ចាប់ ពីថ្ងៃសៅរទី៤មករានេះទៅ សាលារាជធានីភ្នំពេញមិនអនុញ្ញាតអោយគណបក្សសង្គ្រោះជាតិរៀបចំបាតុកម្ម ទៀតឡើយ រហូតដល់ស្ថានភាពសន្តិសុខ និងសណ្តាប់ធ្នាប់ត្រូវបានបានធានាឡើងវិញ។ នេះជាសេចក្តីសម្រេចរបស់លោកប៉ា សុជាតិវង្ស អភិបាលរាជធានីភ្នំពេញនៅថ្ងៃសៅរ៍នេះ។
លោកអភិបាលរាជធានីបាឆ្លើយតបជាអវិជ្ជមានទៅលោកសម រង្ស៊ី ប្រធានគណបក្សសង្គ្រោះជាតិដែលបានស្នើសុំធ្វើបាតុកម្មនៅលើទីលាន ប្រជាធិបតេយ្យ។ សេចក្តីសម្រេចបដិសេធការរៀបចំបាតុកម្មរបស់គណបក្សសង្គ្រោះជាតិ ត្រូវបានលោកប៉ា សុជាតិវង្សពន្យល់យោងទៅលើច្បាប់ស្តីការរៀបចំបាតុកម្មដោយសន្តិវិធី ស្ថានភាពជាក់ស្តែងដែលបានកើតឡើងនាពេលចុងក្រោយនេះ។ នៅក្នុងលិខិតឆ្លើយតបទៅលោកសម រង្ស៊ីចុះថ្ងៃទី៤មករានេះ លោកប៉ា សុជាតិវង្សបានសរសរយ៉ាងដូច្នេះ៖«យោងតាមស្មារតីនៃមាត្រា៩ចំនុច២នៃ ច្បាប់ស្តីពីការៀបចំបាតុកម្មដោយសន្តិវិធី អាជ្ញាធរដែនដីត្រូវឆ្លើយតបជាអវិជ្ជមានចំពោះការធ្វើបាតុកម្ម ក្នុងករណីដែលមានព័ត៌មានច្បាស់ថា ការធ្វើបាតុកម្ម នឹងអាចបង្កគ្រោះថ្នាក់ណាមួយ ឬនឹងអាចប៉ះពាល់ធ្ងន់ធ្ងរដល់សន្តិសុខ សុវត្ថិភាព និងសណ្តាប់ធ្នាប់សាធារណៈ»។
លោកប៉ា សុជាតិវង្សបានរម្លឹកលោកសម រង្ស៊ីអំពីសកម្មភាពអុជអាល ញុះញង់នានាដែលបាននាំទៅដល់ការប្រើហិង្សា អោយបាត់បង់ជីវិតមនុស្ស និងការបំផ្លិចបំផ្លាញទ្រព្យសម្បត្តិឯកជន និងសាធារណៈ រួមទាំងការបិទផ្លូវសាធារណៈជាដើម។
លោកអភិបាលរាជធានីបានប្រាប់លោកសម រង្ស៊ីត្រង់ៗថា «បាតុករមួយចំនួនដែលចេញពីទីលានប្រជាធិបតេយ្យ ដោយរួមទាំងព្រះសង្ឃខ្លះផង ក៏បានធ្វើសកម្មភាពខុសច្បាប់ និងអុកឡុកតាមដងផ្លូវ តាមរោងចក្រ និងតាមស្ថាប័នរដ្ឋនានា ដោយមិនមានការគ្រប់គ្រង និងការទទួលខុសត្រូវពីសំណាក់អ្នកដឹកនាំបាតុកម្មឡើយ»៕
រក្សាសិទ្ធិដោយ thmeythmey.com
No comments:
Post a Comment