ស្ដាប់ ឬ ទាញយកសំឡេង
វត្តចិន-វៀតណាម មួយកន្លែងនៅរាជធានីភ្នំពេញ។ រូបថតថ្ងៃទី២០ ខែកុម្ភៈ ឆ្នាំ២០១៥. A Chinese-Vietnamese temple in Phnom Penh. Photo 20th February 2015.
RFA/Yeang Socheametta
ក្នុងពិធីបុណ្យចូលឆ្នាំចិន ឬចូលឆ្នាំវៀតណាម នេះ បើទោះជាជនជាតិវៀតណាម មួយចំនួនមិនបានវិលត្រឡប់ទៅស្រុកកំណើតពួកគេនៅប្រទេសវៀតណាម ដើម្បីជួបជុំសាច់ញាតិក្តី ក៏ពួកគេបានរៀបចំធ្វើពិធីបុណ្យនេះទៅតាមទំនៀមទម្លាប់ និងប្រពៃណីរបស់ពួកគេតែរៀងៗខ្លួន។
លោក យាង សុជាមេត្តា ដែលបានចុះទៅសង្កេតមើលសកម្មភាពរបស់ជនជាតិវៀតណាម ក្នុងថ្ងៃបុណ្យចូលឆ្នាំចិន នៅសង្កាត់ច្បារអំពៅ មានសេចក្តីរាយការណ៍អំពីសកម្មភាពជនជាតិវៀតណាម នៅទីនោះដូចតទៅ៖
ប្រជាពលរដ្ឋខ្មែរភាគច្រើននៅក្នុងទីក្រុងភ្នំពេញ បានដឹងហើយថា នៅក្នុងសង្កាត់ច្បារអំពៅ តាមបណ្តោយច្រាំងទន្លេត្រើយខាងកើតទន្លេបាសាក់ គឺជាសម្បុកនៃជនជាតិវៀតណាម ដ៏ធំបំផុតមួយនៅចំកណ្ដាលទីក្រុង។ នៅទីនោះ មិនថានៅថ្ងៃធម្មតា ឬថ្ងៃបុណ្យទាននោះទេ បើគេជិះចូលទៅកាន់តំបន់ដែលមានជនជាតិវៀតណាម រស់នៅនោះ គេតែងឮចម្រៀងវៀតណាម ចាក់លាន់ឮរំពង ជាពិសេសនៅតាមហាងកាហ្វេដែលមានម្ចាស់ជាជនជាតិវៀតណាម។
នៅថ្ងៃបុណ្យចូលឆ្នាំចិន វិញ ទិដ្ឋភាពនៅទីនោះហាក់ដូចជាប្លែកជាងថ្ងៃធម្មតាបន្តិច។ នៅតាមផ្ទះជនជាតិវៀតណាម នីមួយៗ មិនថាផ្ទះតូច ឬធំឡើយ ក្រៅតែពីឃើញមានតុបតែងលំអដោយផ្កាស្បៃរឿងពណ៌លឿង និងផ្ទះខ្លះទៀតមានចងដើមអំពៅខ្មៅនៅមុខផ្ទះ លំអដោយផ្លែឈើមួយចំនួនទៀត គេក៏ឃើញមានមនុស្សអង្គុយជុំគ្នាលេងបៀជាហូរហែ។ អ្នកខ្លះទៀតអង្គុយផឹកស៊ី និយាយស្រែកសប្បាយ។ ឯអ្នកខ្លះទៀតនាំគ្នាច្រៀងខារ៉ាអូខេរីករាយក្នុងក្រុមគ្រួសារ។
«សំឡេងរៀបរាប់របស់ជនជាតិវៀតណាម ជាភាសាវៀតណាម»
នេះជាការរៀបរាប់របស់បុរសជនជាតិវៀតណាម ម្នាក់ឈ្មោះ លី សុខា។ លោកប្រាប់ថា ក្នុងពេលចូលឆ្នាំកន្លងមក លោកក៏បានទៅស្រុកកំណើតជួបជុំញាតិមិត្តនៅប្រទេសវៀតណាម ដែរ ប៉ុន្តែនៅឆ្នាំនេះលោកមិនបានទៅទេ។ លោក លី សុខា អាយុ ៦៩ឆ្នាំ ដែលមិនត្រឹមតែចេះនិយាយភាសាខ្មែរនោះទេ ប៉ុន្តែលោកថាលោកចេះទាំងអាន និងសរសេរអក្សរខ្មែរជ្រៅជ្រះទៀតផង ព្រោះថា លោកបានឡើងមកប្រទេសកម្ពុជា តាំងពីឆ្នាំ១៩៨០ មកម្ល៉េះ។
