Monday, 27 January 2014
ភ្នំពេញៈ អង្គការលើកលែងទោសអន្តរជាតិ និងអង្គការសិទិ្ធមនុស្ស លីកាដូ កាលពីម្សិលមិញ បានអំពាវនាវឲ្យរដ្ឋជាសមាជិកអង្គការសហប្រជាជាតិ «ដោះស្រាយវិបតិ្តសិទិ្ធមនុស្សនៅកម្ពុជា» ក្នុងសវនាការក្រុមប្រឹក្សាសិទិ្ធមនុស្សអង្គការសហប្រជាជាតិ នៅទីក្រុង ហ្សឺណែវ នៅថ្ងៃអង្គារ។
សេចក្តីថ្លែងដែលបានផ្ញើទៅស្ថានទូតបរទេស រដ្ឋាភិបាលកម្ពុជានិងស្ថានបេសកកម្មនៅទីក្រុង ហ្សឺណែវ បានឲ្យដឹងថា ចាប់តាំងពីអង្គការបានផ្តល់អនុសាសន៍ជាច្រើននៅពាក់កណ្តាលឆ្នាំ ២០១៣ ស្ថានការណ៍សិទិ្ធមនុស្សបានធ្លាក់ចុះយ៉ាងខ្លាំង។
សេចក្តីថ្លែងនោះបន្ថែមថា៖ «ចាប់តាំងពីដើមឆ្នាំ ២០១៤ ការគោរពសិទិ្ធមនុស្សនៅកម្ពុជារាប់បញ្ចូលទាំងការប្រព្រឹត្តមកលើអ្នកការពារសិទិ្ធមនុស្ស បានធ្លាក់ចុះយ៉ាងខ្លាំងដល់ចំណុចមានវិបតិ្ត»។
អង្គការសិទិ្ធមនុស្សទាំងពីរបានស្នើឲ្យបរទេសដាក់សម្ពាធលើ កម្ពុជា ចំពោះបញ្ហាចំនួន ៤ នៅក្នុងអង្គប្រជុំស្តីពីការត្រួតពិនិត្យសិទ្ធិមនុស្សជាសកលជាប្រចាំ (Universal Periodic Review ,UPR)។
សេចក្តីថ្លែងបានបន្ថែមថា រដ្ឋសមាជិកអង្គការសហប្រជាជាតិគួរអំពាវនាវ «ឲ្យបើកសវនាការឧទ្ធរណ៍ដោយយុតិ្តធម៌ និងឆាប់រហ័សលើបាតុករ ២៣នាក់ ដែលត្រូវចាប់ខ្លួននៅក្នុងបាតុកម្មនៅភ្នំពេញ កាលពីថ្ងៃ ទី២ និង ៣ ខែ មករា ឆ្នាំ ២០១៤» និងការថែទាំគ្រប់គ្រងចំពោះអ្នកជាប់ឃុំ។
រដ្ឋសមាជិកក៏គួរស្នើប្រទេស កម្ពុជា បញ្ចប់ការប្រើប្រាស់កម្លាំងជ្រុលហួសហេតុក្នុងការប្រឆាំងនឹងអ្នកតវ៉ា ត្រូវធ្វើការស៊ើបអង្កេតឲ្យបានហ្មត់ចត់ និងគ្មានលម្អៀងលើអំពើហិង្សា ផ្តល់សំណងដល់ជនរងគ្រោះ និងលុបចោលការហាមប្រាមការប្រមូលផ្តុំជាសាធារណៈ ដែល «គ្មានមូលដ្ឋានច្បាប់»។
រដ្ឋាភិបាលត្រូវរាយការណ៍ជូនក្រុមប្រឹក្សាសិទ្ធិមនុស្សអង្គការសហប្រជាជាតិ រៀងរាល់ ៤ ឆ្នាំកន្លះ អំពីចំណាត់ការអ្វីខ្លះដែលរដ្ឋាភិបាលបានធ្វើដើម្បីលើកកម្ពស់សិទិ្ធមនុស្ស និងបំពេញកាតព្វកិច្ចអន្តរជាតិនៅក្នុងសម័យប្រជុំជាមួយនឹងរដ្ឋសមាជិកដទៃទៀត។
ការត្រួតពិនិត្យលើកម្ពុជាចុងក្រោយគឺនៅក្នុងអំឡុងខែ ធ្នូ ឆ្នាំ ២០០៩។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងកាលពីម្សិលមិញថា អនុសាសន៍នឹងត្រូវយកមកពិចារណាក្នុងបរិបទច្បាប់របស់ប្រទេស កម្ពុជា។
លោកបញ្ជាក់ថា៖ «ច្បាប់និងសណ្តាប់ធ្នាប់ត្រូវតែរក្សា និងស្តារឡើងវិញ។ ភាគីទាំងអស់ត្រូវគោរពនីតិរដ្ឋ និងនីតិវិធីច្បាប់។ អនុសាសន៍នឹងត្រូវយកមកពិចារណាអនុលោមតាមច្បាប់របស់កម្ពុជា ដោយចាំបាច់ត្រូវធានាសន្តិសុខ»។
«យើងមិនដែលរំលោភរដ្ឋធម្មនុញ្ញទេ។ បាតុកម្មត្រូវតែស្របតាមច្បាប់បាតុកម្ម»។
លោក សម រង្ស៊ី មេដឹកនាំគណបក្សប្រឆាំង បានចាកចេញទៅអឺរ៉ុបនៅរសៀលថ្ងៃព្រហស្បតិ៍ ដោយសង្ឃឹមចូលរួមក្នុងការត្រួតពិនិត្យរបស់អង្គការសហប្រជាជាតិ ដែលជាធម្មតាត្រូវបានកម្រិតត្រឹមរដ្ឋាភិបាល និងអង្គការមិនមែនរដ្ឋាភិបាល៕ TK
No comments:
Post a Comment