ស្ដាប់ ឬ ទាញយកសំឡេង
លោកនាយករដ្ឋមន្ត្រី ហ៊ុន សែន ថ្លែងក្នុងកិច្ចប្រជុំនៅទីស្ដីការគណៈរដ្ឋមន្ត្រីកាលពីព្រឹកថ្ងៃទី២៥ កញ្ញា ឆ្នាំ២០១៣។
RFA Screenshot
ចំណែកក្បាលម៉ាស៊ីនរដ្ឋសភា ដែលត្រូវមើលការខុសត្រូវការអនុវត្តរបស់រដ្ឋាភិបាលនោះ ក៏ជាមន្ត្រីបក្សប្រជាជនតែមួយទៀត។ អ្នកវិភាគខ្លះបានហៅការកែទម្រង់នេះថា ជាសកម្មភាពចាស់ភាសាថ្មី។
ប្រសិនបើបក្សសង្គ្រោះជាតិ មិនចូលរួមរដ្ឋាភិបាលអាណត្តិថ្មីនេះមែន រដ្ឋាភិបាលនេះនឹងមានសុទ្ធតែមន្ត្រីបក្សប្រជាជន តាំងពីក្បាលម៉ាស៊ីនលើ រហូតដល់ក្រោម។ អ្នកវិភាគខ្លះ បានបង្ហើបថា រដ្ឋាភិបាលថ្មីដែលមានតែបក្សប្រជាជន ដឹកនាំនេះ អាចធ្វើឲ្យបក្សប្រជាជន ត្រូវបាត់ឈ្មោះពីពិភពគុន បើសិនជាកែទម្រង់បរាជ័យ។ ក៏ប៉ុន្តែ បក្សប្រជាជន នឹងដណ្ដើមបានប្រជាប្រិយភាពពីបក្សដៃគូប្រកួតប្រជែងមកវិញបាន បើសិនជាការកែទម្រង់រដ្ឋាភិបាលអាណត្តិនេះបានជោគជ័យ។
ចំណុចជោគជ័យនេះហើយដែលលោកនាយករដ្ឋមន្ត្រី ហ៊ុន សែន កំពុងប៉ងប្រាថ្នា ហើយបានដាក់ចុះយុទ្ធសាស្ត្រកែទម្រង់មួយឈ្មោះថា យុទ្ធសាស្ត្រចតុកោណ ផ្ដួចផ្ដើមដោយគំនិតលោកផ្ទាល់ ដែលបានអនុវត្តតាំងពីអាណត្តិមុនៗមកម្ល៉េះ។
ដើម្បីធានាការកែទម្រង់នេះឲ្យបានជោគជ័យ លោក ហ៊ុន សែន បានប្រឹងប្រែងផ្ដល់អនុសាសន៍ដល់មន្ត្រីក្រោមឱវាទអស់រយៈពេលជិតមួយថ្ងៃ ក្នុងកិច្ចប្រជុំគណៈរដ្ឋមន្ត្រីដំបូង កាលពីថ្ងៃទី២៥ កញ្ញា កន្លងទៅនេះ។ ក្នុងនោះ លោកបានរំលេចចំណុចខ្សោយខ្លះៗរបស់រដ្ឋមន្ត្រីមួយចំនួន កាលពីអាណត្តិមុនៗ ដែលដឹកនាំក្រសួងតាមបែបវប្បធម៌ផ្ដាច់ការ និងសួនតួនិយម ហើយត្រូវកែប្រែជាបន្ទាន់។
ក៏ប៉ុន្តែ អ្នកវិភាគសង្គម និងនយោបាយ បានពន្យល់ថា ការកែទម្រង់បែបនេះ មិនមែនជារឿងងាយដូចការគិតនោះទេ។ ហើយការកែទម្រង់នេះ ក៏បានធ្វើច្រើនអាណត្តិមកហើយ តែមិនបានលទ្ធផលជាដុំកំភួនអ្វីទេ។
