ដោយ៖ នួន បូរិន | ថ្ងៃព្រហស្បតិ៍ ទី17 ខែតុលា ឆ្នាំ2013, VOD
លោក សម រង្ស៊ី ប្រធាន និងមន្ដ្រីគណបក្សសង្រ្គោះជាតិ និង លោក អេដវ័ដ រ. រ័ស្ស សមាជិកសភាសហរដ្ឋអាមេរិក និងជា ប្រធានគណៈកម្មការ ទទួលបន្ទុកកិច្ចការបរទេស (រូបភាពពី ហ្វេសប៊ុក Sam Rainsy)
រដ្ឋាភិបាលសហរដ្ឋអាមេរិក ជំរុញគណបក្សទាំងពីរនៃប្រទេសកម្ពុជា គឺគណបក្សប្រជាជនកម្ពុជា និងគណបក្សសង្គ្រោះជាតិ បន្តការចរចាជាមួយគ្នាឡើងវិញ ដើម្បីបញ្ចប់ការជាប់គាំងនយោបាយ ក្រោយការបោះឆ្នោតសភា កាលពីថ្ងៃទី២៨ ខែកក្កដា។
ស្ត្រីអ្នកនាំពាក្យក្រសួងការបរទេសអាមេរិក លោកស្រី Jen Psaki មានប្រសាសន៍ថា ជំនួបរវាង លោក សម រង្ស៊ី ប្រធានគណបក្សសង្គ្រោះជាតិ និងអនុរដ្ឋមន្ត្រីក្រសួងការបរទេសអាមេរិក លោក William Burns បានជួប ហើយនៅក្រសួងការបរទេស ក្រុង វ៉ាស៊ិនតោន កាលពីយប់ ថ្ងៃពុធ ហើយភាគីទាំងពីរបានពិភាក្សាគ្នាជុំវិញ បរិបទនយោបាយនៅកម្ពុជា។
លោកស្រីបញ្ជាក់ថា តាមអ្នកសង្កេតការឯករាជ្យ គឺការបោះឆ្នោតសភាកាលពីថ្ងៃទី២៨ ខែកក្កដា មិនមានភាពសេរី និងត្រឹមត្រូវ ហើយមានភាពមិនប្រក្រតីជាច្រើន បានកើតឡើង។ លោកស្រី បន្តថា ក្នុងហេតុផលនេះ អាមេរិកមានជំនឿរឹងមាំថា គណបក្សទាំងពីរនៃប្រទេសកម្ពុជា ដែលជាប់ឆ្នោតនឹងបន្តការចរចាជាមួយគ្នាឡើងវិញ ដើម្បីបញ្ចប់ការជាប់គាំងនយោបាយ ក្រោយការបោះឆ្នោតសភា កាលពីថ្ងៃទី២៨ កក្កដា ហើយសង្ឃឹមថា នឹងមានការកែទម្រង់អ្វីដែលមិនទាន់មានការចុះសម្រុងគ្នា។ លោកបញ្ជាក់ថា នេះជាការទទូចរបស់អាមេរិក។
បើទោះជាយ៉ាងណា ស្ត្រីអ្នកនាំពាក្យក្រសួងការបរទេសអាមេរិក លោកស្រី Jen Psaki បានប្រាប់ទីភ្នាក់ងារសារព័ត៌មានបារាំងា AFP ថា អាមេរិកគាំទ្រយ៉ាងខ្លាំងដំណើរការប្រជាធិបតេយ្យ ហើយអាមេរិកមិនគាំទ្រគណបក្សនយោបាយណាមួយពិសេសឡើយ។
សូមជម្រាបថា លោក សម រង្ស៊ី ក្រៅពីជួបជាមួយអនុរដ្ឋមន្ត្រីក្រសួងការបរទេសអាមេរិក មានព័ត៌មានថា ប្រធានគណបក្សសង្គ្រោះជាតិនេះ ក៏បានជួបព្រឹទ្ធសមាជិក និងសមាជិកសភាអាមេរិក នៅវិមាន Capitol ជាច្រើននាក់ផងដែរ៕
សូមសរសេរមកកាន់ លោក នួន បូរិន តាមរយៈ narinnu@vodhotnews.com
No comments:
Post a Comment