅទីកន្លែងស្នាក់នៅ។ ត្រូវប្រមូលផ្តុំគ្នានៅក្នុងវេទិកាបាល់ទាត់ខេត្តនេះទៅតាមការកំណត់របស់អាជ្ញាធរ និងត្រូវរំសាយការប្រមូលផ្ដុំចាប់ពីថ្ងៃជូនដំណឹងនេះ។ ប៉ុន្តែប្រជាពលរដ្ឋមិនទទួលយកសេចក្ដីជូនដំណឹងនេះទេ ដរាបណាតុលាការមិនដោះលែងយុវជនទាំង ៣នាក់នោះទេ៕
No comments:
Post a Comment