Khmerization: Human Rights Watch claims the CPP commits electoral fraud អង្គការឃ្លាំមើលសិទ្ធិមនុស្សថា CPP បន្លំឆ្នោត

Thursday, 01 August 2013

Phnom Penh Post

Kevin Ponniah និង ជាង សុខា

ភ្នំពេញៈ អង្គការឃ្លាំមើលសិទិ្ធមនុស្ស ដែលជាអង្គការតស៊ូមតិនិងស្រាវជ្រាវអន្តរជាតិ បានចេញសេចក្តីថ្លែងការណ៍មួយពីម្សិលមិញចោទថា គណបក្សប្រជាជនកម្ពុជាកាន់អំណាច«បានរៀបចំ» ក្លែងបន្លំសន្លឹកឆ្នោត ក្នុងការបោះឆ្នោតកាលពីថ្ងៃទី២៨ កក្កដា។

អង្គការនេះ បានចង្អុលបង្ហាញអំពីការចេញលិខិតបញ្ជាក់អត្តសញ្ញាណសម្រាប់ការ បោះឆ្នោតក្លែងក្លាយ ដែលប្រើប្រាស់ដោយអ្នកដែលមិនកាន់អត្តសញ្ញាណទៅបោះឆ្នោត ព្រមទាំងការចុះឈ្មោះអ្នកបោះឆ្នោតលើសចំនួនថា ជាភ័ស្តុតាងនៃការក្លែងបន្លំ។ អង្គការឃ្លាំមើលសិទិ្ធមនុស្សមិនដែលចេញសេចក្តីថ្លែងការណ៍ ក្រោយការបោះឆ្នោតឡើយ ចាប់តាំងពីអំពើហិង្សានយោបាយបានផ្ទុះឡើងក្នុងឆ្នាំ ១៩៩៨។

លោក ប្រេដ អាដាម នាយកប្រចាំអាស៊ីនៃអង្គការឃ្លាំមើលសិទិ្ធមនុស្សថ្លែងថា៖«មន្រ្តី ជាន់ខ្ពស់នៃគណបក្សកាន់អំណាចហាក់ដូចជាចូលរួម ក្នុងការចេញឯកសារបោះឆ្នោតក្លែងក្លាយ និងបានចុះឈ្មោះអ្នកបោះឆ្នោតក្នុងខេត្តជាច្រើន»។ ប៉ុន្តែ អង្គការនេះពុំបាននិយាយលម្អិតអំពីភ័ស្តុតាងដែលបញ្ជាក់អំពីការ ក្លែងបន្លំសន្លឹកឆ្នោតនៅទូទាំងប្រទេសដែលថាធ្វើដោយគណបក្សប្រជាជន នោះទេ ហើយគ្រាន់តែលើកឧទាហរណ៍ច្បាស់មួយផ្អែកលើចម្លើយរបស់សាក្សី ចំពោះករណីអះអាងនីមួយៗ។

លោក Phil Robertson នាយករងប្រចាំអាស៊ីនៃអង្គការឃ្លាំមើលសិទិ្ធមនុស្សមួយនេះ បានប្រាប់ ភ្នំពេញ ប៉ុស្តិ៍ ថា៖ «យើងព្រួយបារម្ភដែលរឿងនេះ មានជាទូទៅ ហើយការស៊ើបអង្កេតថែមទៀតអាចបញ្ចេញករណីនេះ ហើយពេលនេះ អ្នករាល់គ្នាត្រូវតែខិតខំ ហើយពិនិត្យលើបញ្ហាទាំងនេះ»។

លោក ជាម យៀប តំណាងរាស្រ្តគណបក្សប្រជាជនកម្ពុជាបានចោទសួរថា តើគណបក្សរបស់លោកអាចឈ្នះសំឡេងឆ្នោតគាំទ្រក្នុងចំនួនភាគច្រើន តែប៉ុណ្ណឹងឬ ប្រសិនបើគណបក្សប្រជាជនពឹងផ្អែកលើការក្លែងបន្លំសន្លឹកឆ្នោតនោះ?

