សកម្មភាពប្រជាពលរដ្ឋខ្មែរដែលអាជ្ញាធរថៃ ចាប់បញ្ជូនមកដាក់ចំណុចរង្វង់មូលខាងមុខច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ នៅថ្ងៃទី១២ ខែមិថុនា ឆ្នាំ២០១៤។
RFA/Soun Sophalmony
ពាណិជ្ជករ និងមន្ត្រីសេដ្ឋកិច្ចថៃ អះអាងថា ការបោសសម្អាតពលករខ្មែរ និងពលករខុសច្បាប់បរទេសដទៃទៀតនៅថៃ នាពេលនេះ ធ្វើឲ្យសេដ្ឋកិច្ចថៃ ដែលកំពុងតែងើបឡើងវិញនេះ ដាំក្បាលចុះទៅវិញយ៉ាងធ្ងន់ធ្ងរ ហើយចង់ពលករទាំងនោះ ត្រឡប់ទៅធ្វើការនៅថៃវិញ ជាបន្ទាន់។
កាសែតថៃ បាងកកប៉ុស្តិ៍ (Bangkok Post) ចុះផ្សាយថ្ងៃទី១៦ មិថុនា ថា ការបោសសម្អាតពលករបរទេស របស់រដ្ឋាភិបាលយោធាថៃ លើកនេះ ធ្វើឲ្យប៉ះពាល់គម្រោងសាងសង់ផ្នែកអចលនទ្រព្យ និងហេដ្ឋារចនាសម្ព័ន្ធគមនាគមន៍ទំនើបៗរបស់ថៃ ដែលមានគម្រោងទឹកប្រាក់សាងសង់រាប់ពាន់លានបាត ដោយសារតែខ្វះកម្លាំងពលកម្ម។
កាសែតដដែល បានស្រង់សម្ដីពាណិជ្ជករ និងមន្ត្រីសេដ្ឋកិច្ចថៃ ថា ដើម្បីកុំឲ្យប៉ះពាល់ដល់កំណើនសេដ្ឋកិច្ចថៃ និងកុំឲ្យប៉ះពាល់ដល់ដំណើរការ នៃគម្រោងសាងសង់ថៃទាំងនោះ រដ្ឋាភិបាលថៃគូរចាត់វិធានការបន្ទាន់ណាមួយ ធ្វើយ៉ាងណាទាក់ទាញពលករទាំងអស់ ឲ្យវិលទៅធ្វើការនៅថៃវិញ។ ជាពិសេសទាក់ទាញពលករខ្មែរ ដែលកំពុងនាំគ្នាសម្រុករត់គេចខ្លួនចេញមកពីប្រទេសថៃ។
ពាណិជ្ជករថៃខ្លះ ត្រូវបានកាសែតបាងកកប៉ុស្តិ៍ស្រង់សម្ដីថា គ្រាន់តែនៅក្នុងទីក្រុងបាងកកតែមួយ ថៃត្រូវការពលករចំនួនប្រមាណ ៣ សែននាក់ទៅហើយ។
ការបោសសម្អាតពលករបរទេសខុសច្បាប់នៅថៃពេលនេះ មិនត្រឹមតែប៉ះពាល់ដល់សេដ្ឋកិច្ចខ្នាតធំថៃទេ តែប៉ះពាល់ដល់សហគ្រាស ពាណិជ្ជកម្មខ្នាតមធ្យម និងខ្នាតតូច ឬសូម្បីតែអ្នកស្រែចម្ការថៃ ក៏រងផលប៉ះពាល់ខ្លាំងដែរ ព្រោះពួកគេជួលពលករខ្មែរធ្វើកសិកម្ម។
ដើម្បីរក្សាដំណើរការនៃកំណើនសេដ្ឋកិច្ចថៃ ដែលកំពុងងើបឡើងវិញ អតីតរដ្ឋមន្ត្រីក្រសួងសេដ្ឋកិច្ចថៃ លោក ធិរ៉ាឆៃ ភូវ៉ាណាត ណារ៉ារូបបាឡា (Thirachai Phuvanatnaranubala) បានព្រមានថា រដ្ឋាភិបាលថៃគូរធ្វើយ៉ាងណា ប្រមូលពលករបរទេស ដែលរដ្ឋាភិបាលថៃបច្ចុប្បន្នកំពុងបណ្ដេញចេញ ឲ្យទៅធ្វើការនៅថៃវិញ។
ជាពិសេស លោកបានជំរុញឲ្យរដ្ឋាភិបាលថៃ ប្រមូលពលករខ្មែរទៅធ្វើការវិញ ដោយកាសែតនេះបានស្រង់សម្ដីថា ៖ «យ៉ាងណាក៏ដោយ ការចរចានានា ត្រូវតែចាប់ផ្ដើមធ្វើដើម្បីយកពលករកម្ពុជាត្រឡប់មកវិញ ឲ្យបានឆាប់ដែលអាចធ្វើទៅបាន»។
នៅខែមិថុនា ឆ្នាំ២០១៤ នេះ រដ្ឋាភិបាលយោធាថៃ បានធ្វើការបោសសំអាត ពលករបរទេសខុសច្បាប់ចេញពីប្រទេសថៃ ក្នុងមូលហេតុរក្សាសន្តិសុខសណ្ដាប់ធ្នាប់។ មកទល់ពេលនេះ មានពលករខ្មែរប្រហែល ១៤ ម៉ឺន នាក់ហើយត្រូវបានអាជ្ញាធរថៃ ចាប់បញ្ជូនមកស្រុកវិញ។
ដោយអត្រាគ្មនាការងារធ្វើនៅថៃ ស្ថិតនៅកម្រិតទាបគឺ ១ ភាគរយ បានធ្វើឲ្យប្រទេសថៃប្រឈមនឹងកង្វះកម្លាំងពលកម្ម ហើយប្រទេសនេះពឹងផ្អែកលើកម្លាំងពលកម្មមកពីប្រទេសជិតខាង ដូចជា៖ កម្ពុជា ឡាវ និងភូមា ឬមីយ៉ាន់ម៉ា ដែលមានកម្លាំងសរុបប្រហែល ៣ លាននាក់។
ក៏ប៉ុន្តែ ពលករបរទេសទាំងនោះ បានប្រឈមនឹងការរំលោភសិទ្ធិមនុស្ស និងប្រឈមនឹងលក្ខខណ្ឌការងារជាច្រើនដូចជា ការប្រឈមនឹងការចាប់ខ្លួន ទទួលប្រាក់ឈ្នួលថោក ឬត្រូវបានគេកេងប្រវ័ញ្ចកម្លាំងពលកម្ម ដោយថៅកែមិនបើប្រាក់ឈ្នួលឲ្យ ហើយជួនកាល ថែមទាំងប្ដឹងប៉ូលិសថៃចាប់ខ្លួនតែម្ដងក៏មាន ដោយសារពលករទាំងនោះធ្វើការខុសច្បាប់៕
No comments:
Post a Comment