មុខមាត់របស់ វ៉ា គឹមហុង ជាអ្នកបិទបាំងអំពើឈ្លានពានរបស់យួនត្រូវបានលាតត្រដាងជាសាធារណៈ

ដោយ មនសិការខ្មែរ




កាលពីថ្ងៃទី០២ ខែកក្កដា ឆ្នាំ២០១៥ លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែននិងជាប្រធានគណៈកម្មាធិការព្រំដែនកម្ពុជាបានព្យាយាមបិទបាំងមុខមាត់អាក្រក់របស់ខ្លួនតាមរយៈការធ្វើសន្និសីទសារព័ត៌មាននៅទីស្តីការគណៈរដ្ឋមន្ត្រី។ ប៉ុន្តែនៅក្នុងសន្និសីទសារព័ត៌មាននោះលោក វ៉ា គឹមហុង បានបញ្ជាក់យ៉ាងច្បាស់ថាការបោះបង្គោលព្រំដែនកម្ពុជា-យួននាពេលកន្លងមកគឺធ្វើតាមផែនទីដែលយួនជាអ្នករៀបចំបោះពុម្ព។ ប្រការនេះហើយដែលធ្វើឲ្យមជ្ឈដ្ឋាននានាមើលឃើញមុខមាត់ពិតរបស់បុគ្គល វ៉ា គឹមហុង ដែលជាអ្នកបម្រើនិងការពារផលប្រយោជន៍យួនដោយខ្វះការពិចារណា។

នៅក្នុងសនិ្នសីទសារព័ត៌មាននោះដែរលោក វ៉ា គឹមហុង បានបង្ហាញផែនទីចំនួន២៦ផ្ទាំងដែលសម្អាងថា ជាផែនទីតម្កល់ទុកនៅអង្គការសហប្រជាជាតិក្នុងឆ្នាំ១៩៦៤។ ក៏ប៉ុន្តែតំណាងរាស្ត្រគណបក្សសង្គ្រោះជាតិដែលបានចូលរួមពិនិត្យមើលផែនទីដែលោក វ៉ា គឹមហុង បង្ហាញនោះបាននិយាយថា គឺជាផែនទីដែលយួនជាអ្នកផលិតមិនមែនជាផែនទីដែលតម្កល់ទុកជាឯកសារនៅអង្គការសហប្រជាជាតិទ្បើយ។ តំណាងរាស្ត្រគណបក្សសង្គ្រោះជាតិបានបញ្ជាក់ថាផែនទីដែលលោក វ៉ា គឹមហុង បង្ហាញក្នុងសន្និសីទសារព័ត៌មាន ពុំមានត្រាដែលបញ្ជាក់ដូចផែនទីតម្កល់នៅអង្គការសហប្រជាជាតិនោះទេ។ ជាងនេះទៅទៀតតំណាងរាស្ត្រគណបក្សសង្គ្រោះជាតិបានលើកទ្បើងថា ផែនទីដែលគូសវាសនិងបោះពុម្ពដោយយួន ពុំអាចទទួលយកបានទ្បើយ ព្រោះបានធ្វើឲ្យកម្ពុជាខាតបង់ទឹកដីយ៉ាងច្រើនទៅខាងប្រទេសយួន។



ក្រុមអ្នកតាមដានបញ្ហាព្រំដែនកម្ពុជា-យួនបានវាយតម្លៃថាការប្រើប្រាស់ផែនទីដែលយួនបោះពុម្ពសម្រាប់ដំណើរការបោះបង្គោលព្រំដែនកន្លងមកគឺអាចធ្វើឲ្យកម្ពុជាបាត់បង់បូរណភាពទឹកដីតាមតំបន់ព្រំដែនយ៉ាងច្រើន ជាពិសេសនៅក្នុងខេត្តត្បូងឃ្មុំ រតនគិរី កណ្តាល ស្វាយរៀង តាកែវនិងកំពតជាដើម។ ប្រហែលជាផ្អែកលើផែនទីនោះហើយទើបថ្មីៗកន្លងទៅនេះភាគីយួនធ្វើសកម្មភាពរំលោភលើអធិបតេយ្យភាពនិងបូរណភាពទឹកដីកម្ពុជាតាមតំបន់ព្រំដែនក្នុងខេត្តត្បូងឃ្មុំ ខេត្តរតនគិរី ខេត្តកណ្តាល និងខេត្តស្វាយរៀងដោយគ្មានញញើតអ្វីទាំងអស់។

ពាក់ព័ន្ធនឹងបញ្ហាព្រំដែននោះដែរ មកដល់ពេលនេះរដ្ឋាភិបាលកម្ពុជាដែលមានលោក ហ៊ុន សែន ជានាយករដ្ឋមន្ត្រីបានធ្វើកំណត់ទូតទៅរដ្ឋាភិបាលយួន៤លើកមកហើយ ដើម្បីឲ្យយួនបញ្ឈប់សកម្មភាពឈ្លានពានទឹកដីខ្មែរតាមព្រំដែន។ កំណត់ទូតរបស់រដ្ឋាភិបាលកម្ពុជាបានកើតទ្បើងក្រោយពេលយួនចូលមកជីកស្រះទឹកចំនួន៨តាមព្រំដែនភូមិទ្បំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី និងចូលមកសាងសង់ប៉ុស្តិ៍ឈរជើងរបស់សមត្ថកិច្ចនិងលេណដ្ឋាននៅជាប់ភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល។ ក៏ប៉ុន្តែរហូតមកដល់ពេលនេះពុំមានការឆ្លើយតបជាវិជ្ជមានពីសំណាក់ភាគីយួននៅទ្បើយទេ ហើយយួននៅតែធ្វើសកម្មភាពឈ្លានពានទឹកដីខ្មែរតាមព្រំដែនយ៉ាងគឃ្លើនដដែល៕