ដោយ ម៉ម មុនីរតន៍
2015-07-30 rfa
2015-07-30 rfa
 |
| អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ក្នុងវេទិកាអ្នកស្ដាប់វិទ្យុអាស៊ីសេរី នៅថ្ងៃទី២៧ ខែកញ្ញា ឆ្នាំ២០១៣។
Photo: RFA
|
មន្ត្រីអង្គការលីកាដូ (Licadho) ប្រតិកម្មការចោទប្រកាន់របស់ លោក ផៃ ស៊ីផាន មកលើអង្គការលីកាដូ ដែលអះអាងថា ស្ថាប័នក្រៅរដ្ឋាភិបាលមួយនេះបានសារភាពកំហុស ជុំវិញការចេញផ្សាយរបាយការណ៍រឿងវិវាទដីធ្លីនៅកម្ពុជា។ លោក អំ សំអាត ចាត់ទុកថា ការស្រាយបំភ្លឺរបស់ លោក ផៃ ស៊ីផាន នោះ គឺមិនអាចជឿទុកចិត្តបានឡើយ។
មន្ត្រីជាន់ខ្ពស់នៃអង្គការលីកាដូ បញ្ជាក់ថា ស្ថាប័នរបស់ខ្លួននៅតែប្រកាន់គោលជំហរដូចមុន គឺពុំបានសុំទោសណាមួយ ជុំវិញរបាយការណ៍ដែលរកឃើញពីការកើនឡើងនៃជម្លោះដីធ្លី ដូចការបកស្រាយរបស់ លោក ផៃ ស៊ីផាន ឡើយ។
មូលហេតុដែលនាំឲ្យមានប្រតិកម្មដ៏កម្ររបស់អង្គការលីកាដូ នៅពេលនេះ ធ្វើឡើងរយៈពេល ៣ថ្ងៃបន្ទាប់ពី លោក ផៃ ស៊ីផាន ថ្លែងជាសាធារណៈនៅក្នុងវេទិកាអ្នកស្ដាប់វិទ្យុអាស៊ីសេរី កាលពីរាត្រីថ្ងៃទី២៨ កក្កដា កន្លងទៅនេះ។
នៅក្នុងលិខិតបំភ្លឺមួយច្បាប់ដែលវិទ្យុអាស៊ីសេរី ទទួលបាននៅថ្ងៃទី៣០ ខែកក្កដា របស់អង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូ (Licadho) បានសរសេរថា ស្ថាប័នមិនមែនរដ្ឋាភិបាលមួយនេះ នៅតែប្រកាន់ជំហររក្សាខ្លឹមសារនៃសេចក្ដីថ្លែងការណ៍របស់ខ្លួន ដែលបានចេញផ្សាយកាលពីថ្ងៃទី១៩ កុម្ភៈ។ នៅក្នុងរបាយការណ៍កាលណោះ អង្គការលីកាដូ រកឃើញថា ទំហំនៃជម្លោះដីធ្លីបានកើនឡើងក្នុងឆ្នាំ២០១៤ ចំនួន ៣ដងនៃប្រជាពលរដ្ឋដែលរងផលប៉ះពាល់ប្រមាណជាង ១ម៉ឺនគ្រួសារ (១០.៦២៥គ្រួសារ) បើប្រៀបធៀបកាលពីឆ្នាំ២០១៣។
