By Thmey Thmey
(អត្ថបទចុះផ្សាយនៅថ្ងៃ 
04-01-2014, 
8:54 pm) | ដោយ ជា ធីរិទ្ធ
04-01-2014, 8:54 pm) | ដោយ ជា ធីរិទ្ធ ក្រុមអ្នកច្បាប់ និងអ្នកការពារសិទ្ធិមនុស្សនៅកម្ពុជាមួយចំនួនបានសម្តែងការសោកស្តាយ ចំពោះអាជ្ញាធររបស់រដ្ឋាភិបាលដែលបានបើកយុទ្ធនាការបោសសម្អាតនៅទីលាន ប្រជាធិបតេយ្យ ពោលគឺមិនអនុញ្ញាតឲ្យក្រុមបាតុកររបស់គណបក្សសង្គ្រោះជាតិបាន បន្តធ្វើបាតុកម្មនៅទីលានប្រជាធិបតេយ្យនោះទៀត។ ពួកគេបានចាត់ទុកសកម្មសភាពនេះថា ជាការរំលោភច្បាប់ និងរំលោភសិទ្ធិមនុស្សយ៉ាងធ្ងន់ធ្ងរ។
ភ្លាមៗក្រោយពីក្រុមសមត្ថកិច្ចរបស់រដ្ឋាភិបាលបើកការបោសសម្អាត ក្រុមបាតុករនៅទីលានប្រជាធិបតេយ្យរួចមក ក្រុមអ្នកច្បាប់នៅអង្គការក្រៅរដ្ឋាភិបាល បានសម្តែងការសោកស្តាយយ៉ាងខ្លាំងចំពោះប្រតិបត្តិការបស់អាជ្ញាធរ រដ្ឋាភិបាលនៅថ្ងៃនេះ។ លោកមេធាវី សុក សំអឿន នាយកប្រតិបត្តិអង្គការក្រុមអ្នកច្បាប់ការពារសិទ្ធិកម្ពុជា បានបង្ហាញនូវអារម្មណ៍ហួសចិត្តចំពោះសកម្មភាពបោសសម្អាតក្រុមបាតុករ។ «នេះជាទង្វើមួយដែលហួសហេតុ ប្រាសចាកពីគោលការណ៍ច្បាប់»។ លោកមេធាវី សុក សំអឿន បានចាត់ទុកការធ្វើបាតុកម្មរបស់គណបក្សសង្គ្រោះជាតិនៅទីលាន ប្រជាធិបតេយ្យ ជាបាតុកម្មអហិង្សា ដែលអាជ្ញាធរមិនគួរនឹងរំខាន ឬមិនអនុញ្ញាតនោះឡើយ។ អ្នកច្បាប់រូបនេះបានលើកឡើងពីហេតុផលច្បាប់ថា ការធ្វើបាតុកម្មអហិង្សា គួរមិនត្រូវតទួលការរំខានឡើយ។ «នេះគឺជាសិទ្ធរបស់ពលរដ្ឋដែលមានកំណត់នៅក្នុងច្បាប់រដ្ឋធម្មនុញ្ញ និងច្បាប់បាតុកម្មនៃប្រទេសកម្ពុជា»។
ស្រដៀងគ្នាដែរលោក នី ចរិយា មន្ត្រីផ្នែកច្បាប់នៃអង្គការសិទ្ធិមនុស្សអាដហុក ក៏បានសម្តែងការព្រួយបារម្ភចំពោះស្ថានការណ៍សិទ្ធិមនុស្សនៅកម្ពុជា។ លោកថា «សកម្មភាពរបស់អាជ្ញាធរនៅថ្ងៃនេះ វាអាចនឹងមានផលប៉ះពាល់ដល់ពន្លកប្រជាធិបតេយ្យនៅក្នុងប្រទេសកម្ពុជា ដែលទើបតែលូតបានបន្តិចបន្តួច»។
លោក នី ចរិយា បន្តថា ការធ្វើបាតុកម្មរបស់គណបក្សសង្គ្រោះជាតិដោយអហិង្សា ត្រូវបានធានាដោយច្បាប់កំពូលរដ្ឋធម្មនុញ្ញ។ ម្យ៉ាងទៀត អាជ្ញាធរមិនអាចប្រើសិទ្ធិមិនអនុញ្ញាតឲ្យប្រជាពលរដ្ឋធ្វើបាតុកម្ម ដោយអហិង្សានោះបានទេ។
លោក មឿន តុលា មន្ត្រីកម្មវិធីសិទ្ធិការងាររបស់មជ្ឈមណ្ឌលច្បាប់សម្រាប់សហគមន៍ បានអះអាងថា លោកមានការសោកស្តាយខ្លាំងណាស់ចំពោះសកម្មភាពរបស់អាជ្ញាធររដ្ឋាភិបាល នៅថ្ងៃនេះ ដោយលោកបានចាត់ទុកសកម្មភាពបែបនេះថា វាបានឆ្លុះបញ្ចាំងឲ្យឃើញប្រទេសកម្ពុជា ជាប្រទេសគ្មានសន្តិភាព និងប្រជាធិបតេយ្យនោះឡើយ។
ចំពោះលោក មឿន តុលា បើសាលារាជធានីមិនអនុញ្ញាតឲ្យធ្វើបាតុកម្ម ក្រោមហេតុផលថា វាធ្វើអោយប៉ះពាល់ដល់សន្តិសុខជាតិនោះ លោកមឿន តុលាថ្លែងថា នេះជាហេតុផលមួយដែលគ្មានមូលដ្ឋានច្បាស់លាស់ឡើយ។ ពោលគឺមិនមានភស្តុតាងនៃការស៊ើបអង្កេតអ្វីនោះទេ គឺគ្រាន់តែនិយាយទំលាក់កំហុសឲ្យតែបាន ដែលប្រាសចាកពីច្បាប់ សន្ធិសញ្ញាអន្តរជាតិ និងគោលការណ៍សិទ្ធមនុស្សយ៉ាងធ្ងន់ធ្ងរបំផុត។
គួររម្លឹកថា មុនការប្រតិបត្តិការបំបែកបាតុករគណបក្សសង្គ្រោះជាតិនោះ លោកប៉ា សុជាតិវង្សបានសម្រេចមិនអនុញ្ញាតអោយលោកសម រង្ស៊ីដឹកនាំបាតុកម្មនៅលើទីលានប្រជាធិបតេយ្យនោះទៀតឡើយ ក្រោមហេតុផលថា កន្លងមកបាតុករបានចាកចេញពីទីលានប្រជាធិបតេយ្យ និងបានដើរអុកឡុក បំផ្លាញទ្រព្យសម្បត្តិសាធារណៈ និងឯកជន ដោយគ្មានការទទួលខុសត្រូវពីគណបក្សសង្គ្រោះជាតិឡើយ។ បើតាមលោកអភិបាលសាលារាជធានី ការណ៍នេះហើយដែលត្រូវបានសរសេរនៅក្នុងមាត្រា៩នៃច្បាប់ស្តីពីការ រៀបចំបាតុកម្មដោយសន្តិវិធីដែលសរសេរថាប្រសិនបើអាជ្ញាធរ ទទួលបានព័ត៌មានច្បាស់ថា បាតុកម្មនោះនឹងធ្វើអោយប៉ះពាល់ដល់អសន្តិសុខ និងសណ្តាប់ធ្នាប់សង្គម អាជ្ញាធរអាចឆ្លើយតបជាអវិជ្ជមាន ចំពោះគម្រោងរៀបចំបាតុកម្មនោះ៕
No comments:
Post a Comment