2015-07-29
 |
| អ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស អ្នកស្រី រ៉ាវីណា ហ្សាំសាដានី (Ravina Shamsadani)។
Photo courtesy of UN.org
|
អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ចេញសេចក្ដីបំភ្លឺប្រតិកម្មចំពោះអ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស អ្នកស្រី រ៉ាវីណា ហ្សាំសាដានី (Ravina Shamsadani) ដែលអ្នកស្រីស្នើឲ្យក្រុមប្រឹក្សាធម្មនុញ្ញ ទម្លាក់ចោលសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល និងដំណើរការកាត់សេចក្ដីសកម្មជនគណបក្សសង្រ្គោះជាតិ ទាំង ១១នាក់ ថាតុលាការមិនឯករាជ្យ។
សេចក្ដីបំភ្លឺនេះអះអាងថា អ្នកស្រី រ៉ាវីណា ហ្សាំសាដានី បានចោទប្រកាន់គ្មានមូលដ្ឋាន និងកំពុងបំពានទាំងកំរោលលើគោលការណ៍នីតិរដ្ឋ និងបានបង្ហាញយ៉ាងច្បាស់ពីការមិនយល់រដ្ឋធម្មនុញ្ញរបស់កម្ពុជា ជាពិសេសបង្ហាញពីការជ្រៀតជ្រែកចូលយ៉ាងជ្រៅរំលោភលើនីតិវិធី ពីព្រោះរាល់ការអនុម័តច្បាប់របស់កម្ពុជា ត្រូវធ្វើឡើងដោយរដ្ឋសភា ព្រឹទ្ធសភា និងប្រកាសឲ្យប្រើដោយព្រះមហាក្សត្រ។
ទាក់ទងតុលាការផ្ដន្ទាទោសសកម្មជន ១១នាក់វិញ អង្គភាពព័ត៌មាន និងប្រតិកម្មរហ័ស សម្ដែងការសោកស្ដាយបំផុតរបស់អ្នកស្រី ដែលបង្ហាញឥរិយាបថគាំទ្រជនល្មើសដែលប្រព្រឹត្តបទឧក្រិដ្ឋ កាលពីថ្ងៃទី១៥ ខែកក្កដា ឆ្នាំ២០១៤ ព្រោះថា ការសម្រេចផ្ដន្ទាទោសនេះជាសំណុំរឿងព្រហ្មទណ្ឌ និងជាឆន្ទានុសិទ្ធិរបស់តុលាការ មិនមានការជ្រៀតជ្រែករបស់រដ្ឋាភិបាលឡើយ។
ការចេញប្រតិកម្មរបស់អង្គភាពព័ត៌មាន និងប្រតិកម្មរហ័សនេះ គឺនៅបន្ទាប់ពីអ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស អ្នកស្រី រ៉ាវីណា ហ្សាំសាដានី បានចេញសេចក្ដីថ្លែងការណ៍កាលពីថ្ងៃទី២៤ កក្កដា ពាក់ព័ន្ធនឹងការចាប់ខ្លួនសកម្មជនគណបក្សប្រឆាំង ១១នាក់ ដោយបង្ហាញពីក្ដីបារម្ភចំពោះឯករាជភាពនៃតុលាការកម្ពុជា។ ក្នុងសេចក្តីថ្លែងការណ៍នោះ អ្នកស្រីលើកឡើងថា មានភាពមិនប្រក្រតីច្រើនក្នុងដំណើរការកាត់ក្ដីសកម្មជនទាំងនោះ។ អ្នកស្រីបានអំពាវនាវថា ប្រសិនបើមានការប្ដឹងឧទ្ធរណ៍ពីសំណាក់ជនជាប់ចោទទាំង ១១នាក់នោះ ដំណើរការកាត់ក្ដីនោះត្រូវតែមានការកែតម្រូវ និងបង្ហាញពីឯករាជ្យរបស់តុលាការ។
ក្រៅពីនេះទៀត អ្នកស្រីបានស្នើឲ្យក្រុមប្រឹក្សាធម្មនុញ្ញ ទម្លាក់ចោលសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ដែលរដ្ឋសភា និងព្រឹទ្ធសភាឯកបក្សបានអនុម័តនោះ៕
No comments:
Post a Comment