តាកែវៈ ការចរចានយោបាយផ្លូវការអាចមិនយូរទេ ដូចដែលការដោះដូរសម្តីរវាងគណបក្សកាន់អំណាចនិងគណបក្សប្រឆាំង អាចធ្វើឲ្យលោកអ្នកជឿជាក់។
ក្នុងដំណើរទៅខេត្ត តាកែវ កាលពីថ្ងៃសៅរ៍ លោក កឹម សុខា អនុប្រធានគណបក្សសង្គ្រោះជាតិបានប្រាប់អ្នកគាំទ្រជាង ១ ពាន់នាក់ថា លោកបានស្នើលោក សម រង្ស៊ី ប្រធានគណបក្សសង្គ្រោះជាតិសរសេរទៅអង្គការសហប្រជាជាតិ និងថ្វាយព្រះមហាក្សត្រ នរោត្តម សីហមុនី ដើម្បីស្នើឲ្យចូលរួមក្នុងការចរចាផ្លូវការ។
លោកនាយករដ្ឋមន្រ្តី ហ៊ុន សែន បានច្រានចោលនូវលទ្ធភាពដែលអង្គការសហប្រជាជាតិដើរតួនាទីក្នុងដំណាក់កាលដំបូងនៃការចរចា ក្នុងសុន្ទរកថាតាមកញ្ចក់ទូរទស្សន៍កាលពីថ្ងៃសៅរ៍ ដោយលោកបានបន្ថែមថា ប្រសិនបើមានប្រជាមតិឲ្យបោះឆ្នោតមុនអាណតិ្ត តំណាងរាស្រ្តគណបក្សសង្គ្រោះជាតិនឹងត្រូវចូលអង្គុយក្នុងរដ្ឋសភា។
លោក សុខា បានឆ្លើយតបនឹងការលើកឡើងរបស់លោក ហ៊ុន សែន អំពីការអាចធ្វើប្រជាមតិ ដោយស្នើសុំព្រះមហាក្សត្រយាងចូលរួម និងអង្គការសហប្រជាជាតិចូលរួមក្នុងកិច្ចពិភាក្សាជាមួយនឹងគណបក្សប្រជាជន។
លោក សុខា ថ្លែងថា៖ «ការចូលរួមប្រជុំក្នុងរដ្ឋសភា យើងនឹងចូលរួម ព្រោះប្រជាជនបោះឆ្នោតឲ្យយើង។ ប៉ុន្តែយើងនឹងចូលរួម ដរាបណាយើងមានការព្រមព្រៀងគ្នាជាមួយនឹងគណបក្សប្រជាជន»។
លោកបានបន្ថែមថា៖ «ជាគោលការណ៍ យើងនឹងមានសាក្សីអន្តរជាតិនៅទីនោះ និងព្រះមហាក្សត្រធ្វើជាអធិបតី។ ក្នុងសេណារីយោនោះ យើងអាចព្រមព្រៀង និងចូលប្រជុំរដ្ឋសភាដើម្បីផ្លាស់ប្តូររដ្ឋធម្មនុញ្ញដោយគ្មានបញ្ហា»។
ការធ្វើអត្ថាធិប្បាយនេះកើតឡើង បន្ទាប់ពីគេបង្ហាញថា គណបក្សសង្គ្រោះជាតិ និងគណបក្សប្រជាជនបានផ្លាស់ប្តូរសំណើតាមរយៈមន្រ្តីរដ្ឋាភិបាលជាន់ខ្ពស់ធ្វើជាអាជ្ញាកណ្តាលចាប់តាំងពីថ្ងៃ ទី៥ ខែ មករា គឺមួយថ្ងៃ បន្ទាប់ពីមានការបង្ក្រាបបីថ្ងៃលើកម្មករកាត់ដេរ និងអ្នកគាំទ្ររបស់គណបក្សប្រឆាំង។
លោក កែម ឡី អ្នកវិភាគនយោបាយឯករាជ្យដែលបានដឹងអំពីការចរចាស្ងាត់ៗបានថ្លែងថា វាឆាប់ពេកហើយក្នុងការឲ្យអង្គការសហប្រជាជាតិចូលរួម ព្រះមហាក្សត្រនឹងដើរតួនាទីសំខាន់ក្នុងការចរចា។
លោកថា៖ «អង្គការសហប្រជាជាតិអាចផ្តល់អនុសាសន៍ អាចផ្តល់ថវិកា និងធនធានមនុស្ស ប៉ុន្តែយន្តការសម្រុះសម្រួលនយោបាយ ខ្ញុំគិតថា គណបក្សទាំងពីរនឹងជ្រើសរើសយកតួនាទីរបស់ព្រះមហាក្សត្រធ្វើជាអាជ្ញាកណ្តាលពេលគណបក្សទាំងពីរបានព្រមព្រៀងលើចំណុចសំខាន់ៗ»។
ក្នុងសុន្ទរកថា កាលពីថ្ងៃសៅរ៍ លោក ហ៊ុន សែន បានគំរាមជនបង្ករបស់គណបក្សប្រឆាំងថា នឹងទទួលផលភ្លាមៗ ប្រសិនបើគេប៉នប៉ងផ្តួលរំលំរដ្ឋាភិបាល និងបង្កសង្គ្រាមស៊ីវិល។
ទន្ទឹមនឹងនេះ លោក កឹម សុខា បានអំពាវនាវដល់អ្នកគាំទ្រគណបក្សសង្គ្រោះជាតិក្នុងដំណើរទៅខេត្ត ព្រះសីហនុ កាលពីម្សិលមិញឲ្យធ្វើបាតុកម្មនៅទូទាំងប្រទេស។ លោកថា៖ «ខ្ញុំសូមអំពាវនាវដល់ប្រជាជនទាំងអស់ឲ្យក្រោកឈរធ្វើបាតុកម្មទូទាំងប្រទេស ដើម្បីដាក់សម្ពាធលើរដ្ឋាភិបាលគណបក្សប្រជាជនកម្ពុជាដឹកនាំដោយលោក ហ៊ុន សែន»៕ TK
No comments:
Post a Comment