បន្ថែមលើលិខិតបំភ្លឺនេះ លោក អំ សំអាត មន្ត្រីជាន់ខ្ពស់នៃអង្គការលីកាដូ ចាត់ទុកសាររបស់ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ថាជាការបកស្រាយដែលពុំបានផ្អែកលើហេតុផលត្រឹមត្រូវ និងថែមទាំងពុំបានស្ថិតក្នុងហេតុការណ៍នោះទៀតផង។ លោកចាត់ទុកថា ការសំអាងហេតុរបស់ លោក ផៃ ស៊ីផាន បែបនេះ វាធ្វើឲ្យប៉ះពាល់ដល់សេចក្ដីថ្លៃថ្នូរស្ថាប័ននៃអង្គការលីកាដូ ដែលពុំបានដឹងអ្វីទាល់តែសោះនោះ។ លោកបន្តថា«យើងមានការសោកស្ដាយថា តើឯកឧត្ដម ផៃ ស៊ីផាន គាត់ដឹងថា តើអង្គការលីកាដូ សុំទោសក្រសួងដែនដី នគរូបនីយកម្ម ទាក់ទងចំនួនតួលេខទិន្នន័យរបស់ខ្លួនតាមរបៀបណា? យើងឥតបានជជែកគ្នា ឬពិភាក្សាអំពីបញ្ហាហ្នឹងផង»។
សកម្មភាពជនជាតិដើមភាគតិចព្នង ភូមិក្បាលរមាស ស្រុកសេសាន ខេត្តស្ទឹងត្រែង ឃាត់គ្រឿងចក្រក្រុមហ៊ុនចិន ស៊ីវ ហ្គិច (Saiv Hkech) កាលពីថ្ងៃទី១៥ ខែមិថុនា ឆ្នាំ២០១៥។ រូបភាពសហគមន៍
បើទោះជាបែបនេះក៏ដោយចុះ លោក ផៃ ស៊ីផាន រដ្ឋលេខាធិការ និងជាមន្ត្រីនាំពាក្យទីស្ដីការគណៈរដ្ឋមន្ត្រី បំភ្លឺកាលពីថ្ងៃទី២៨ កក្កដា ថា អង្គការលីកាដូ ពិតជាបានសារភាពចំពោះរដ្ឋាភិបាល ក្នុងកិច្ចពិគ្រោះយោបល់ជាមួយក្រសួងដែនដី នគរូបនីយកម្ម និងសំណង់ ថារបាយការណ៍ដែលបានចេញផ្សាយជុំវិញដីធ្លី ពិតជាមានភាពខុសឆ្គងមែន។ លោកបន្តថា «អង្គការក្រៅរដ្ឋាភិបាល ដូចជាលីកាដូ លោកបានផ្សព្វផ្សាយទិន្នន័យច្រើនណាស់ ដែលទិន្នន័យទាំងនោះ គឺវាមិនឆ្លើយតបជាមួយនឹងអ្វីដែលជាការជាក់ស្ដែង ដូចជាលីកាដូ ហ្នឹង បានក្រសួងដែនដី នគរូបនីយកម្ម និងសំណង់ អញ្ជើញឲ្យធ្វើការផ្ទៀងផ្ទាត់បញ្ចេញផ្សាយតួលេខលោក ប៉ុន្តែចុងក្រោយ លីកាដូ បានសុំទោសការរាយការណ៍របស់ខ្លួនចំពោះរដ្ឋាភិបាល»។
ពាក់ព័ន្ធវិវាទនេះ អង្គការលីកាដូ បានបំភ្លឺក្នុងរបាយការណ៍របស់ខ្លួនបន្ថែម ដោយយោងលើកិច្ចប្រជុំកាលពីថ្ងៃទី៧ ខែឧសភា ថា ក្រសួងដែនដី មានការយល់ច្រឡំពីចំនួនករណីរវាងចំនួនគ្រួសារដែលរងប៉ះពាល់។
ភាពផ្ទុយគ្នានោះ នៅត្រង់ថា របាយការណ៍អង្គការនិយាយពីការកើនឡើងនៃចំនួនគ្រួសាររងផលប៉ះពាល់ដោយសារទំនាស់ដីធ្លី។ ផ្ទុយពីនេះ ក្រសួងដែនដី វិញ បែរជាយល់ថា សេចក្ដីថ្លែងការណ៍របស់អង្គការលើកឡើងនូវករណីទំនាស់ដីធ្លីមានការកើនឡើងទៅវិញ៕
No comments:
Post a Comment