ដោយ៖ ណាត សុភាព និងស៊ុន ណារិន | ថ្ងៃចន្ទ័ ទី2 ខែកញ្ញា ឆ្នាំ2013,VoD
ស្តាប់សំឡេង៖ |
ចម្លងទុក |
សង្គមស៊ីវិលជាង៤០
នៃបន្ទប់ស្ថានការណ៍ពិសេសនៅថ្ងៃបោះឆ្នោត នៅថ្ងៃចន្ទនេះ
បង្ហាញសុទិដ្ឋិនិយមថា
បញ្ហាជាប់គាំងនយោបាយក្រោយការបោះឆ្នោតនៅកម្ពុជា
អាចនឹងដោះស្រាយបានតាមរយៈការចរចា ដោយឈរលើមូលដ្ឋានយោគយល់គ្នា
និងយកប្រយោជន៍ជាតិជាធំ។
សង្គមស៊ីវិលជាង៤០ បានអំពាវនាវឲ្យគណបក្សនយោបាយ
ដែលមានអាសនៈក្នុងរដ្ឋសភា ចូលជួបចរចាជាបន្ទាន់
មុនថ្ងៃប្រកាសលទ្ធផលបោះឆ្នោត
ដើម្បីដោះស្រាយបញ្ហាជាប់គាំងនយោបាយនៅកម្ពុជា ក្រោយការបោះឆ្នោត។
ក្នុងសន្និសីទសារព័ត៌មាន នៅព្រឹកថ្ងៃទី០២ ខែកញ្ញានេះ លោក ធន
សារ៉ាយ ប្រធានគណៈកម្មាធិការនាយកខុមហ្វ្រែល ថ្លែងអំពាវនាវថា
សូមឲ្យមានការជួបជុំគ្នាជាបន្ទាន់ ដើម្បីដោះស្រាយបញ្ហា
ដែលនេះជាជម្រើសប្រសើរបំផុត សម្រាប់ដោះស្រាយបញ្ហានយោបាយ។
លោកបន្តអំពាវនាវឲ្យមានការកាត់បន្ថយវោហោសព្ទនយោយបាយ
ការបន្ថយការចល័តទ័ព ការចរចាគ្នាឲ្យបានជាអតិបរមា
និងការយកប្រយោជន៍ជាតិជាធំ ៖ "យើងក៏សូមអំពាវនាវផងដែរ
សូមឲ្យមេដឹកនាំគណបក្សនយោបាយ ប្រកាន់យកមធ្យោបាយចរចាគ្នា
ដោះស្រាយបញ្ហាដោយសន្តិវិធី ឲ្យបានជាអតិបរមាដែលអាចធ្វើទៅបាន
ហើយនឹងតំកល់ទុកប្រយោជន៍ជាតិ
ឲ្យខ្ពស់ជាងប្រយោជន៍គណបក្សរៀងៗខ្លួន”។
សម្រាប់នាយកប្រតិបត្តិអង្គការឃ្លាំមើលការបោះឆ្នោត ហៅកាត់ថា
និចហ្វិច លោក ហង្ស ពុទ្ធា លើកឡើងថា អ្នកនយោបាយទាំងសងខាង
គួរតែជួបគ្នា និងយកបញ្ហាខ្វែងគំនិតគ្នា មកដោះស្រាយជូនម្ចាស់ឆ្នោត
ឲ្យមានតម្លាភាព ៖ “ប្រធានបទដែលចង់ជួបរវាងគណបក្សទាំងពីរ
គឺផ្ទុយគ្នាទាំងស្រុងតែម្តង អញ្ជឹងទោះបីយ៉ាងណា
យើងជំរុញឲ្យអ្នកនយោបាយ ទាំងសងខាងនៅតែបន្តការជួប
ហើយយកគោលបំណងនៃការជួប យកមកដាក់លើតុ បន្ថែមទៀតប្រសិនជា
មិនជំរុញឲ្យមានការជួបគ្នាទេ
ខ្ញុំគិតថាបញ្ហាចេះតែកើតមានជាបន្តបន្ទាប់ទៀត
ហើយការជួបគ្នាដូចបន្ទប់ស្ថានការណ៍បានលើកឡើង
ទីមួយគឺត្រូវការអ្នកមានសិទ្ធិក្នុងការសម្រេចចិត្ត ទាំងសងខាង
ទីពីរទៀត គួរកំណត់នូវប្រធានបទ ជៀកលាក់ក្នុងការនិយាយ”។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា
របៀបវារៈចំនួនពីរនៃការជួបចរចា រួមមាន គណបក្សនីមួយៗ