លោកបានបញ្ជាក់ថា ៖ «តើយើងអាចបន្ថែមសន្លឹកឆ្នោតថែមទៀតដើម្បីឈ្នះដោយរបៀបណា? គណបក្សប្រជាជនទទួលបានសំឡេងឆ្នោតជាង ៣ លាន ហើយគណបក្សសង្គ្រោះជាតិទទួលបានជាង ២ លាន»។

លោកបន្តថា ៖ «អង្គការមិនមែនរដ្ឋាភិបាលនោះតែងតែស្តាប់និងសរសេររបាយការណ៍ពី ទស្សនៈរបស់គណបក្សប្រឆាំង...ពួកគេបានគាំទ្រគណបក្ស ប្រឆាំងជាយូរមកហើយ មិនត្រឹមតែពេលនេះទេ។ យើងមិនអាចទទួលយករបាយការណ៍របស់អង្គការឃ្លាំមើលសិទិ្ធមនុស្ស បែបនេះទេ»។

ចំណែកឯលោក ខៀវ កាញារីទ្ធ វិញ បានថ្លែងចំៗថា៖ «ប្រសិនបើយើងក្លែងបន្លំក្នុងការបោះឆ្នោត គណបក្សសង្គ្រោះជាតិនឹងឈ្នះបានអាសនៈតិចជាងនេះ»។

អង្គការឃ្លាំមើលសិទិ្ធមនុស្សបានស្រង់យកប្រភពមេភូមិគណបក្ស ប្រជាជន អនាមិកម្នាក់ ដែលថា ខ្លួនទទួលបញ្ជាផ្ទាល់ពីថ្នាក់លើបក្ស រាប់ទាំងឧត្តមសេនីយ៍កងទ័ព សមាជិកគណៈកម្មាធិការកណ្តាលគណបក្សប្រជាជនឲ្យចេញលិខិតបញ្ជាក់ អត្តសញ្ញាណបោះឆ្នោត ដាក់ឈ្មោះអ្នកបោះឆ្នោតដែលបានស្លាប់ ឬចាកចេញពីក្នុងមូលដ្ឋាននោះ។

ក្រុមសិទ្ធិមនុស្ស ជាច្រើន រាប់ទាំងអង្គការឃ្លាំមើលសិទិ្ធមនុស្ស បានលើកឡើងនូវក្តីបារម្ភមុនការបោះឆ្នោត ដែលថាលិខិតបញ្ជាក់អត្តសញ្ញាណបោះឆ្នោតរាប់ម៉ឺនដែលបាន ចេញអាចនាំឲ្យអ្នកបោះឆ្នោតក្លែងបន្លំក្នុងការបោះឆ្នោត។

លោក អាដាម ថ្លែងថា៖ «ឥឡូវនេះមេភូមិគណបក្សប្រជាជនបញ្ជាក់ថា រឿងនេះពិតជាបានកើតឡើងក្នុងមូលដ្ឋានគាត់»។

សេចក្តីថ្លែងការណ៍ក៏បានចោទប្រកាន់ដែរថា មន្រ្តីរាជការជាន់ខ្ពស់ រាប់ទាំងលោក ង៉ោ សុវណ្ណ រដ្ឋលេខាធិការក្រសួងយុតិ្តធម៌និងជាបេក្ខជនឈរឈ្មោះនៅខេត្ត កណ្តាល បានចុះឈ្មោះនៅច្រើនកន្លែង។

អង្គការឃ្លាំមើល សិទិ្ធមនុស្សបានថ្លែងថា អ្នកភូមិក្នុងឃុំ គគីរធំ ក្នុងខេត្ត កណ្តាល និយាយថា ពួកគេត្រូវគេគំរាមចាប់ខ្លួន បន្ទាប់ពីប្តឹងមន្រ្តីបោះឆ្នោតថា លោក ង៉ោ សុវណ្ណ និងមន្រ្តីគណបក្សប្រជាជនដទៃទៀតកំពុងព្យាយាមបោះឆ្នោតនៅទីនេះ ដែលមិនមែនជាប្រជាជនមូលដ្ឋាន។

យោងតាមសេចក្តីថ្លែងការណ៍ឲ្យដឹងថា អ្នកភូមិ ក៏ទទួលរងការគំរាមសម្លាប់ផងដែរនៅថ្ងៃបន្ទាប់ពីក្រុមមួយដែល នៅក្នុងភូមិ។

លោក ង៉ោ សុវណ្ណ អតីតតំណាងរាស្រ្តគណបក្ស សម រង្ស៊ី ដែលបានប្តូរគណបក្ស បន្ទាប់ពីការបោះឆ្នោតឆ្នាំ ២០០៨ មិនអាចទាក់ទងបានទេ កាលពីម្សិលមិញ។

សេចក្តីថ្លែងការណ៍នេះ ឲ្យដឹងថា យោងតាមការវិភាគទិន្នន័យផ្លូវការរបស់គណៈកម្មាធិការជាតិរៀបចំ ការបោះឆ្នោតគឺលោកបានចុះឈ្មោះបោះឆ្នោតនៅភ្នំពេញ ខេត្ត កណ្តាល និងខេត្ត ស្វាយរៀង។

