អគ្គលេខាធិការគណបក្សហ៊្វុនស៊ិនប៉ិច លោក ញឹក ប៊ុនឆៃ។
Photo: RFA
ជាងមួយខែហើយដែលសម្ដេចក្រុមព្រះនរោត្តម រណឫទ្ធិ ត្រូវបានអង្គសមាជផ្ដល់សេចក្ដីទុកចិត្តឲ្យធ្វើជាប្រធានគណបក្ស ហ៊្វុនស៊ិនប៉ិច ឡើងវិញ បន្ទាប់ពីព្រះអង្គត្រូវបានអង្គសមាជដូចគ្នានេះទម្លាក់ពីតំណែងជា ព្រះប្រធានម្ដងរួចមកហើយ កាលពីខែតុលា ឆ្នាំ២០០៦។
ការ ប្រឹងប្រែងស្ដារមុខមាត់ថ្មីរបស់សម្ដេចក្រុមព្រះមិនទាន់បាន ប៉ុន្មានផង ស្រាប់តែមានព័ត៌មានថា មន្ត្រីជាន់ខ្ពស់គណបក្សមួយនេះ ទំនងមើលមុខគ្នាមិនចំទាក់ទងនឹងការប្រើប្រាស់សិទ្ធិអំណាចរបស់ ខ្លួន។ យ៉ាងណាខាងគណបក្សហ៊្វុនស៊ិនប៉ិច បញ្ជាក់ថា មិនមានការបែកបាក់ផ្ទៃក្នុង ឬមើលមុខគ្នាមិនចំរវាងថ្នាក់ដឹកនាំគណបក្សឡើយ។
អនុប្រធាន ទី២គណបក្សហ៊្វុនស៊ិនប៉ិច លោក ញឹក ប៊ុនឆៃ ដែលជាអតីតមន្ត្រីជាន់ខ្ពស់ម្នាក់ ធ្លាប់បោះឆ្នោតទម្លាក់សម្ដេចក្រុមព្រះជាប្រធានគណបក្សកាលពីឆ្នាំ ២០០៦នោះ កំពុងតែត្រូវគណបក្សនេះវាយប្រហារដោយរិះគន់ថា លោកបានប្រើប្រាស់ត្រាគណបក្សដោយមិនឆ្លងការផ្ទេរសិទ្ធិពីសម្ដេច ក្រុមព្រះ។
គណបក្សហ៊្វុនស៊ិនប៉ិច ដោយមានលោក សាយ ហាក់ ជាអគ្គលេខាធិការប្រតិបត្តិ បានចេញសេចក្ដីជូនដំណឹងមួយកាលពីថ្ងៃទី២០ កុម្ភៈ ប្រាប់ទៅសមាជិករបស់គណបក្សនៅតាមរាជធានីខេត្តថា រាល់លិខិតចេញដោយលោក ញឹក ប៊ុនឆៃ ដោយយកត្រាគណបក្សទៅប្រើប្រាស់នោះ ពុំអាចចាត់ទុកជាលិខិតផ្លូវការទេ ព្រោះធ្វើឡើងដោយពុំមានលិខិតផ្ទេរសិទ្ធិពីសម្ដេចក្រុមព្រះ នរោត្តម រណឫទ្ធិ ជាព្រះប្រធានគណបក្សហ្វ៊ុនស៊ិនប៉ិច។
លិខិតជូន ដំណឹងនេះ ធ្វើឡើងបន្ទាប់ពីមានលោក ញឹក ប៊ុនឆៃ បានចេញលិខិតមួយកាលពីថ្ងៃទី១៨ កុម្ភៈ ប្រាប់ទៅថ្នាក់ដឹកនាំបក្សនៅតាមរាជធានីខេត្តឲ្យរក្សាភាព ស្ងៀមស្ងាត់ទាក់ទងការទម្លាក់ស្លាកគណបក្សនៅតាមមូលដ្ឋាន ហើយរក្សាស្លាកគណបក្សហ៊្វុនស៊ិនប៉ិចដដែល បន្ទាប់ពីមានពាក្យលេចឭថា សម្ដេចក្រុមព្រះបញ្ជាឲ្យរុះស្លាកគណបក្សហ៊្វុនស៊ិនប៉ិចចាស់នៅតាម មូលដ្ឋានចេញ។
លោក ញឹក ប៊ុនឆៃ ប្រាប់វិទ្យុអាស៊ីសេរី នៅថ្ងៃទី២២ កុម្ភៈថា ការទម្លាក់ស្លាកគណបក្សចេញ គឺជារឿងជ្រួលច្របល់មួយនៅតាមមូលដ្ឋាន ខណៈដែលខាងគណបក្សនៅមិនទាន់មានស្លាកគណបក្សហ៊្វុនស៊ិនប៉ិច ថ្មីដាក់នៅឡើយ។ លោកបន្តថា ដើម្បីស្តារស្ថានភាពនោះឲ្យប្រសើរឡើងវិញ ស្របពេលកាលណោះសម្ដេចក្រុមព្រះជាព្រះប្រធានអវត្តមានក្នុងស្រុក ហើយសម្ដេចនរោត្តម អរុណ រស្មី ជាអនុប្រធានទី១គណបក្សហ៊្វុនស៊ិនប៉ិច ក៏អវត្តមានដែរនោះ ក្នុងនាមលោកជាអនុប្រធានទី២គណបក្ស ក៏សម្រេចចេញលិខិតវាយត្រាគណបក្សផ្ញើទៅថ្នាក់ដឹកនាំមូលដ្ឋានដើម្បី ឲ្យពួកគាត់រក្សាស្លាកគណបក្សជាធម្មតាសិនដើម្បីរក្សាលំនឹងគណបក្ស។
