លោកនាយករដ្ឋមន្រ្តី ហ៊ុន សែន បានថ្លែងកាលពីម្សិលមិញ ទៅកាន់និស្សិតបញ្ចប់ការសិក្សា ពីសាកលវិទ្យាល័យភូមិន្ទភ្នំពេញ នៅឯមជ្ឈមណ្ឌលពិព័រណ៍កោះពេជ្រ។ ផា លីណា
ភ្នំពេញៈ លោកនាយករដ្ឋមន្រ្តី ហ៊ុន សែន បានថ្លែងកាលពីម្សិលមិញថា រដ្ឋាភិបាលកម្ពុជានឹងធ្វើការជាមួយរដ្ឋាភិបាលយោធា ថៃ ដែលបានឡើងកាន់អំណាចដោយរដ្ឋប្រហារមួយកាលពីសប្តាហ៍មុន ហើយបានទាត់ចោលនូវការលើកឡើងដែលថា ក្រុមលោក ថាក់ស៊ីន ស៊ីណាវ៉ាត្រា ដែលត្រូវបានបណ្តេញចេញពីតំណែងអាចត្រូវបានអនុញ្ញាតឲ្យបង្កើតរដ្ឋាភិបាលនិរទេសនៅក្នុង ប្រទេសកម្ពុជា។
ក្នុងសុន្ទរកថាទៅកាន់និស្សិតបញ្ចប់ការសិក្សាប្រហែល ៣ ពាន់នាក់ ពីសាកលវិទ្យាល័យភូមិន្ទភ្នំពេញ នៅឯមជ្ឈមណ្ឌលពិព័រណ៍កោះពេជ្រ លោក ហ៊ុន សែន បានគូសបញ្ជាក់ថា រដ្ឋធម្មនុញ្ញកម្ពុជានិងសមាជិកភាពរបស់កម្ពុជាក្នុងអាស៊ានបានរារាំងកម្ពុជាមិនឲ្យជ្រៀតជ្រែកកិច្ចការផ្ទៃក្នុង របស់ប្រទេសនៅក្នុងតំបន់ទេ។
លោកបានថ្លែងទៀតថា៖ «កម្ពុជា បានពិចារណាពីស្ថានការណ៍នៅថៃដែលជាកិច្ចការផ្ទៃក្នុងរបស់ថៃ ហើយកម្ពុជានឹងមិនជ្រៀតជ្រែកក្នុងកិច្ចការផ្ទៃក្នុងរបស់ថៃទេ។ ឥឡូវនេះ រដ្ឋាភិបាលយោធាត្រូវបានអនុម័តដោយស្តេចថៃ ហើយខ្ញុំសង្ឃឹមថា លោក ថាក់ស៊ីន និងលោកស្រី យីងឡាក់ អតីតនាយករដ្ឋមន្រ្តីថៃ...នឹងយល់ពីជំហររបស់កម្ពុជា»។
យោធាថៃ បានធ្វើរដ្ឋប្រហារ បន្ទាប់ពីមានភាពជាប់គាំងនយោបាយនិងការតវ៉ាដោយប្រើអំពើហិង្សានៅតាមដងវិថីក្នុង ក្រុងបាងកក ដែលបានសម្លាប់មនុស្សយ៉ាងហោចណាស់ ២៨ នាក់។
ការថ្លែងរបស់លោក ហ៊ុន សែន បានធ្វើឡើងក្នុងរយៈពេលប៉ុន្មានថ្ងៃបន្ទាប់ពីមានសេចក្តីថ្លែងការណ៍ពីលោក Robert Amsterdam មេធាវីរបស់លោក ថាក់ស៊ីន ដែលថា «រដ្ឋាភិបាលបរទេសជាច្រើនបានសម្តែងនូវបំណងទទួលរដ្ឋាភិបាលនិរទេសក្រោមវិធាន និងទម្លាប់អនុវត្តអន្តរជាតិ» ជាហេតុបណ្តាលឲ្យមានការសង្ស័យថា លោក ថាក់ស៊ីន បានមកទាក់ទងប្រទេសកម្ពុជា។
ខណៈមន្រ្តីជាន់ខ្ពស់រដ្ឋាភិបាលពីរនាក់ បានថ្លែងកាលពីដើមសប្តាហ៍នេះថា កម្ពុជា មិនអនុញ្ញាតឲ្យមានរដ្ឋាភិបាលនិរទេសក្នុងទឹកដីរបស់ខ្លួនលោក ជាម យៀប តំណាងរាស្រ្តគណបក្សប្រជាជនកាលពីថ្ងៃអាទិត្យ បានប្រាប់ ភ្នំពេញ ប៉ុស្តិ៍ ថា បើទោះបីជារដ្ឋធម្មនុញ្ញហាមឃាត់ក៏ដោយ ក៏ប៉ុន្តែសេចក្តីសម្រេចចុងក្រោយគឺស្ថិតនៅលើលោក ហ៊ុន សែន។
ប៉ុន្តែ កាលពីម្សិលមិញ លោក ហ៊ុន សែន បានថ្លែងថា បើទោះបីជាលោកមានទំនាក់ទំនងផ្ទាល់នឹងលោក ថាក់ស៊ីន យ៉ាងណាក៏ដោយ ក៏ប៉ុន្តែ ការទទួលរដ្ឋាភិបាលនិរទេសគឺមិនស្របនឹងរដ្ឋធម្មនុញ្ញទេ។ លោក ហ៊ុន សែន បានទទួលស្វាគមន៍លោក ថាក់ស៊ីន កាលពី ឆ្នាំ២០០៩ ក្នុងឋានៈជាទីប្រឹក្សាសេដ្ឋកិច្ចដែលជាហេតុបណ្តាលឲ្យមានវិវាទការទូតជាមួយនឹង ប្រទេសថៃ។