ស្រដៀងទៅនឹងផ្ទះជនជាតិវៀតណាម ដទៃទៀតនៅក្នុងតំបន់នោះ ផ្ទះ លោក លី សុខា មានតុបតែងដោយក្រដាសលំអ និងមានដាក់ផើងផ្កាស្បៃរឿងមួយជួរនៅមុខសំយាបផ្ទះ ហើយនៅលើទ្វារចូលផ្ទះរបស់លោកនោះ មានដាក់អក្សរវៀតណាម ថា CHÚC MỪNG NĂM MỚI 2015 ដែលមានន័យជាខ្មែរថា សួស្តីឆ្នាំថ្មី ឆ្នាំ២០១៥។
ជនជាតិវៀតណាម ជួបជុំគ្នាក្នុងថ្ងៃបុណ្យចូលឆ្នាំចិន-វៀតណាម នាសង្កាត់ច្បារអំពៅ រាជធានីភ្នំពេញ កាលពីថ្ងៃទី២០ ខែកុម្ភៈ ឆ្នាំ២០១៥។ RFA/Yeang Socheametta
និយាយគ្នាលេងជាមួយខ្ញុំ ខណៈដែលកូនស្រីៗរបស់លោកពីរបីនាក់កំពុងច្រៀងខារ៉ាអូខេជាភាសាវៀតណាម នៅក្នុងផ្ទះ ដែលឋិតនៅជាប់មាត់ច្រាំងទន្លេ លោក លី សុខា អះអាងថា បើទោះជាលោកមិនបានទៅស្រុកជួបជុំសាច់ញាតិនៅវៀតណាម ក៏ដោយ ក៏លោកនៅតែសប្បាយ ព្រោះថាកូនចៅលោកបានមកជួបជុំរីករាយជាមួយគ្នាក្នុងរយៈពេល ៣ថ្ងៃនៃពិធីបុណ្យ៖ «កូនចៅមកផ្ទះលេង ការធ្វើបុណ្យនៅវៀតណាម និងនៅស្រុកខ្មែរប្រហាក់ប្រហែលគ្នាដែរហ្នឹង។ វៀតណាម ក៏អ៊ីចឹង ខ្មែរក៏អ៊ីចឹង ទទួលទេវតាឆ្នាំថ្មីដូចតែគ្នាហ្នឹង បងប្អូនគេនៅឆ្ងាយៗមកជួបជុំគ្នាលេងទៅមួយថ្ងៃពីរថ្ងៃ គេទៅស្រុកគេវិញទៅ ដូចជាអ្នកនៅកំពង់ចាម នៅព្រៃវែង ស្វាយរៀង មួយថ្ងៃពីរថ្ងៃ គេទៅវិញទៅ»។
ដើរចេញពីផ្ទះ លោក លី សុខា ប្រហែលជា ១០ម៉ែត្រ ខ្ញុំបានជួបបុរសជនជាតិវៀតណាម មួយក្រុមមានគ្នាប្រហែល ១០នាក់។ ពួកគេកំពុងអង្គុយហូបចុកជុំគ្នា។ នៅពេលសួរថា តើពួកគេសប្បាយអត់នៅឆ្នាំនេះ? ពួកគេឆ្លើយភ្លាមៗថា សប្បាយខ្លាំងណាស់។ ពួកគេហាក់ដូចជាមិនមានភាពញញើតញញើមអ្វីឡើយនៅពេលដឹងថា មានអ្នកកាសែតចុះយកព័ត៌មានអំពីសកម្មភាពរបស់ពួកគេក្នុងពេលចូលឆ្នាំដូច្នេះ។ ពួកគេបាននិយាយរាក់ទាក់ធម្មតាទៅកាន់អ្នកកាសែត។ តែតាមមើលទៅអាចមកពួកគេស្រវឹងខ្លះ។
នៅពេលសួរថា តើពួកគេមកប្រទេសកម្ពុជា យូរហើយឬនៅ? ពួកគេភាគច្រើនបានឆ្លើយថា បានមកតាំងពីឆ្នាំ១៩៧៩ មកម្ល៉េះ។ តែទោះជាយ៉ាងណា អ្នកខ្លះហាក់នៅមិនទាន់និយាយភាសាខ្មែរបានច្បាស់នោះទេ ប៉ុន្តែយល់ពាក្យសម្ដីដែលអាចឆ្លើយឆ្លងគ្នាបាន។ ពួកគេថា ឆ្នាំនេះពួកគេមិនបានទៅស្រុកកំណើតនៅវៀតណាម ទេ ដោយសារពួកគេរកស៊ីពុំសូវសល់ផល ឬសល់លុយកាក់ច្រើន។ ពួកគេនិយាយហាក់ដូចជាលេងសើចផងថា អ្នកមានគេទៅស្រុកអស់ហើយ នៅតែអ្នកក្រប៉ុណ្ណោះដែលមិនទៅ៖ «អ្នកខ្លះទៅ អ្នកខ្លះនៅ អ្នកក្រនៅហ្នឹង អ្នកមានគេទៅអស់ហើយ»។
