Mon, 22 February 2016 ppp
ម៉ិច ដារ៉ា
 |
| ក្រុមគ្រួសារដែលមានប្ដីប្រពន្ធឆ្លងមេរោគ HIV/AIDS អង្គុយនៅក្រោមផ្ទះស្ថិតនៅក្នុងភូមិពាម ស្រុកមុខកំពូល ខេត្តកណ្ដាលម្សិលមិញ។ ហុង មិនា |
កណ្តាលៈ អ្នកភូមិពាមក្នុងឃុំសំបួរ ស្រុកមុខកំពូលមានការខ្វល់ខ្វាយយ៉ាងខ្លាំងចំពោះការឆ្លងមេរោគអេដស៍ខណៈដែលលទ្ធផលនៃការធ្វើតេស្តឈាមទៅលើអ្នកភូមិចំនួន ២០ នាក់មាន ១៤ នាក់ត្រូវបានគេរកឃើញថាមានឆ្លងមេរោគអេដស៍។
ក្រុមគ្រូពេទ្យនៃក្រសួងសុខាភិបាលត្រូវបានគេរំពឹងថានឹងទៅដល់ភូមិពាមនៅព្រឹកថ្ងៃចន្ទនេះដើម្បីយកសំណាកឈាម។ ទន្ទឹមនឹងនេះដែរមានពាក្យចចាមអារ៉ាមពីផ្ទះមួយទៅផ្ទះមួយថាម្ជុលរបស់គ្រូពេទ្យក្នុងភូមិម្នាក់ឈ្មោះ ភារម្យ គឺជាប្រភពនៃការចម្លងមេរោគអេដស៍ប៉ុន្តែគ្រូពេទ្យរូបនេះបានច្រានចោលនូវការចោទប្រកាន់នេះជាដាច់ខាតកាលពីម្សិលមិញ។
ស្រ្តីអ្នកភូមិពាមអាយុ ៧៣ ឆ្នាំ ម្នាក់ ឈ្មោះ វិច្ឆិកា មិនបានចាកចេញទៅណាទេក្នុងអំឡុងពេលនៃដំណើរចុះទៅជួបរបស់ភ្នំពេញប៉ុស្តិ៍ទៅផ្ទះគាត់កាលពីព្រឹកម្សិលមិញ។ ស្រ្តីចំណាស់រូបនេះកោរក្បាល ហើយត្របកភ្នែករបស់គាត់ធ្លាក់។ គាត់ញញឹមច្រើនប៉ុន្តែមានទឹកមុខនឿយហត់យ៉ាងច្បាស់។ ប្រាំមួយឆ្នាំកន្លងមកហើយលោកយាយបានថែទាំកូនប្រុសច្បងរបស់លោកយាយខណៈពេលដែលឈាមហូរចេញពីច្រមុះមាត់ និងស្បែករបស់កូនប្រុស។ កូនប្រុសលោកយាយបានឆ្លងមេរោគអេដស៍ហើយបានស្លាប់ចោលប្រពន្ធ និងកូនពីរនាក់ក្នុងអាយុ ២៦ ឆ្នាំ។ ឥឡូវនេះលោកយាយ វិច្ឆិកា មានអារម្មណ៍ទទួលរងនូវផលប៉ះពាល់នៃមេរោគនេះដោយផ្ទាល់។ «ខ្ញុំមិនបានគិតអំពីការឆ្លងទេ។ បន្ទាប់មកកាលពីឆ្នាំមុនខ្ញុំបានចាប់ផ្តើមធ្លាក់ខ្លួនឈឺ។ គ្រូពេទ្យបានមកដល់ទីនេះហើយបានប្រាប់ខ្ញុំថាខ្ញុំមានផ្ទុកមេរោគអេដស៍»។
អ្នកជិតស្និទ្ធម្នាក់របស់ស្ត្រីចំណាស់រូបនេះឈ្មោះ នារី អាយុ ៦៥ ឆ្នាំបានមកលេងខណៈដែលភ្នំពេញប៉ុស្តិ៍កំពុងនិយាយជាមួយស្ត្រីចំណាស់រូបនេះ។ ស្ត្រីដែលបានទទួលការធ្វើរោគវិនិច្ឆ័យនៅថ្ងៃទី ១៣ ខែកុម្ភៈរូបនេះនិយាយថា៖ «ខ្ញុំមិនមានរោគសញ្ញាអ្វីទេ។ ប៉ុន្តែមានពាក្យចចាមអារ៉ាមថាមនុស្សច្រើននាក់បានឆ្លងមេរោគអេដស៍ដូច្នេះខ្ញុំបានធ្វើតេស្ត»។
