ឯកអគ្គរាជទូតកម្ពុជានៅ UN ឆ្លើយតបនឹងការរិះគន់ពីស្ថានភាពនយោបាយនៅកម្ពុជា
សកម្មជនដែលទាមទារឲ្យដោះលែងមន្ត្រីសិទ្ធិមនុស្សប៉ះទង្គិចជាមួយសមត្ថកិច្ច(រូបថត៖ញឹម សុខន)ឯកអគ្គរាជទូតនិងជាតំណាងអចិន្ត្រៃយ៍របស់កម្ពុជាបានផ្ញើលិខិតមួយទៅកាន់ប្រធានក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវ ដោយបានច្រានចោលការលើកឡើងរបស់គណៈប្រតិភូមួយចំនួន ដែលរិះគន់ស្ថានភាពនយោបាយនៅកម្ពុជាថា មានការរំលោភសិទ្ធិមនុស្សធ្ងន់ធ្ងរ។
លោក នៃ សំអុល អ្នកតំណាងអចិន្ត្រៃយ៍របស់កម្ពុជាប្រចាំនៅការិយាល័យអង្គការសហប្រជាជាតិនិងអង្គការពាណិជ្ជកម្មពិភពលោក លើកឡើងថាអង្គការនិងគណបក្សនយោបាយនៅកម្ពុជា កំពុងធ្វើសកម្មភាពដើម្បីតែកេងចំណេញនយោបាយខ្លួន ដោយបានញុះញង់និងបង្កឲ្យស្ថានភាពបច្ចុប្បន្នកាន់តែល្អក់កករឡើង ពិសេសធ្វើឲ្យមានអស្ថិរភាពក្នុងប្រទេសកម្ពុជាទៀតផង។ នេះដោយយោងតាមលិខិតរបស់លោកចុះថ្ងៃទី១៤ ខែកញ្ញា ម្សិលមិញ។
លោកឯកអគ្គរាជទូតបានបញ្ជាក់ថា៖ “អង្គភាពឬក្រុមអ្នកនយោបាយមិនគួរលាក់ខ្លួនក្រោមរបាំងសិទ្ធិមនុស្ស សម្រាប់ដើម្បីបង្កផលប៉ះពាល់ដល់សណ្ដាប់ធ្នាប់សាធារណៈនិងភាពសុខដុមរមនារបស់សង្គមជាតិ សម្រាប់បម្រើផលប្រយោជន៍នយោបាយទុច្ចរិតរបស់ខ្លួននោះទេ។ រាល់ទង្វើដែលបង្កឲ្យមានភាពអនាធិបតេយ្យនិងផ្ទុយពីច្បាប់ ការញុះញង់ឲ្យមានការស្អប់ខ្ពើមគ្នា មិនគួរត្រូវបានលើកលែងឲ្យឡើយ ទោះបីអ្នកប្រព្រឹត្តនោះជានរណាក៏ដោយ”។
កាលពីថ្ងៃទី១៤ខែកញ្ញា ប្រទេសចំនួន៣៦មានសហរដ្ឋអាមេរិក អាល់បានី អូស្រ្តាលី ជប៉ុន កាណាដា ម៉ាសេដូនី ណ័រវ៉េ ស្វីស អ៊ុយក្រែន និងប្រទេសចំនួន២៨ជាសមាជិកនៃសហភាពអឺរ៉ុបបានបង្ហា្ញញជំហររួមគ្នាថាស្ថានការណ៍នយោបាយនៅកម្ពុជាបានគំរាមកំហែងសកម្មភាពស្របច្បាប់របស់គណបក្សប្រឆាំងនិងអង្គការមិនមែនរដ្ឋាភិបាលដែលធ្វើការផ្នែកសិទ្ធិមនុស្ស។
ប្រទេសទាំងនោះបានអំពាវនាវឲ្យរដ្ឋាភិបាលកម្ពុជាខិតខំជាអតិបរមាបង្កើតឲ្យមានបរិយាកាសនយោបាយមួយ ដោយថាឲ្យគណបក្សប្រឆាំងនិងអង្គការសង្គមស៊ីវិលអាចធ្វើសកម្មភាពបានដោយសេរីដោយគ្មានការភ័យខ្លាច។
ជាងនេះទៅទៀតប្រទេសទាំង៣៦នោះបានជំរុញរដ្ឋាភិបាលកម្ពុជាធ្វើយ៉ាងណាជំរុញដំណើការបោះឆ្នោតឲ្យប្រព្រឹត្តិទៅដោយសេរីនិងយុត្តិធម៌ ធានាភាពស្របច្បាប់ដល់រដ្ឋាភិបាលកើតក្រោយការបោះឆ្នោត ធានាចំពោះមុខពលរដ្ឋរបស់ខ្លួននិងសហគមន៍អន្តរជាតិ។
លោក នៃ សំអុល បានស្នើសុំឲ្យមានការចរចាគ្នាដោយចំហនិងការគោរពគ្នាទៅវិញទៅមក។ លោកថាកម្ពុជាទទួលយកគ្រប់ការផ្ដល់ជំនួយនិងយោបល់ទាំងឡាយ ប៉ុន្តែកម្ពុជាមិនស្វាគមន៍ការជ្រៀតជ្រែកក្នុងកិច្ចការផ្ទៃក្នុងរបស់ខ្លួនឡើយ៕
1 comment:
Oh man, in a scuffle, the women's boobs will be squished. Where are the men? What a bunch of cowards.
Post a Comment