បុរសជនជាតិវៀតណាម ទាំងនេះដែលភាគច្រើនអះអាងថា ប្រកបរបរជាអ្នកទិញលក់សម្ភារៈអេតចាយនោះ និយាយថា ក្រៅតែពីមានកម្មវិធីហូបចុកជុំគ្នានៅផ្ទះ ពួកគេពេលខ្លះក៏នាំកូនចៅទៅលេងកម្សាន្តនៅតាមមណ្ឌលកម្សាន្តនានា ដូចជានៅកោះពេជ្រ ឬទៅលេងនៅមុខព្រះបរមរាជវាំងជាដើម។ លើសពីនេះ ពួកគេក៏នាំគ្នាទៅវត្តវៀតណាម ដែលនៅក្បែរនោះ ដើម្បីយករបស់របរទៅវត្ត និងសែនព្រេនថ្វាយជីដូនជីតាផងដែរ៖ «ខ្លះទៅបងប្អូនពួកម៉ាក់មកផឹកស៊ីជុំគ្នា រាំសប្បាយ ទៅវត្ត យើងសែនបន្តិចបន្តួចឲ្យកុងម៉ា ពុកម៉ែបងប្អូនឲ្យសុខសប្បាយទាំងអស់»។
នៅក្បែរកន្លែងហូបចុករបស់បុរសជនជាតិវៀតណាម ទាំងនោះមានវង់បៀពីរបីវង់ជាប់ៗគ្នា។ ប៉ុន្តែអ្នកចូលរួមលេងបៀនោះ ពុំសូវមានបុរសទេ តែភាគច្រើនជាស្ត្រី និងមានក្មេងៗផងដែរ។ មើលទៅពួកគេហាក់ពុំសូវប្រកែប្រកាន់អ្វីឡើយ នៅពេលអ្នកយកព័ត៌មានចូលទៅសួរ និងថតសំឡេងពួកគេនោះ។
ជនជាតិវៀតណាម ទាំងនេះនិយាយថា ពួកគេមិនមានការបារម្ភ ឬខ្លាចក្រែងមានការរើសអើងពីប្រជាពលរដ្ឋខ្មែរអ្វីឡើយ នៅពេលពួកគេជួបជុំគ្នារៀបចំធ្វើពិធីបុណ្យចូលឆ្នាំចិន ឬចូលឆ្នាំវៀតណាម នៅក្នុងប្រទេសកម្ពុជា នោះ។ ពួកគេនិយាយថា ពួកគេដូចជាប្រជាពលរដ្ឋខ្មែរសុទ្ធសាធទៅហើយ។ ពួកគេបញ្ជាក់ថា មិនថាតែចូលឆ្នាំចិន នោះទេ ឲ្យតែគ្រប់ចូលឆ្នាំទាំងអស់ រាប់ទាំងចូលឆ្នាំខ្មែរផង ក៏ពួកគេចូលរួមប្រារព្ធ និងអបអរសាទរដូចគ្នាអ៊ីចឹងដែរ៕
2 comments:
Sam ma Sam Put tho, I thought it is the vietnamese prostitutions house, that the Bejing president go to buy sex. The CPP should send the authority to inspect this illegal vietnamese girls sex trafficking instead of Wat Samagi raingsey. Lol! Turboman
ចំពោះខ្មែរណា ដែលមើលឃើញថាយួនមានសិទ្ធីសេរីភាព ហើយលើកយករឿងយួន មកនិយាយថា អញ្ចេះ អញ្ចុះនោះ ច្បាស់ជារដ្ធាភិបានខ្មែរមិនសប្បាយចិត្តទេ ព្រោះគេមិនចង់ឲ្យអ្នកណា និយាយដូច្នោះទេ គេថាបង្កើតរឿង អុចអាល គេរង់ចាំដល់យួនកាន់កាប់ខ្មែរទាំងស្រុង ហើយត្រួតត្រាទាំងក្បាលគេទៀត នោះបានវាត្រឹមត្រូវ ចាំមើលទៅច្បាស់ជាមិនយូរប៉ុន្មានទៀតទេ ព្រោះយួនឈ្មោះខ្មែរទាំងអស់ហើយ រួចចេះខ្មែរជាងខ្មែរទៅទៀត។
Post a Comment