លោក ញឹក ប៊ុនឆៃ៖ «ចំណុចត្រង់នេះមានការលើកឡើងពីលោក សាយ ហាក់ ថា ខ្ញុំបោះត្រាខុស ខ្ញុំចង់ឲ្យគាត់ពន្យល់ថា តើខ្ញុំបោះត្រាហ្នឹងវាខុសទៅលើស្អី? ខ្ញុំអនុប្រធានទី២គណបក្សមិនមានសិទ្ធិប្រើប្រាស់ត្រា ដើម្បីបោះត្រា»។
លោក ញឹក ប៊ុនឆៃ បញ្ជាក់ថា គ្មានច្បាប់ ឬលក្ខន្តិកៈគណបក្សដែលបញ្ជាក់ថា អនុប្រធានទី២ មិនមានសិទ្ធិប្រើត្រាគណបក្សនោះទេ។ យ៉ាងណាការប្រើប្រាស់ត្រាគណបក្សនោះ ត្រូវបានខាងអគ្គលេខាធិការប្រតិបត្តិគណបក្សហ៊្វុនស៊ិនប៉ិច លោក សាយ ហាក់ បញ្ជាក់ក្នុងលិខិតជូនដំណឹងថា ជាការប្រើប្រាស់មិនផ្លូវការរបស់គណបក្ស។
លោក ញឹក ប៊ុនឆៃ បញ្ជាក់ថា បើនិយាយពីរឿងមិនផ្លូវការវិញ គឺការតែងតាំងលោក សាយ ហាក់ ជាអគ្គលេខាធិការប្រតិបត្តិឯណោះទេ ទើបជារឿងមិនស្របច្បាប់។ លោកពន្យល់ថា តាមស្មារតីជួបប្រជុំគ្នានៃថ្នាក់ដឹកនាំកំពូលរបស់គណបក្ស ការតែងតាំងអគ្គលេខាធិការប្រតិបត្តិ ត្រូវមានការពិភាក្សារវាងប្រធានគណបក្ស និងអនុប្រធានគណបក្សទាំងពីរ តែការតែងលោក សាយ ហាក់ នោះមិនមានការពិភាក្សាជាមុនទេ។ មួយវិញទៀត ក្នុងលក្ខន្តិកៈគណបក្សដែលនៅជាធរមានត្រង់ជំពូកទី៥ ប្រការ១៨ ចែងថា ការជ្រើសរើសអគ្គលេខាធិការត្រូវជ្រើសរើសដោយក្រុមប្រឹក្សាជាតិ ដោយការបោះឆ្នោត មិនមែនតែងតាំងដោយប្រធានគណបក្សឡើយ។
ជុំវិញ ការតែងតាំងលោក សាយ ហាក់ ជាអគ្គលេខាធិការប្រតិបត្តិនេះ ជំនួយការផ្ទាល់សម្ដេចក្រុមព្រះ និងជាប្រធានទំនាក់ទំនងអន្តរជាតិជាមួយអង្គទូត លោក ញ៉េប ប៊ុនជិន បញ្ជាក់ថា សម្ដេចក្រុមព្រះប្រើអំណាចបុព្វសិទ្ធិរបស់ព្រះអង្គក្នុងការ ជ្រើសតាំងលោក សាយ ហាក់ ជាអគ្គលេខាធិការប្រតិបត្តិជំនួសលោក ញឹក ប៊ុនឆៃ ដែលបានឡើងតួនាទីជាអនុប្រធានទី២គណបក្ស។ លោកបញ្ជាក់ថា ដូច្នេះរាល់ការប្រើប្រាស់ត្រាគណបក្សត្រូវឆ្លងព្រះប្រធានគណបក្ស ជាមុន៖ «លិខិតនោះគ្រាន់តែជាព័ត៌មានទេ តែសម្ដេចក្រុមព្រះគាត់មានព្រះរាជទូលហើយថា សូមបងប្អូនទាំងអស់នៅក្នុងដំបូលរាជានិយមតែមួយក្រោមព្រះរាជ ដឹកនាំរបស់ព្រះអង្គជាព្រះប្រធានការប្រមូលផ្ដុំមកវិញនូវរាជានិយម និងអ្នកស្នេហាជាតិ»។
យ៉ាងណាជំនួយការផ្ទាល់សម្ដេចក្រុមព្រះ រូបនេះបញ្ជាក់ថា បញ្ហាទាំងនេះមិនមែនជាការបែកបាក់ផ្ទៃក្នុងរបស់គណបក្សទេ គឺគ្រាន់តែជាការជូនដំណឹងមួយឲ្យច្បាស់ក្នុងការប្រើប្រាស់ត្រា របស់គណបក្សឲ្យបានត្រឹមត្រូវតែប៉ុណ្ណោះ៕
1 comment:
this guy looks like guerrilla and as well as a traitor and Ah Ranarid looks like an impotent playboy. Kackel
Post a Comment