 |
និស្សិតពេទ្យនៃវិទ្យាស្ថានវិទ្យាសាស្ត្រអន្តរជាតិ តវ៉ានៅមុខសាលា ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ កាលពីខែវិច្ឆិកា ឆ្នាំ២០១៤។
|
ដោយ ម៉ម មុនីរតន៍
2015-04-28 RFA
ក្រុមនិស្សិតពេទ្យនៃវិទ្យាស្ថានវិទ្យាសាស្ត្រអន្តរជាតិ ១៣០នាក់ ព្រមានធ្វើបាតុកម្មនៅដើមខែឧសភា ខាងនេះ ដើម្បីជំរុញឲ្យក្រសួងអប់រំ និងក្រសួងសុខាភិបាល ចាត់វិធានការចំពោះសាលាពេទ្យឯកជន ដែលក្រុមនិស្សិតចាត់ទុកថា កំពុងធ្វើនំអត់ម្សៅ។
តំណាងនិស្សិតពេទ្យដែលអះអាងថា ពួកគេ គឺជាអ្នករងគ្រោះដោយសារម្ចាស់សាលាបោកប្រាស់ ប្រកាសថានឹងធ្វើបាតុកម្មប្រឆាំងគោលការណ៍របស់សាលា ដែលបន្តឆបោកនិស្សិតអស់ពេល ៣ឆ្នាំកន្លងទៅហើយនោះ។
លោក ថន រដ្ឋា ដែលអះអាងថាជាតំណាងឲ្យក្រុមនិស្សិតពេទ្យនៃវិទ្យាស្ថានវិទ្យាសាស្ត្រអន្តរជាតិ ប្រមាណ ១៣០នាក់ ឲ្យដឹងកាលពីថ្ងៃទី២៨ មេសា ថា លោកនឹងដឹកនាំក្រុមនិស្សិតធ្វើយុទ្ធនាការនៅខាងមុខក្រសួងអប់រំ យុវជន និងកីឡា នៅថ្ងៃទី៤ ខែឧសភា ខាងមុខនេះ។ លោកបន្តថា បាតុកម្មគ្រោងនឹងរៀបចំដែលមានពេលមិនដល់មួយសប្ដាហ៍ទៀតផងនោះ គឺស្នើសុំឲ្យរដ្ឋមន្ត្រីក្រសួងអប់រំ ជួយអន្តរាគមន៍ទៅម្ចាស់សាលា ត្រូវចេញមុខទទួលខុសត្រូវរាល់ថ្លៃសិក្សា ចេញវិញ្ញាបនបត្រ និងបើមិនអាចដំណើរការទៅមុខបានទេ គឺអាចឲ្យនិស្សិតទាំងអស់មានសិទ្ធិទទួលបានការអប់រំលើជំនាញវិទ្យាសាស្ត្រនៅសាលាផ្សេងបាន។
លោក ថន រដ្ឋា បន្តថា «ធ្វើហ្នឹងក្នុងគោលបំណង ៣ចំណុច។ ទីមួយ គឺទាមទារឲ្យក្រសួងអប់រំ យុវជន និងកីឡា និងក្រសួងសុខាភិបាល ចុះឈ្មោះនិស្សិតដែលបណ្តុះបណ្តាលនៅវិទ្យាស្ថានវិទ្យាសាស្ត្រអន្តរជាតិ ចូលទៅក្នុងគល់បញ្ជីថាបានរៀនផ្នែកពេទ្យដូចគេដូចឯងមែន។ ចំណុចទីពីរ គឺចង់ឲ្យផ្ទេរពួកខ្ញុំទៅរៀននៅសាលាផ្សេងៗទៀត នៅឆ្នាំទី៣ ដោយឥតគិតថ្លៃ ហើយចំណុចទីបី ចង់ឲ្យក្រសួងគាត់ចុះទៅត្រួតពិនិត្យសាលាហ្នឹង ទាក់ទងថាសាលាបើកឥតមានអាជ្ញាប័ណ្ណ»។
បើដូចអ្វីដែល ថន រដ្ឋា លើកឡើងមែន គឺនិស្សិតដែលរៀននៅវិទ្យាស្ថានវិទ្យាសាស្ត្រអន្តរជាតិនេះ បង់ថ្លៃសិក្សាចាប់ពីថ្នាក់មូលដ្ឋានរហូតបញ្ចប់ឆ្នាំសិក្សា ចន្លោះពី ៥០០ដុល្លារ ដល់ ៧៥០ដុល្លារក្នុងមួយឆ្នាំ។
វិទ្យុអាស៊ីសេរី ពុំអាចសុំការបំភ្លឺបានភ្លាមៗទេពី លោក ហាក់ ចន្នី ម្ចាស់វិទ្យាស្ថានវិទ្យាសាស្ត្រអន្តរជាតិ នៅថ្ងៃទី២៨ មេសា។