លោក គល់ បញ្ញា នាយកប្រតិបតិ្តនៃអង្គការ ខុម ហ្វ្រែល បានថ្លែងថា សេចក្តីថ្លែងការណ៍នេះលើកឡើងអំពីករណីក្លែងបន្លំជាក់លាក់ ហើយថា លោកមិនអាចកំណត់បានថា តើករណីប្រហាក់ប្រហែលគ្នាបានកើតឡើងជាលក្ខណៈប្រព័ន្ធនៅទូទាំង ប្រទេសឬយ៉ាងណានោះទេ។

លោកបន្តថា៖ «យើងខ្វះព័ត៌មានមួយចំនួនអំពីសេចក្តីលម្អិតនៃលិខិតបញ្ជាក់ អត្តសញ្ញាណបោះឆ្នោត... យើងគ្រាន់តែដឹងអំពីករណីជាក់លាក់មួយចំនួន ប៉ុន្តែយើងមិនអាចមើលឃើញរូបភាពថា តើបញ្ហាធំប៉ុនណាទេ... និងថាតើ វាត្រូវបានប្រើប្រាស់ជាទូទៅក្នុងការបោះឆ្នោតក្នុងកម្រិតប៉ុនណា ឡើយ»។

លោក គល់ បញ្ញា បានបន្ថែមថា ការស្ទាក់ស្ទើររបស់គណៈកម្មាធិការជាតិរៀបចំការបោះឆ្នោតក្នុងការ អនុញ្ញាតឲ្យអ្នកអង្កេតការណ៍ខ្លួន ពិនិត្យលិខិតបញ្ជាក់អត្តសញ្ញាណបោះឆ្នោតឲ្យបានពេញលេញ ក្រោយការបោះឆ្នោត មិនអនុញ្ញាតឲ្យមានការស៊ើបអង្កេតត្រឹមត្រូវឡើយ។

ប៉ុន្តែលោកបញ្ជាក់ថា ការចុះឈ្មោះច្រើនលើកត្រូវបានអង្កេតឃើញជាទូទៅ។

«យើងឃើញឈ្មោះជាច្រើន ប៉ុន្តែយើងមិនអាចពិនិត្យដឹងថា តើពួកគេពិតជាបោះឆ្នោតច្រើនកន្លែងឬយ៉ាងណាទេ? ប៉ុន្តែយើងរកឃើញឈ្មោះច្រើនជាន់គ្នាពីរដង ឬបីដង របស់មន្រ្តីរាជការ»។

អង្គការឃ្លាំមើលសិទិ្ធមនុស្សបានអំពាវនាវឲ្យសហគមន៍អន្តរជាតិ ជំរុញឲ្យស៊ើបអង្កេតឯករាជ្យលើភាពមិន ប្រក្រតីនៃការបោះឆ្នោត ដូចដែលលោកនាយករដ្ឋមន្រ្តី ហ៊ុន សែន បានស្វាគមន៍កាលពីម្សិលមិញ បន្ទាប់ពីស្ងប់ស្ងៀម ៣ ថ្ងៃកន្លងមក។

លោក Phil Robertson បានថ្លែងថា៖«ប្រសិនបើលោក ហ៊ុន សែន គាំទ្រនោះ វានឹងល្អប្រសើរ ហើយយើងសង្ឃឹមថា លោកនឹងធ្វើតាមការសន្យារបស់ខ្លួន... ប្រសិនបើគាត់ធ្វើតាមការសន្យានោះ វានឹងជាការវិវត្តដ៏វិជ្ជមានសម្រាប់កម្ពុជា»៕ TK

1 comment:

Anonymous said...: WE APPRECIATES YOUR HONEST COMMENTS AND ON THE SAME PAGE. ALSO THE WHOLE WORLD AGREED WITH THIS FRAUDULENT ACTS BY COMMUNIST PIRATE PARTY KNOWN AS [CPP].

Your message is "STRONG" the world will read it.

Thank You,
Signed: KHMER YOUTHS MOVEMENT - [ KYM ]; 2 August 2013 at 01:25

A Change of Guard

Thursday, 1 August 2013

Human Rights Watch claims the CPP commits electoral fraud អង្គការឃ្លាំមើលសិទ្ធិមនុស្សថា CPP បន្លំឆ្នោត

1 comment:

A Change of Guard

Thursday, 1 August 2013

Human Rights Watch claims the CPP commits electoral fraud អង្គការ​ឃ្លាំ​មើល​សិទ្ធិ​មនុស្ស​ថា CPP បន្លំ​ឆ្នោត

1 comment:

Human Rights Watch claims the CPP commits electoral fraud អង្គការឃ្លាំមើលសិទ្ធិមនុស្សថា CPP បន្លំឆ្នោត