ដោយ៖ ប្រែង សត្យាភិរក្ស និងស៊ុន ណារិន | ថ្ងៃសុក្រ ទី29 សីហា 2014,
រូបអ្នកភូមិឡពាងទាំង៥នាក់ ដែលត្រូវបានដោះលែង (រូបថត៖ Krishan)
ប្រជាសហគមន៍៥នាក់ មានទាំងអ្នកភូមិឡពាង និងអ្នកភូមិផ្សេងទៀតដែលត្រូវបានចាប់ខ្លួនពាក់ព័ន្ធនឹងជម្លោះដីធ្លីនៅឡពាងខេត្តកំពង់ឆ្នាំង ត្រូវបានដោះលែងវិញហើយនៅរសៀលថ្ងៃសុក្រនេះ បន្ទាប់ពីមានការអន្តរាគមន៍ពីរដ្ឋមន្ត្រីក្រសួងយុត្តិធម៌។
អ្នកស្រី អ៊ុំ សុភី ដែលមានស្វាមីជាប់ពន្ធនាគារឈ្មោះស្ងួន ញឿន និងតំណាងឲ្យប្រជាពលរដ្ឋនៅឡពាង ប្រាប់ VOD ថាអ្នកភូមិទាំង៥នាក់ ត្រូវបានដោះលែងឲ្យនៅក្រៅឃុំបណ្តោះអាសន្ននៅម៉ោងប្រហែលជា៤រសៀល។
កាលពីថ្ងៃទី២៧ខែសីហា រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍនា បានផ្ញើលិខិតមួយទៅប្រធានតុលាការ និងព្រះរាជអាជ្ញាខេត្តកំពង់ឆ្នាំង ដើម្បីឲ្យពិនិត្យ និងស្នើឲ្យដោះលែងអ្នកត្រូវចាប់ខ្លួនទាំង៥នាក់ ពាក់ព័ន្ធនឹងជម្លោះដីធ្លីជាមួយភរិយាលោករដ្ឋមន្ត្រីក្រសួងធនធានរ៉ែ និងថាមពល។
លិខិតរបស់ក្រសួងយុត្តិធម៌ ធ្វើឡើងស្របតាមសំណើរបស់តំណាងរាស្ត្រគណបក្សប្រជាជនកម្ពុជា មណ្ឌលកំពង់ឆ្នាំង លោក ស្រី កែវ ច័ន្ទមុនី ដែលបានស្នើសុំកិច្ចអន្តរាគមន៍ពីរដ្ឋមន្ត្រី សុំធានាឲ្យប្រជាសហគមន៍ទាំង៥នាក់នៅក្រៅឃុំ។
អង្គការលីកាដូ ឲ្យដឹងថា អ្នកភូមិទាំង៥នាក់ ត្រូវបានដោះលែង និងដាក់ឲ្យស្ថិតនៅក្រោមការត្រួតពិនិត្យរបស់តុលាការដោយភ្ជាប់ជាមួយលក្ខខណ្ឌ៣យ៉ាងគឺ៖ ទីមួយ ត្រូវចូលខ្លួនបង្ហាញមុខក្នុងតុលាការ នៅពេលមានដីកាកោះហៅ ទីពីរ មិនត្រូវផ្លាស់ប្តូរទីកន្លែងស្នាក់នៅដោយមិនមានការជូនដំណឹងដល់អាជ្ញាធរ និងទីបី ត្រូវបង្ហាញខ្លួនដល់នគរបាលប៉ុស្តិ៍ក្នុងតំបន់ជារៀងរាល់ខែ។
កន្លងទៅ អ្នកភូមិឡពាង និងអ្នកភូមិមួយចំនួនទៀត បានឡើងមកភ្នំពេញ ដើម្បីដាក់ញត្តិទៅកាន់ស្ថាប័នរដ្ឋ និងខុទ្ទកាល័យលោកនាយករដ្ឋមន្ត្រី ទាមទារឲ្យដោះលែងតំណាងភូមិ៥នាក់ដោយគ្មានលក្ខខណ្ឌដោះស្រាយបញ្ចប់ជម្លោះដីធ្លីឲ្យបានឆាប់។ ពួកគេក៏ទាមទារឲ្យបញ្ឈប់រាល់ការចោទប្រកាន់នានា ទៅលើតំណាងរបស់ពួកគាត់។
កាលពីថ្ងៃទី២១ខែកក្កដា ឆ្នាំ២០១៤ អាជ្ញាធរបានចាប់ខ្លួនមនុស្សពីរនាក់ គឺលោក ម៉ាង យ៉ាវ និងលោក សៀង ហេង។ ចំណែកនៅថ្ងៃទី១២ខែសីហា អាជ្ញាធរបានចាប់ខ្លួនមនុស្ស៣នាក់ទៀត គឺលោក គុជ ហុក លោក ស្រ៊ុន ផា និងលោក ស្ងួន ញឿន នៅពេលពួកគាត់ឡើងមកដាក់ញត្តិនៅភ្នំពេញ។
យ៉ាងណាក៏ដោយ ក្រុមកម្មករសំណង់ចំនួន២៨នាក់ ធ្វើការនៅក្រុមហ៊ុនខេឌីស៊ីដែលជាភាគីទំនាស់ ក៏បាននាំគ្នាឡើងមកដាក់ញត្តិនៅស្ថាប័នរដ្ឋ និងអង្គការសង្គមស៊ីវិលផងដែរ ដោយសុំអន្តរាគមន៍កុំឲ្យមានការដោះលែងតំណាងអ្នកទាំង៥នាក់ ដែលពួកគេចោទថាបានបង្ករបួសស្នាមលើពួកគេ៕
សូមសរសេរមកលោក ប្រែង សត្យាភិរក្ស តាមរយៈ phireak1988.kth@gmail.com
No comments:
Post a Comment