ការធ្វើរោគវិនិច្ឆ័យនាពេលថ្មីៗនេះភាគច្រើនក្នុងភូមិពាមបានធ្វើឡើងលើមនុស្សចាស់ជរាដែលភាគច្រើនមិនត្រូវបានចាត់ទុកថាជាជនស្ថិតក្នុងគ្រោះថ្នាក់ដោយសារជំងឺអេដស៍នោះទេ។
លោកយាយ វិច្ឆិកា ថ្លែងថា៖ «ខ្ញុំមិនដឹងថាហេតុអ្វីបានជាខ្ញុំមានផ្ទុកមេរោគនេះទេពីព្រោះខ្ញុំមិនដែលរួមភេទទេ។ នៅពេលដែលខ្ញុំបានប្រាប់គេ [ខ្ញុំមានផ្ទុកមេរោគអេដស៍] គេភ្ញាក់ផ្អើលជាខ្លាំងដោយសារខ្ញុំរស់នៅតែម្នាក់ឯង និងទៅវត្តអារាម»។
ស្ត្រីចំណាស់នៅភូមិពាមដែលមានឆ្លងមេរោគអេដស៍។ ហុង មិនា
ទាំងលោកយាយ វិច្ឆិកា និងលោកយាយ នារី បានឱ្យដឹងថាពួកគាត់បានទទួលការចាក់ថ្នាំពីលោកវេជ្ជបណ្ឌិត ភារម្យ ទោះបីជាពួកគេមិនបានចោទប្រកាន់លោកវេជ្ជបណ្ឌិតរូបនេះក៏ដោយ។ លោកយាយ នារី បន្ថែមថា៖ «អ្នករាល់គ្នាដែលលោកវេជ្ជបណ្ឌិតបានចាក់ថ្នាំមានការព្រួយបារម្ភខ្លាំង»។
ប្រជាជនភាគច្រើននៅក្នុងភូមិពាមមានការភ័យបារម្ភថាបញ្ហាការកើតមានមេរោគអេដស៍នេះនឹងជាឧបសគ្គចំពោះការចូលដណ្តឹងកូនចៅរបស់ពួកគេ។
អាជ្ញាធរសុខាភិបាលបានបញ្ជាក់ថានៅក្នុងភូមិពាមមានករណីឆ្លងមេរោគអេដស៍ចំនួន ១៤ ករណីប៉ុន្តែប្រជាជនភាគច្រើនបំផុតមិនទាន់ប្រាកដនោះទេខណៈចំនួននេះនឹងអាចច្រើនជាងនេះ។
អ្នកភូមិអាយុ ៤៥ ឆ្នាំម្នាក់ឈ្មោះ សុភ័ក្ត្រ ដែលជាអ្នកនេសាទបានថ្លែងថា៖ «ប្រជាជន ៣០ ទៅ ៤០ នាក់មានផ្ទុកមេរោគអេដស៍ប៉ុន្តែមិនហ៊ាននិយាយ»។ ឥឡូវនេះទាំងលោក សុភ័ក្ត្រ និងប្រពន្ធរបស់លោកមានមេរោគអេដស៍។«យើងបាត់បង់ដីលុយហើយឥឡូវនេះបាត់បង់សុខភាពដោយសារអេដស៍»។ លោក សុភ័ក្ត្រ និងប្រពន្ធរបស់លោកបានបន្ទោសគ្រូពេទ្យ ភារម្យ ថាជាអ្នកបណ្តាលឲ្យពួកគាត់ឆ្លងមេរោគអេដស៍។
លោក សុភ័ក្ត្រ បានថ្លែងថា៖ «យើងចង់បានយុត្តិធម៌យើងមិនអាចទុកពេទ្យនេះបានទេ។ វាចប់ហើយសម្រាប់ខ្ញុំ»។
ក៏ប៉ុន្តែទោះជាយ៉ាងណាគ្រូពេទ្យ ភារម្យ បានបដិសេធចំពោះការចោទប្រកាន់របស់អ្នកភូមិដោយថ្លែងថាលោកគឺជាអ្នកដែលធ្លាប់ធ្វើការបណ្តុះបណ្តាលដល់គ្រូពេទ្យផ្សេងទៀតអំពីការប្រើប្រាស់ម្ជុលស៊ឺរ៉ាំងដើម្បីឲ្យមានសុវត្ថិភាព។
ប្រធានមន្ទីរសុខាភិបាលខេត្តកណ្តាលលោក គួយ ប៊ុនធឿន បានថ្លែងថាគ្រូពេទ្យដែលអ្នកភូមិចោទប្រកាន់នោះមានច្បាប់អនុញ្ញាតត្រឹមត្រូវពីស្ថាប័នពាក់ព័ន្ធ៕ TK/PS
(ឈ្មោះត្រូវបានផ្លាស់ប្តូរដើម្បីការពារអត្តសញ្ញាណប្រភព)
Jack Davis
No comments:
Post a Comment