ដោយ ខែ សុណង
2016-05-02
ប្រធានអង្គការវេទិកាអនាគត និងជាអ្នកឃ្លាំមើលស្ថានការណ៍នយោបាយ លោក អ៊ូ វីរៈ ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៥ ខែមីនា ឆ្នាំ២០១៦។
Photo: RFA
សាលាដំបូងរាជធានីភ្នំពេញ ចេញដីកាកោះហៅអ្នកវិភាគឯករាជ្យ លោក អ៊ូ វីរៈ ចូលសាកសួរតាមបណ្ដឹងរបស់មន្ត្រីគណបក្សប្រជាជនកម្ពុជា ក្នុងសំណុំរឿងបរិហារកេរ្តិ៍ជាសាធារណៈ។ ការកោះហៅនេះ បន្ទាប់ពីលោក អ៊ូ វីរៈ បានវិភាគថា យុទ្ធសាស្ត្ររបស់គណបក្សកាន់អំណាចនៅពេលនេះ គឺព្យាយាមគាបសង្កត់លោក កឹម សុខា និងហិរញ្ញវត្ថុរបស់លោក ពាក់ព័ន្ធនឹងសំណុំរឿងអាស្រូវស្នេហាជាមួយអ្នកនាង ខុម ចាន់តារាទី ហៅ ស្រីមុំ។
មន្ត្រីសង្គមស៊ីវិលចាត់ទុកថា ការកោះហៅអ្នកវិភាគឯករាជ្យ លោក អ៊ូ វីរៈ គឺជាចំណាត់ការរបស់រដ្ឋាភិបាលលើអ្នកសម្ដែងមតិ ដែលហ៊ាននិយាយរិះគន់រដ្ឋាភិបាល និងដើម្បីបំបាក់ស្មារតីអ្នកជំនាន់ក្រោយ។
អ្នកគ្រប់គ្រងបច្ចេកទេសការិយាល័យស៊ើបអង្កេត នៃអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងនៅថ្ងៃទី២ ឧសភា ថា នេះជាចំណាត់ការដ៏លឿនមួយ ខុសអំពីបណ្ដឹងរបស់ប្រជាពលរដ្ឋសាមញ្ញដែលបានប្ដឹងទៅតុលាការ។ លោកបន្តថា សំណុំរឿងលោក អ៊ូ វីរៈ គឺពាក់ព័ន្ធនឹងការសម្ដែងមតិ ដែលនេះជាសារមួយព្រមានទៅដល់អ្នកបញ្ចេញមតិដទៃទៀត ឲ្យមានការប្រុងប្រយ័ត្ន ដើម្បីកាត់បន្ថយនូវការបញ្ចេញមតិដែលជាសិទ្ធិមូលដ្ឋានធានាដោយរដ្ឋធម្មនុញ្ញ។
លោក អំ សំអាត ថ្លែងថា «ខ្ញុំគិតថា លោក អ៊ូ វីរៈ ដែលគាត់បញ្ចេញមតិតាមប្រព័ន្ធផ្សព្វផ្សាយផ្សេងៗ គឺជាសិទ្ធិសេរីភាពរបស់គាត់ក្នុងការសម្ដែងមតិ។ បើអត់គិតបែងចែកទេ ឲ្យតែមានការរិះគន់ តែងតែមានការប្ដឹងផ្ដល់ នេះធ្វើឲ្យប៉ះពាល់ទៅដល់សិទ្ធិសេរីភាព ធ្វើឲ្យប្រជាពលរដ្ឋទាំងអស់ តើនរណាហ៊ានរិះគន់ដើម្បីស្ថាបនា នរណាហ៊ានសម្ដែងមតិនោះ?»។
ការថ្លែងនេះ នៅបន្ទាប់ពីព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ បានចេញដីកាកោះហៅលោក អ៊ូ វីរៈ ជាផ្លូវការពីបទបរិហារកេរ្តិ៍ជាសាធារណៈ ឲ្យចូលខ្លួននៅថ្ងៃទី១២ ខែឧសភា និងកោះហៅលោក សុខ ឥសាន ជាដើមបណ្ដឹងនៅថ្ងៃទី៦ ខែឧសភា ដើម្បីសាកសួរ។
កាលពីព្រឹកថ្ងៃទី២៥ ខែមេសា លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុក (Facebook) របស់លោកថា មិនអត់ឱនឲ្យអ្នកណាដែលលោកចាត់ទុកថា និយាយមួលបង្កាច់បង្ខូចកិត្តិយសគណបក្សប្រជាជនកម្ពុជា ទៀតឡើយ។ លោកថា គណបក្សកាន់អំណាច គោរពសិទ្ធិបញ្ចេញមតិ ប៉ុន្តែប្រឆាំងដាច់ខាតចំពោះអ្នកមួលបង្កាច់បង្ខូចកិត្តិយស និងសេចក្ដីថ្លៃថ្នូរគណបក្ស។