និយាយពីការស៊ើបអង្កេតនៃភាពមិនប្រក្រតីនៃការបោះឆ្នោត ដោយអ្នកឈ្នះ
ឈ្នះដោយថ្លៃថ្នូរ និងអ្នកចាញ់ ចាញ់ដោយអស់ចិត្ត
និងទីពីរការពិភាក្សានៃការចែកអំណាចក្នុងរដ្ឋសភា
និងកំណែទម្រង់នយោបាយ ៖ “ទីមួយដំណើរត្រូវចាប់ផ្តើម
មួយជំហានមុនគេនោះគឺ ចាប់ផ្តើមមុនថ្ងៃទី០៧ ថ្ងៃទី០៨នេះ
បើផុតពីនេះប្រហែលជាយឺតពេល ប៉ុន្តែត្រូវចាប់ផ្តើមមុខនេះ
អញ្ជឹងហើយបានពួកយើងខំប្រឹងប្រែងនៅពេលបច្ចុប្បន្ននេះ
ដើម្បីជំរុញឲ្យជួបគ្នានេះ ប្រសិនជាមានការជួបគ្នាមុខពេលនេះ
គឺអត់យឺតពេលទេ ព្រោះថាគណបក្សទាំងពីរអាច ស្នើទៅ គជប
ដើម្បីពន្យាពេល នៃការប្រកាសបាន ព្រោះអីការប្រកាសនេះអាចពន្យាបាន
ហើយមិនពាក់ព័ន្ធទៅលើការប្រជុំសភា ៦០ថ្ងៃបន្ទាប់ពីការបោះឆ្នោតទេ
ព្រោះអីមិនទាន់យឺតពេល”។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា
គណបក្សរបស់លោក ធ្លាប់ស្នើទៅគណបក្សកាន់អំណាចជាច្រើនដងមកហើយ
ទាក់ទងនឹងបង្កើតគណៈកម្មការឯករាជ្យ
ស៊ើបអង្កេតជុំវិញភាពមិនប្រក្រតីនៃការបោះឆ្នោត តែសំណើរនេះ
ត្រូវបានបដិសេធ។ លោកបញ្ជាក់ថា គណបក្សសង្គ្រោះជាតិ
នៅតែប្រកាន់ជំហរថា បើមិនទាន់មានការបង្កើតគណៈកម្មការចម្រុះ
គណបក្សប្រឆាំងមិនទាន់គិតពីការបែងចែកស្ថាប័នអ្វីឡើយ។
សេចក្តីថ្លែងការណ៍របស់គណបក្សប្រជាជនកម្ពុជា ចុះថ្ងៃទី០១
ខែកញ្ញា បញ្ជាក់ជាថ្មីថា រាល់ការបង្កើតយន្តការណាមួយ
ដើម្បីដោះស្រាយបញ្ហាពាក់ព័ន្ធនឹងការបោះឆ្នោត ដែលខុសរដ្ឋធម្មនុញ្ញ
និងច្បាប់ជាធរមានរបស់ប្រទេសកម្ពុជា គឺជាប្រការមិនធ្វើបានទ្បើយ។
គណបក្សប្រជាជនកម្ពុជា ប្រកាសថា
ខ្លួនត្រៀមជាស្រេចសហការជាមួយគណបក្សសង្គ្រោះជាតិ
ដោយសុឆន្ទៈស្មោះសរ ក្នុងការដោះស្រាយដោយសន្តិវិធី
និងផ្អែកលើលទ្ធផលបោះឆ្នោតជាផ្លូវការ
ដើម្បីបញ្ចៀសវិបត្តិក្រោយការបោះឆ្នោត
និងឈានទៅបង្កើតស្ថាប័ននីតិបញ្ញត្តិ និងនីតិប្រតិបត្តិ។
សូមជម្រាបថា នៅថ្ងៃព្រឹកចន្ទនេះ ប្រធានគណបក្សសង្គ្រោះជាតិ លោក សម
រង្ស៊ី បានប្រកាសថា កំណែទម្រង់ដែលគណបក្សសង្គ្រោះជាតិ ចង់បាន
គឺកំណែទម្រង់លើស្ថាប័ន្ថរដ្ឋ និងគោលនយោបាយរបស់គណបក្ស៕
សូមសរសេរមកកាន់ លោក ណាត សុភាព តាមរយៈ sopheap@vodhotnews.com
No comments:
Post a Comment