បើទោះជាបែបណា លោក រស់ សាលីន មន្ត្រីនាំពាក្យក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ ធ្លាប់ទទួលបានពាក្យបណ្ដឹងរួចហើយរបស់ក្រុមនិស្សិតពេទ្យទាំងនេះ។ លោកបន្តថា រហូតមកពេលនេះ ស្ថាប័នទាំងពីរ គឺក្រសួងសុខាភិបាល និងក្រសួងអប់រំ កំពុងពិនិត្យ និងរកលទ្ធផលធ្វើយ៉ាងណាអាចឲ្យនិស្សិតទាំងអស់មានឱកាស ក្នុងការសិក្សាលើមុខជំនាញបន្តទៀត។ លោកបន្តថា «ក្រសួងទាំងពីរនេះកំពុងតែធ្វើការជាមួយគ្នាច្បាស់លាស់ណាស់ គឺថាក្នុងក្របខ័ណ្ឌបច្ចេកទេស អាចឲ្យមានការប្រឡងធ្វើតេស្តឡើងវិញ ហើយអាចរកលទ្ធភាពឲ្យសិស្សទាំងនោះចូលរៀនបានតាមរូបភាពបង់ថ្លៃ ឬរូបភាពមិនបង់ថ្លៃ។ យើងកំពុងធ្វើការជាមួយ ដើម្បីរកច្រកលទ្ធភាពណាមួយដោះស្រាយបញ្ហានេះ ដើម្បីជូនទៅដល់និស្សិត»។
លោក រស់ សាលីន ឲ្យដឹងទៀតថា វិទ្យាស្ថានដែលបើកលើជំនាញសុខាភិបាលនេះ គឺពិតជារកពុំឃើញថា មានលិខិតអនុញ្ញាតត្រឹមត្រូវឡើយ។ លើសនេះទៀត ក្រសួងអប់រំ ក៏បានចេញលិខិតព្រមានរួចមកហើយឲ្យផ្អាកសកម្មភាពបណ្តុះបណ្តាលសិស្ស លើមុខជំនាញពេទ្យនេះ។
ដោយឡែកប្រធានស្តីទីនៃសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី យល់ឃើញថា ភាពខ្វះចន្លោះនៃការគ្រប់គ្រងនេះ គឺជាកំហុសមួយដ៏ធំរបស់រដ្ឋាភិបាល។ ជាងនេះទៀត អ្នកស្រីថ្លែងថា ដោយសាររដ្ឋាភិបាលមិនមានការផ្តល់អំណាច និងសិទ្ធិសម្រេចចិត្តឲ្យស្ថាប័នដែលជាក្រសួងសាមី ទើបបញ្ហានៅតែបន្តកើតឡើងដូចនេះ។ អ្នកស្រី អ៊ុក ឆាយ៉ាវី ចាត់ទុកថា ប្រសិនរដ្ឋាភិបាលនៅតែមានភាពយឺតយ៉ាវ ក្នុងការធ្វើកំណែទម្រង់រដ្ឋជុំវិញការផ្ទេរសិទ្ធិអំណាចនេះ វានឹងនៅតែជាការប្រឈមចំពោះមុខដ៏ធ្ងន់ធ្ងរបន្តទៀត ជាពិសេស វានឹងជំរុញឲ្យសេវាសាធារណៈរបស់រដ្ឋកាន់តែបន្តចុះខ្សោយបន្ថែមទៀតនៅថ្ងៃខាងមុខ។ អ្នកស្រីបន្តថា «តាមពិតទៅក្នុងការដែលឃ្លាំមើល មិនថាឡើយតែក្រសួងសុខាភិបាលទេ គ្រប់វិស័យ គឺធ្លាក់ទៅលើតែរដ្ឋាភិបាលតែមួយទេ ជាអ្នកដែលធ្វើឲ្យធ្លាក់ទៅក្នុងមហន្តរាយដ៏ធំធេងនេះ»។
បើទោះជាបែបណាក៏ដោយ លោក រស់ សាលីន អំពាវនាវដល់សិស្សនិស្សិតដែលចង់បន្តនៅថ្នាក់ឧត្តមសិក្សា ត្រូវត្រួតពិនិត្យ និងថ្លឹងថ្លែងឲ្យបានល្អិតល្អន់ជាមុន ដើម្បីចៀសវាងកុំឲ្យមានបញ្ហាកើតឡើងក្រោយធ្វើសេចក្តីសម្រេចចិត្តរួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
No comments:
Post a Comment