ដោយ៖ ញឹម គឹមសាន | ថ្ងៃព្រហស្បតិ៍ ទី12 កុម្ភៈ 2015 |
លោក ស ខេង រដ្ឋមន្ត្រីក្រសួងមហាផ្ទៃ
រដ្ឋមន្ត្រីក្រសួងមហាផ្ទៃ លោក ស ខេង នឹងបំពេញទស្សនកិច្ចផ្លូវការនៅប្រទេសជប៉ុន រយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែកុម្ភៈខាងមុខនេះ ។
គេហទំព័រអគ្គស្នងការនគរបាលជាតិចុះថ្ងៃទី១១ ខែកុម្ភៈនេះបានឲ្យដឹងថា ក្រោយពីជំនួបពិភាក្សាការងាររវាងលោក ស ខេង និងឯកអគ្គរាជទូតជប៉ុនប្រចាំនៅកម្ពុជាលោក កុមា មារុ យូជិ នាថ្ងៃទី១១ ខែកុម្ភៈ លោក ស ខេង មានប្រសាសន៍ថា ដំណើរទស្សនកិច្ចនេះរបស់លោកនោះ គឺមានសារៈសំខាន់ដល់ប្រទេសកម្ពុជា សម្រាប់តួនាទី និងកាតព្វកិច្ចក្នុងនាមជាថ្នាក់ដឹកនាំក្រសួងមហាផ្ទៃ ក្នុងការគ្រប់គ្រងរដ្ឋបាលដែនដី ក៏ដូចជាការគ្រប់គ្រងសន្តិសុខ សណ្តាប់ធ្នាប់សាធារណៈនៅក្នុងប្រទេស ។
គេហទំព័រដដែលបន្តថាលោក ស ខេង នឹងចូលជួបពិភាក្សាជាមួយថ្នាក់ដឹកនាំសំខាន់ៗក្នុងជួររាជរដ្ឋាភិបាលជប៉ុន ក្នុងនោះរួមមានថ្នាក់ដឹកនាំនគរបាលជប៉ុន ជួបរដ្ឋមន្ត្រីក្រសួងការបរទេសជប៉ុន ជួបប្រធានអង្គការចៃការនៅប្រទេសជប៉ុន ដែលកន្លងមកស្ថាប័នមួយនេះបានធ្វើជាភ្នាក់ងារផ្តល់ជំនួយសម្រាប់ការអភិវឌ្ឍនៅកម្ពុជាស្ទើរគ្រប់វិស័យ និងចូលរួមក្នុងកិច្ចប្រជុំវេទិកាដើម្បីលើកកម្ពស់កិច្ចសហប្រតិបត្តិការវិស័យឯកជន និងសាធារណៈនៅក្នុងតំបន់ទន្លេមេគង្គ រួចហើយលោក ស ខេង នឹងឡើងថ្លែងសុន្ទរកថានៅក្នុងវេទិកានោះតំណាងឲ្យប្រទេសកម្ពុជាផងដែរ ៕
សូមសរសេរមកលោក ញឹម គឹមសាន តាមរយៈ nhimkimsan2012@gmail.com
No comments:
Post a Comment