ជនជាតិភាគតិចរ៉ូហ៊ីងយ៉ាត្រូវបានគេបំបិទមាត់ក្នុងទីក្រុងបាងកក ខណៈដែលយន្តហោះរបស់មេដឹកនាំមីយ៉ាន់ម៉ាចុះចត
23 មិថុនា 2016
VOA News
លោកស្រី អង់សាន ស៊ូជី ទីប្រឹក្សារដ្ឋាភិបាលនិងជារដ្ឋមន្ត្រីក្រសួងការបរទេសចាកចេញពីកិច្ចប្រជុំជាមួយពលរដ្ឋអន្តោប្រវេសន៍នៅមណ្ឌលនេសាទនៅតាមឆ្នេរសមុទ្រ Samut Sakhon ប្រទេសថៃ កាលពីថ្ងៃទី២៣ ខែមិថុនា ឆ្នាំ២០១៦។
បញ្ហាដ៏ចម្រូងចម្រាសក្នុងការប្រព្រឹត្តទៅលើជនភៀសខ្លួនរ៉ូហ៊ីងយ៉ាក្នុងប្រទេសថៃបានក្លាយជាបញ្ហាកៅ្តគគុកមួយ ក្នុងពេលចាប់ផ្តើមដំណើរទស្សនកិច្ចរបស់មេដឹកនាំនៃប្រទេសមីយ៉ាន់ម៉ាទៅកាន់ប្រទេសថៃ ដែលជាប្រទេសជិតខាងនឹងគ្នានៅថ្ងៃព្រហស្បតិ៍នេះ។
ខណៈដែលយន្តហោះដឹកលោកស្រី អង់សាន ស៊ូជី ទីប្រឹក្សារដ្ឋាភិបាលនិងជារដ្ឋមន្ត្រីក្រសួងការបរទេស បានចុះចតនៅអាកាសយានដ្ឋានសុវណ្ណភូមិ ក្រុមសកម្មជនក្នុងរាជធានីបាងកកត្រូវបានរដ្ឋាភិបាលយោធារបស់ប្រទេសថៃបំបិទមាត់ភ្លាមៗ។
ប៉ូលិសនិងទាហានមួយក្រុមតូចដែលមិនស្លៀកពាក់ឯកសណ្ឋានបានរារាំងមិនឲ្យសកម្មជនមួយក្រុមបញ្ចប់សន្និសីទកាសែតនៅកន្លែងមួយ ដែលក្រុមនេះបានជួលនៅក្នុងសមាគមអ្នកឆ្លើយឆ្លងព័ត៌មានបរទេសនៃប្រទេសថៃនោះទេ។
«មានការព្រួយបារម្ភអំពីបញ្ហាសន្តិសុខជាតិ។ កម្មវិធីនេះនឹងមិនធ្វើឲ្យប៉ះពាល់ដល់បញ្ហាសន្តិសុខនោះទេ»។ នេះជាសម្តីរបស់លោកស្រី Amy Smith នាយកប្រតិបត្តិរបស់អង្គការការពារសិទ្ធិមនុស្ស Fortify Rights ដែលបានថ្លែងប្រាប់ VOA នៅក្នុងបរិវេណរៀបចំកម្មវិធីនោះ។ លោកស្រី Smith បានបន្ថែមថា «នេះគឺជាការបំពានទៅលើសិទ្ធិក្នុងការបញ្ចេញមតិដោយសេរី និងការប្រមូលផ្តុំគ្នាដោយសន្តិវិធី»។
សកម្មជនពីរនាក់ដែលតស៊ូមតិឲ្យធ្វើទង្វើល្អជាងមុនទៅលើជនជាតិភាគតិចរ៉ូហ៊ីងយ៉ាក្នុងប្រទេសមីយ៉ាន់ម៉ា បានអានសំបុត្រចំហរមួយច្បាប់ទៅកាន់លោកស្រី អង់សាន ស៊ូជី និងបានពន្យល់អំពីមូលហេតុដែលពួកគេត្រូវបានរដ្ឋាភិបាលយោធាថៃរារាំងមិនឲ្យឆ្លើយនឹងសំណួររបស់អ្នកកាសែត។
ក្រោយពេលចាកចេញពីវេទិកានោះ លោក Hajee Ismail អគ្គលេខាធិការក្រុមជនជាតិភាគតិចរ៉ូហ៊ីងយ៉ាក្នុងប្រទេសថៃ បាននិយាយថា «ខ្ញុំមិនអាចនិយាយអ្វីបានទេនៅពេលនេះ» ខណៈដែលលោកបានយកដៃខ្ទប់មាត់ខ្លួនឯង។ លោកបានបន្ថែមថា «នេះគឺជាបញ្ហាដ៏ធំមួយ»៕
No comments:
Post a Comment