By Thmey Thmey
(អត្ថបទចុះផ្សាយនៅថ្ងៃ 
03-01-2014, 
11:29 pm) | ដោយ លាង ដឺលុច
03-01-2014, 11:29 pm) | ដោយ លាង ដឺលុច ប្រតិកម្ម ពីបរទេសបានធ្លាក់ចុះមកជាបន្តបន្ទាប់ ដើម្បីសម្តែងការសោកស្តាយ និងថ្កោលទោសការប្រើហិង្សាពីសំណាក់សមត្ថកិច្ចកម្ពុជា ទៅលើក្រុមអ្នកបាតុករអ្នកតវ៉ា។ ភ្នាក់ងាររបស់អង្គការសហប្រជាជាតិទាំងអស់បានប្រតិកម្មយ៉ាងខ្លាំង ប្រឆាំងនឹងការប្រើហិង្សារបស់កងកម្លាំងប្រដាប់អាវុធទៅក្រុមបាតុករ ដែលបានបណ្តាលអោយមានមនុស្សស្លាប់ និងរបួសជាច្រើននាក់ក្នុងរយៈពេល២ថ្ងៃចុងក្រោយនេះ។
អង្គការសហប្រជាជាតិប្រចាំកម្ពុជាបានបញ្ចេញប្រតិកម្មខ្លាំងៗ ជាមួយនឹងការថ្លែងថ្កោលទោសទៀតផង។ «យើងជំរុញអោយភាគីទាំងអស់អត់ធ្មត់ជាអតិបរមា។ យើងថ្កោលទោសការប្រើប្រាស់គ្រាប់កាំភ្លើងពិត បាញ់ទៅលើកម្មករ និងអ្នកតវ៉ាក្នុងទ្រង់ទ្រាយខ្លាំងបំផុត ក៏ដូចជាការប្រើប្រាស់ហិង្សាដោយសមត្ថកិច្ចខ្លះនៅពេលមានការតវ៉ានោះ»។
សេចក្តីថ្លែងការណ៍ក្នុងនាមការិយាល័យអង្គការសហប្រជាជាតិទាំងអស់នៅ កម្ពុជានេះ ត្រូវបានធ្វើឡើងដោយអ្នកសម្របសម្រួលរបស់អង្គការសហប្រជាជាតិប្រចាំ កម្ពុជា។
មន្ត្រីតំណាងអង្គការសហប្រជាជាតិក៏បានបន្តអំពាវនាវអោយរដ្ឋាភិបាល កម្ពុជា ចាប់ខ្លួនជនបង្កហិង្សាយកទៅកាត់ទោសទៅតាមច្បាប់ផងដែរ។ «យើងសូមអំពាវនាវដល់អាជ្ញាធរអោយបញ្ឈប់ការប្រើប្រាស់គ្រាប់កាំភ្លើង ពិតជាមធ្យោបាយនៃការទប់ទល់កុបកម្មតទៅទៀត។ អង្គការសហប្រជាជាតិសូមអំពាវនាវដល់តំណាងកម្មករ ថៅកែរោងចក្រ អាជ្ញាធររាជធានី និងជាតិ ព្យាយាមស្វែងរកយន្តការនៃការចរចា ដើម្បីដោះស្រាយបញ្ហា»។
បើតាមសេចក្តីថ្លែងការណ៍ដដែលនេះ ស្ថាប័នអង្គការពលកម្មអន្តរជាតិ ILO មានបំណងផ្តល់ការគាំទ្រផ្នែកបច្ចេកទេសដល់រដ្ឋាភិបាល សហជីព និងថៅកែរោងចក្រដើម្បីធ្វើអោយប្រសើរឡើងនូវប្រព័ន្ធកំណត់ប្រាក់ខែ របស់កម្មករ។ តំណាងអង្គការសហប្រជាជាតិបានបញ្ជាក់ថា «សារៈសំខាន់របស់វិស័យកាត់ដេរដែលជាសេដ្ឋកិច្ចរបស់កម្ពុជាមិនអាច ពន្យាបានឡើយ។ ការផ្អាកដំណើរការកាន់តែ យូរ ការខាតបង់សម្រាប់សេដ្ឋកិច្ចកម្ពុជាកាន់តែមានទំហំធំធេង ដែលប៉ះពាល់ដល់សហគមន៍ពាណិជ្ជកម្ម និងជីវភាពរបស់ពលរដ្ឋខ្មែរ»៕
No comments:
Post a Comment