ដោយ ជិន ជេដ្ឋា
2014-03-11
ស្ដាប់ ឬ ទាញយកសំឡេង
សកម្មភាពអូសអួនរុញជន និងម៉ាញ់របស់ជនជាតិវៀតណាម កំពុងកើតមានច្រើននៅស្រុកកំពង់លែង ខេត្តកំពង់ឆ្នាំង។ ប្រជាពលរដ្ឋបញ្ជាក់ថា សកម្មភាពល្មើសទាំងនេះ ធ្វើឡើងទាំងយប់ទាំងថ្ងៃនៅក្នុងទឹកដីគ្រប់គ្រងរបស់ឃុំប្រឡាយមាស និងឃុំផ្លូវទូក ដោយពុំមានអាជ្ញាធរ ឬមន្ត្រីជំនាញចុះបង្ក្រាបឡើយ។
ប្រជាពលរដ្ឋមកពីឃុំប្រឡាយមាស និងឃុំផ្លូវទូក ជាច្រើននាក់ បានប្រាប់ឲ្យដឹងនៅថ្ងៃទី១១ ខែមីនា ថា សកម្មភាពចាប់ត្រីខុសច្បាប់បានកើតមានច្រើនតាំងពីអំឡុងខែមករា ឆ្នាំ២០១៤ និងមិនអាចបង្ក្រាបបានរហូតមកដល់បច្ចុប្បន្ន។ ពួកគាត់សង្ស័យថា អាជ្ញាធរ និងមន្ត្រីជំនាញជលផល មានការត្រូវរ៉ូវគ្នាជាមួយជនល្មើស។
ចំណែកមន្ត្រីជលផល បានច្រានចោលការចោទប្រកាន់នេះ ហើយបញ្ជាក់ថា ខ្លួនកំពុងធ្វើសកម្មភាពបង្ក្រាបបទល្មើសលូស្បៃមុង និងសម្រាស់នៅតាមតំបន់មួយចំនួន នៃឃុំទាំងពីរនោះហើយ។
ប្រជាពលរដ្ឋម្នាក់រស់នៅឃុំប្រឡាយមាស លោក ឈឹម គឹមសៀក មានប្រសាសន៍ថា ការចាប់ត្រីរបស់ជនជាតិវៀតណាម ម្ដងៗមានគ្នាចន្លោះពី ៨នាក់ ទៅ ២០នាក់ និងមានទូកខ្នាតធំចាប់ពី ២គ្រឿងឡើង ហើយភាគច្រើនធ្វើសកម្មភាពនៅពេលយប់។ លោកបន្តថា ក្រៅពីបទល្មើសនេះ នៅមានសកម្មភាពដាក់កន្សុំ និងហ៊ុមសម្រាស់ខ្នាតធំជាច្រើនកន្លែងទៀត ក្នុងទឹកដីឃុំប្រឡាយមាស៖ «គ្មានបានដេកទេប្រជាពលរដ្ឋ ហើយដាច់មងប្រជាពលរដ្ឋអត់មានអ្នកណាមួយដោះស្រាយឲ្យទេ សូម្បីតែជលផល សហគមន៍នៅក្នុងភូមិហ្នឹង គឺអត់មានអើពើឡើយ ព្រោះអីបើយើងទៅសួរគាត់ៗថាបង់លុយឲ្យសហគមន៍រួចទៅហើយ»។
ឆ្លើយតបនឹងបញ្ហានេះ នាយខណ្ឌរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន បញ្ជាក់ថា លោក និងមន្ត្រីជំនាញជលផល កំពុងតែធ្វើសកម្មភាពបង្ក្រាបបទល្មើសនៅក្នុងទឹកដីឃុំទាំងពីរនេះ ក៏ប៉ុន្តែមិនឃើញមានបទល្មើសជន ម៉ាញ់ ឬអួនឡើយ។ លោកបន្តថា ប្រជាពលរដ្ឋភាគច្រើនបានចោទប្រកាន់ទៅលើអាជ្ញាធរ និងមន្ត្រីជំនាញថា ឃុបឃិតជាមួយជនល្មើសដោយគ្មានភស្តុតាងច្បាស់លាស់៖ «ឲ្យគាត់តេ (ទូរស័ព្ទ) មកចុះ ទូរស័ព្ទរបស់ខ្ញុំគាត់ស្គាល់ហើយ អាចតេមកទាំងយប់ក៏បានដែរ ដើម្បីខ្ញុំចាត់ការ ប៉ុន្តែខ្ញុំសូមឲ្យព័ត៌មានហ្នឹងជាក់លាក់ ដូចយប់មិញអីអ៊ីចឹងៗ ខ្ញុំមានព័ត៌មានពីចំណុចក្ដីកាគងមក គឺខ្ញុំចាត់ការភ្លាម គឺទទួលបានលទ្ធផលភ្លាម»។
មន្ត្រីសម្របសម្រួលសហគមន៍នៃអង្គការសម្ពន្ធភាពដើម្បីអភិរក្សធនធានជលផល លោក អ៊ុក សុផាត ថ្លែងថា សកម្មភាពប្រព្រឹត្តបទល្មើសពិតជាកើតមានច្រើនមែននៅឃុំផ្លូវទូក និងឃុំប្រឡាយមាស កាលពីសប្ដាហ៍មុន ក៏ប៉ុន្តែលោកឃើញអាជ្ញាធរ និងមន្ត្រីជំនាញចុះបង្ក្រាបជាប់ៗគ្នាមកនេះឃើញថា សកម្មភាពល្មើសទាំងនោះបានថយចុះ៖ «ខេត្តកំពង់ឆ្នាំង នៅតំបន់ឆ្នុកទ្រូ នេះឯង គឺបច្ចុប្បន្នមិនមានសកម្មភាពទេ ដែលមានសកម្មភាពនៅតំបន់ផ្លូវទូក ហើយនិងតំបន់ប្រឡាយមាស ដែលធ្វើបទល្មើសនេះ គឺនៅពេលយប់»។
មន្ត្រីជំនាញជលផល និងអាជ្ញាធរតែងតែទាមទារឲ្យមានការចូលរួមពីប្រជាពលរដ្ឋ ឬសហគមន៍ក្នុងការទប់ស្កាត់បទល្មើសនេសាទឲ្យមានប្រសិទ្ធភាព តាមរយៈការផ្ដល់ព័ត៌មានតាមទូរស័ព្ទ ឬដោយផ្ទាល់។ ទូរស័ព្ទរបស់នាយខណ្ឌរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន គឺលេខ ០៨៨៨ ៨៣៧ ២៦៨ ឬ ០១៦ ៨៣៧ ២៦៨៕
No comments:
Post a Comment