លោក ហ៊ុន សែន បញ្ជាក់ថា៖ «ខ្ញុំសូមសង្កត់ធ្ងន់ថា កម្ពុជា មិនមែនជាកន្លែងសម្រាប់ប្រទេស ឬក្រុមណាមួយទោះបីក្រុមលោក ថាក់ស៊ីន ក៏ដោយដើម្បីបង្កើតរដ្ឋាភិបាលនិរទេសឡើយ។ រដ្ឋធម្មនុញ្ញកម្ពុជាមិនអនុញ្ញាតឲ្យជនបរទេសប្រើប្រាស់ទឹកដី របស់ខ្លួនជាមូលដ្ឋានបង្កើតកម្លាំងប្រដាប់អាវុធដើម្បីវាយប្រហារលើប្រទេសមួយទៀតឡើយ»។
លោកបានបន្ថែមថា ខណៈដែល កម្ពុជា មានព្រំដែនជាប់ជាមួយនឹង ថៃ វាជាការសំខាន់ត្រូវបន្តរក្សាទំនាក់ទំនង និងកិច្ចសហប្រតិបតិ្តការបើទោះបីជាយោធាឡើងកាន់អំណាចក៏ដោយ។
លោកបានបន្ថែមថា៖ «គ្មានជម្រើសផ្សេងទៀតទេ ព្រោះ ថៃ មានរដ្ឋាភិបាលយោធា ឥឡូវនេះដូច្នេះ ចៀសមិនរួចទេ យើងត្រូវតែធ្វើការជាមួយនឹងរដ្ឋាភិបាលយោធា»។
ឥស្សរជនប្រឆាំងសកម្មជនអ្នកសិក្សាស្រាវជ្រាវ និងអ្នកសារព័ត៌មានជាង ១០០ នាក់ត្រូវបានកោះឲ្យបង្ហាញខ្លួននៅទីបញ្ជាការកងទ័ពនៅ ក្រុងបាងកក ចាប់តាំងពីមានការធ្វើរដ្ឋប្រហារ។ មនុស្សជាច្រើននាក់ ដែលបានទៅកន្លែងកងទ័ពដោយស្ម័គ្រចិត្តត្រូវបានចាប់ឃុំខ្លួន។ អ្នកវិភាគបានស្វាគមន៍ចំពោះការអត្ថាធិប្បាយរបស់លោកនាយករដ្ឋមន្រ្តី។
លោក កែម ឡី អ្នកសិក្សាស្រាវជ្រាវ ថ្លែងថា ការអនុញ្ញាតឲ្យរដ្ឋាភិបាលនិរទេសបង្កើតនៅក្នុង ប្រទេសកម្ពុជា នឹងមិនស្របរដ្ឋធម្មនុញ្ញទេ។
លោកបន្ថែមថា៖ «ខ្ញុំស្វាគមន៍ចំពោះសុន្ទរកថានេះ។ រដ្ឋធម្មនុញ្ញកម្ពុជា ចែងច្បាស់ថា កម្ពុជា ជាប្រទេសឯករាជ្យ អព្យាក្រឹត និងមានអធិបតេយ្យ។ រដ្ឋធម្មនុញ្ញមិនអនុញ្ញាតឲ្យក្រុមឬប្រទេសណា សហការប្រឆាំងនឹងប្រទេសមួយទៀតឡើយ។ ក្នុងធម្មនុញ្ញអាស៊ាន ប្រកាសច្បាស់ថា ប្រទេសមួយមិនជ្រៀតជ្រែកក្នុងកិច្ចការនយោបាយ និងផ្ទៃក្នុងរបស់រដ្ឋសមាជិកទេ»។
លោកលើកឡើងថា៖ «យើងដឹងថា សម្តេច សីហនុ ទទួលបរាជ័យ ដោយសារតែសម្តេចប្រយុទ្ធនឹង វៀតណាម ខាងត្បូងហើយយើងបានរៀនសូត្រពីប្រវតិ្តសាស្រ្តដ៏ជូរចត់នេះ។ ឥឡូវនេះប្រជាជនកម្ពុជាព្រួយបារម្ភអំពីភាពតានតឹងរវាងចិន និងវៀតណាម»។
លោកស្រី ជា វណ្ណាត អ្នកវិភាគនយោបាយ បានយល់ស្របដូចសម្តីរបស់លោក កែម ឡី ដែរ។ លោកស្រីថ្លែងថា៖ «វាជាជំហរល្អប្រសើរសម្រាប់រដ្ឋាភិបាល ដូច្នេះកម្ពុជានឹងមិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃឡើយ។ កម្ពុជាអាចរក្សាស្ថិរភាពនយោបាយហើយអាចជួយដល់ការអភិវឌ្ឍជាតិ៕ TK
1 comment:
ah kibanh yor me kbat cheat pelna khnom kheuhn muk vear khnom chang te che var
Post a Comment