បន្តបន្ទាប់នោះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានធ្វើជាដើមបណ្ដឹងប្ដឹងឲ្យតុលាការ ទាមទារសំណងជំងឺចិត្តពីលោក អ៊ូ វីរៈ ចំនួន ៤០០លានរៀល ឬស្មើប្រមាណ ១០ម៉ឺនដុល្លារ។
ទោះបីជាយ៉ាងណា លោក អ៊ូ វីរៈ ឲ្យដឹងថា លោកមិនទាន់ទទួលបានដីកានេះនៅឡើយ ដែលលោកនឹងពិចារណាជាមួយមេធាវីថា នឹងចូលខ្លួន ឬយ៉ាងណា។ លោកយល់ថា អ្វីដែលលោកព្រួយបារម្ភបំផុតក្នុងពេលនេះ គឺជាការរឹតត្បិតសេរីភាពយុវជនជំនាន់ក្រោយជាពន្លកថ្មីទើបចាប់ផ្ដើមចូលរួមបញ្ចេញមតិរឿងរសើប និងនិយាយការពិត។
លោក អ៊ូ វីរៈ ថ្លែងថា «តាមពិតត្រូវសួរឯកឧត្ដម សុខ ឥសាន សិន ដើម្បីសម្រេចចិត្តគិតថា ត្រូវចាំបាច់ហៅខ្ញុំ ឬក៏អត់? បានន័យថា ធ្វើការសន្និដ្ឋានតាមអ្នកត្រូវបានគេចោទហ្នឹង មិនមែនរកភស្តុតាងដោះបន្ទុកខ្លួនឯងមិនមែនទេ។ អ្នកប្ដឹងទេបានមានកាតព្វកិច្ចដាក់បន្ទុក នេះសំខាន់មែនទែនស្រុកយើង អត់ទាន់មានសោះ ខ្ញុំសោកស្ដាយដែរ»។
លោក អ៊ូ វីរៈ បានវិភាគនៅក្នុងការផ្សាយរបស់វិទ្យុអាស៊ីសេរី ថា "យុទ្ធសាស្ត្ររបស់គណបក្សកាន់អំណាចនៅពេលនេះ គឺព្យាយាមគាបសង្កត់លោក កឹម សុខា និងហិរញ្ញវត្ថុរបស់លោក"។ បញ្ហានេះ គណបក្សប្រជាជន យល់ឃើញថា ការលើកឡើងរបស់លោក អ៊ូ វីរៈ គឺជាការបំភ្លៃរឿងរ៉ាវស្នេហាឯកជនរបស់លោក កឹម សុខា និងនាង ខុម ចាន់តារាទី ទៅជាយុទ្ធសាស្ត្ររបស់គណបក្សកាន់អំណាច គឺបំផ្លើស និងធ្វើឲ្យប៉ះពាល់ដល់កិត្តិយស និងជាការបរិហារកេរ្តិ៍គណបក្សប្រជាជនកម្ពុជា។
ទាក់ទងនឹងការប្ដឹងលោក អ៊ូ វីរៈ នេះ ក្នុងទំព័រហ្វេសប៊ុករបស់ស្ថានទូតអាមេរិក កាលពីថ្ងៃទី២៥ ខែមេសា បញ្ជាក់ថា អង្គការសង្គមស៊ីវិល មានតួនាទីសំខាន់ណាស់ក្នុងការផ្សព្វផ្សាយសិទ្ធិមនុស្ស អភិបាលកិច្ចល្អ និងសិទ្ធិសេរីភាពជាសកល។ កម្ពុជា មានសំណាងដោយមានអង្គការសង្គមស៊ីវិលរឹងប៉ឹង និងរស់រវើក ដែលដឹកនាំដោយប្រធានអង្គការមួយចំនួន ដូចជាប្រធានអង្គការវេទិកាអនាគត លោក អ៊ូ វីរៈ និងប្រធានអង្គការមួយចំនួនទៀត។
លោក អ៊ូ វីរៈ ជាមេដឹកនាំមួយក្នុងចំណោមមេដឹកនាំអង្គការសង្គមស៊ីវិលជាច្រើន ដែលបានជួបពិភាក្សាជាមួយរដ្ឋមន្ត្រីក្រសួងការបរទេសសហរដ្ឋអាមេរិក លោក ចន ឃែរី (John Kerry) ក្នុងដំណើរទស្សនកិច្ចរបស់លោកនៅកម្ពុជា កាលពីខែមករា ឆ្នាំ២០១៦៕
No comments:
Post a Comment