24-01-2014, 
7:29 pm) | ដោយ ជា ធីរិទ្ធ ក្រោយពី រដ្ឋាភិបាលបានសម្រេចបង្កើតគណៈកម្មការស្រាវជ្រាវការកែទម្រង់ ការបោះឆ្នោត មន្ត្រីជាន់ខ្ពស់គណបក្សសង្គ្រោះជាតិ បានបង្ហាញការមិនចាប់អារម្មណ៍អ្វីសោះឡើយចំពោះគណៈកម្មការនេះ។ សម្រាប់គណបក្សប្រឆាំង គណៈកម្មការកែទម្រង់ការបោះឆ្នោតដែលបង្កើតដោយរដ្ឋាភិបាលពេលនេះ គ្មានប្រយោជន៍អ្វីបន្តិចនោះទេ។
មន្ត្រីជាន់ខ្ពស់គណបក្សសង្គ្រោះជាតិលោក សុន ឆ័យ នៅថ្ងៃនេះ បានចំអកឲ្យគណៈកម្មការស្រាវជ្រាវការកែទម្រង់ការបោះឆ្នោតដែលបង្កើត ដោយរដ្ឋាភិបាលកាលពីពេលថ្មីៗកន្លងទៅថា មិនមានប្រសិទ្ធិភាពក្នុងការកែទម្រង់ការបោះឆ្នោតនោះឡើយ។ លោកបានចាត់ទុកសកម្មភាពរបស់រដ្ឋាភិបាលពេលនេះ គ្រាន់តែជាកាធ្វើឲ្យល្អមើលបំភ័ន្តភ្នែកតែប៉ុណ្ណោះ។
មន្ត្រីជាន់ខ្ពស់គណបក្សប្រឆាំងរូបនេះ បានអះអាងថា ការសម្រេចរបស់រដ្ឋាភិបាលពេលនេះ គណបក្សប្រឆាំងមិនបានដឹងឮសោះឡើយ ហើយសមាសភាពនៅក្នុងគណបក្សនេះភាគច្រើនគឺជាមន្ត្រីគណបក្សប្រជាជន កម្ពុជា ។
លោក សុន ឆ័យ បានបន្តថា៖« យើងអត់ដឹងទេចំពោះការសម្រេចរបស់រដ្ឋាភិបាលពេលនេះ ហើយយើងគ្មានជំនឿទាល់តែសោះ គណៈកម្មការនេះគ្មានប្រយោជន៍សម្រាប់ការកែទម្រង់ការបោះឆ្នោតទេ មិនអាចទៅរួច ព្រោះសុទ្ធបក្សពួករបស់គេ»។
កាលពីថ្ងៃទី២៣ ខែមករា ម្សិលមិញនេះ រដ្ឋាភិបាលបានផ្សព្វផ្សាយ អំពីសេចក្តីសម្រេចរបស់ខ្លួនកាលពីថ្ងៃទី៩ ខែធ្នូ ឆ្នាំ ២០១៣ កន្លងទៅ ក្នុងការបង្កើតគណៈកម្មការស្រាវជាវ ការកែទម្រង់ការបោះឆ្នោត។ សេចក្តីសម្រេចនោះបានបង្ហាញពីរបៀបធ្វើការរបស់គណៈកម្មការនេះ ដោយតម្រូវឲ្យធ្វើការសិក្សាស្រាវជ្រាវលិខិតបទដ្ឋាននានាដែលទាក់ទង នឹងការបោះឆ្នោតនៅក្នុងប្រទេសកម្ពុជា ដើម្បីយកទៅធ្វើសិក្ខាសាលាថ្នាក់ជាតិ ហើយធ្វើការប្រៀបធៀបជាមួយមតិយោប់ជាតិ និងអន្តរជាតិ។ បន្ទាប់មកត្រូវធ្វើរបាយការណ៍ដាក់ជូននាយករដ្ឋមន្ត្រីដើម្បីពិនិត្យពី លទ្ធផលនៃសិក្ខាសាលាថ្នាក់ជាតិនេះ។
នៅក្នុងសេចក្តីសម្រេចដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ដដែលនោះ បានឲ្យដឹងទៀតថា សមាសភាពរបស់គណៈកម្មការកែទម្រង់ការបោះឆ្នោត មានចំនួន១០ រូប ដែលរួមមានលោក ស ខេង រដ្ឋមន្ត្រីក្រសួងមហាផ្ទៃជាប្រធាន លោក ជិន ប៊ុនស៊ាង ទេសរដ្ឋមន្ត្រី ទទួលបន្ទុកបេសកកម្មពិសេស ជាអនុប្រធាន។
សមាជិកនៅក្នុងគណៈកម្មការនេះរួមមាន លោក ព្រំ សុខា រដ្ឋលេខាក្រសួងមហាផ្ទៃ លោក សក់ សេដ្ឋា រដ្ឋលេខាក្រសួងមហាផ្ទៃលោក ប៉ាន សូរស័ក្តិ រដ្ឋលេខាក្រសួងពាណិជ្ជកម្មលោក កើត រិទ្ធ រដ្ឋលេខាក្រសួងយុត្តិធម៌ លោក លេង វី អនុរដ្ឋលេខាក្រសួងមហាផ្ទៃលោក ឌុច សូន អគ្គនាយករដ្ឋបាលក្រសួងមហាផ្ទៃលោក ប៉ូលីដា ប្រធានក្រុមប្រឹក្សានីតិកម្ម ក្រសួងមហាផ្ទៃ និងលោក ប្រាក់ សំអឿន ប្រធាននាយកដ្ឋានរដ្ឋបាលទូទៅ ក្រសួងមហាផ្ទៃ៕
No comments:
Post a Comment