(អត្ថបទចុះផ្សាយនៅថ្ងៃ 
29-12-2013, 
10:04 pm) | ដោយ ជា ធីរិទ្ធ
29-12-2013, 10:04 pm) | ដោយ ជា ធីរិទ្ធ ចាប់ពី ថ្ងៃចន្ទស្អែកនេះតទៅ ការកកស្ទះចរាចរណ៍នៅរាជធានីភ្នំពេញដោយ សារការដង្ហែក្បួន របស់ ក្រុមបាតុករគណបក្សសង្គ្រោះជាតិ នឹងលែងមាន ទៀតហើយ។ គណបក្សនេះ បានប្រកាសផ្អាកនាំបាតុករដើរដង្ហែក្បួនតាមផ្លូវមួយរយៈសិន។
លោក សម រង្ស៊ី នៅចុងបញ្ចប់នៃការថ្លែងរបស់ខ្លួននៅចំពោះមុខបាតុកររាប់ម៉ឺននាក់ នាវេលាយប់នេះ បានប្រកាសថា គណបក្សសង្គ្រោះជាតិ នឹងផ្អាកនូវសកម្មភាពនៃការដើរដង្ហែក្បួនតាមដងផ្លូវបណ្តោះអាសន្ន មួយរយៈសិន ពោលគឺចាប់ពីថ្ងៃចន្ទស្អែកនេះ រហូតដល់ថ្ងៃសៅរ៍ទី ៤ ខែមករា ឆ្នាំ ២០១៤ ដើម្បីត្រៀមកម្លាំងឲ្យបានច្រើនសម្រាប់ធ្វើបាតុកម្មទ្រង់ទ្រាយធំនៅ ថ្ងៃអាទិត្យទី ៥មករា។ មហាបាតុកម្មទ្រង់ទ្រាយធំនៅសប្តាហ៍ក្រោយ ត្រូវបានលោក សម រង្ស៊ី បង្ហាញក្តីសង្ឃឹមថា នឹងមានការចូលរួមច្រើនទ្វេដង លើសថ្ងៃអាទិត្យដែលមានច្រើនសែននាក់។
លោក សម រង្ស៊ី បានបញ្ជាក់ថា បើទោះបីជាចាប់ពីថ្ងៃស្អែកទៅគណបក្សសង្គ្រោះជាតិ មិននាំបាតុករដើរដង្ហែក្បួនតាមផ្លូវក៏ពិតមែន ក៏ប៉ុន្តែបាតុកម្មនឹងបន្តធ្វើធម្មតានៅទីលានប្រជាធិបតេយ្យ ដោយមានការចូលរួមពីសំណាក់មន្ត្រីសហជីព កម្មករ និងប្រជាពលរដ្ឋផ្សេងៗទៀត ឡើងសម្តែងមតិ ចែករំលែកព័ត៌មានគ្នាទៅវិញទៅមក។
ទន្ទឹមនឹងការផ្អាកដើរដង្ហែក្បួននេះ លោក សម រង្ស៊ី ក៏បានថ្លែងសារនយោបាយជាថ្មីម្តងទៀត ដោយអំពាវនាវឲ្យអ្នកនយោបាយខ្មែរគ្រប់និន្នាការ ក្រុមអង្គការសង្គមស៊ីវិល ជួយស្វែងរកគំនិតថ្មីៗ ដើម្បីជជែកគ្នារកដំណោះស្រាយបញ្ហាប្រទេសជាតិ ដោយឈរលើផលប្រយោជន៍ជាតិជាធំ៕
No comments:
Post a Comment