លោកបណ្ឌិត សុខ ទូច អ្នកវិភាគវិទ្យាសាស្ត្រនយោបាយ បានទស្សន៍ទាយថា ផែនការកែទម្រង់នេះ មិនអាចទៅមុខបានទេ ព្រោះប្រព័ន្ធដឹកនាំនៅសាំញ៉ាំ មិនខុសពីរដ្ឋាភិបាលអាណត្តិមុនៗ ដែលក្បាលម៉ាស៊ីនដឹកនាំមានក្បាលធំដូចដំរី ហើយប្រព័ន្ធដឹកនាំថ្នាក់ក្រោមរួមតូចដូចកន្ទុយកណ្ដុរ។ លោកថា គ្រាន់តែលោកក្រឡេកមើលរាងរដ្ឋាភិបាលចេញដំណើរថ្ងៃដំបូង លោកដឹងថា ការកែទម្រង់នេះនឹងមិនបានផ្លែផ្កាទៅហើយ ដោយសារមន្ត្រីដឹកនាំខ្លះខ្វះជំនាញការងារ និងខ្វះធនធានមនុស្ស និងចំនួនមន្ត្រីដឹកនាំក្បាលម៉ាស៊ីនផ្នែកខាងលើមានចំនួនច្រើនហួស។
ចំណែកអ្នកស្រាវជ្រាវ និងអភិវឌ្ឍន៍សង្គម លោក កែម ឡី ក៏យល់ប្រហាក់ប្រហែលគ្នាដែរ។ លោកថា ការកែទម្រង់ និងការផ្ដល់អនុសាសន៍ គឺខុសគ្នា គេត្រូវការសិក្សាស្រាវជ្រាវលម្អិត មុននឹងសម្រេចជាយុទ្ធសាស្ត្រមកអនុវត្ត ជាពិសេសប្រព័ន្ធរដ្ឋសភាដែលតាមដានមើលរដ្ឋាភិបាល។
រីឯ លោក កឹម សុខា អនុប្រធានបក្សសង្គ្រោះជាតិ ដែលតែងរិះគន់រដ្ឋាភិបាលនោះ ក៏មិនខុសគ្នាដែរ គឺលោកយល់ថា រដ្ឋាភិបាលដែលមានបក្សតែមួយដូច្នេះ គឺមានមនោសញ្ចេតនាផ្ទាល់ខ្លួន ចំពោះសមាជិកបក្សជាងប្រយោជន៍ជាតិ។
ទោះយ៉ាងណា មន្ត្រីជាន់ខ្ពស់គណបក្សប្រជាជន លោក ជាម យៀប បានជំទាស់ ហើយអះអាងថា ការតាំងចិត្តរបស់ថ្នាក់ដឹកនាំអាណត្តិនេះ គឺខុសពីអាណត្តិមុន ដែលមន្ត្រីបក្សប្រជាជន ទាំងអស់មានជំនឿថា ការកែទម្រង់នឹងបានជោគជ័យ។
ទាក់ទងរឿងកែទម្រង់នេះ លោក កែម ឡី បញ្ជាក់ថា គេត្រូវការកម្លាំងធនធានមនុស្ស ថវិកា ពេលវេលា ដើម្បីធានាឲ្យបានជោគជ័យ ជាពិសេសយុទ្ធសាស្ត្រឆ្លើយតបទៅនឹងការកែទម្រង់រួមក្នុងសង្គម ដែលលោកបានបង្ហើបបទពិសោធន៍ខ្លះៗជាអនុសាសន៍។
លោក កែម ឡី បន្ថែមថា រដ្ឋាភិបាលមានប្រាក់សមល្មមក្នុងការកែទម្រង់ គឺចំនួន ៣ពាន់លានដុល្លារ ក្នុងឆ្នាំ២០១៣ ដែលប្រាក់នេះបានមកពីចំណូលថវិកាជាតិ ប្រាក់កម្ចីបរទេស ប្រាក់ជំនួយ៕
No comments:
Post a Comment