2015-08-28 rfa
 |
| ក្រុមតំណាងប្រជាសហគមន៍ភ្នំព្រះធាតុ ប្រមូលផ្ដុំគ្នានៅខាងមុខសាលាខេត្តកំពង់ឆ្នាំង ដើម្បីដាក់ពាក្យបណ្ដឹងជូនអភិបាលខេត្តពាក់ព័ន្ធរឿងកាប់រុករានព្រៃឈើ នៅថ្ងៃទី២៨ ខែសីហា ឆ្នាំ២០១៥។
RFA/Chin Chetha
|
ប្រជាសហគមន៍ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ជិត ៥០០នាក់ (៤៩៥) ផ្ដិតមេដៃប្ដឹងមន្ត្រីនគរបាលពីរនាក់ និងអ្នកពាក់ព័ន្ធរឿងកាប់រុករានព្រៃឈើខ្លះទៀតទៅអភិបាលខេត្ត។ ការសម្រេចចិត្តប្ដឹងអ្នកបំផ្លាញព្រៃសហគមន៍នេះ គឺបន្ទាប់ពីអាជ្ញាធរភូមិឃុំ និងស្រុកមិនអើពើដោះស្រាយជូនពួកគាត់ ហើយសកម្មភាពឈូសឆាយដីព្រៃនៅតែបន្តកើតមាន។
តំណាងសហគមន៍ព្រៃឈើភ្នំព្រះធាតុ ចំនួន ១១នាក់ មកពីភូមិចំនួន៧ នៃឃុំពាម អមដំណើរប្រធានសហគមន៍របស់ខ្លួនមកសាលាខេត្តកំពង់ឆ្នាំង ដើម្បីដាក់ពាក្យបណ្ដឹងភ្ជាប់ស្នាមមេដៃជូនអភិបាលខេត្តនៅព្រឹកថ្ងៃទី២៨ ខែសីហា។ ក្រោយពីដាក់បណ្ដឹងនេះ អ្នកនាំពាក្យសាលាខេត្តកំពង់ឆ្នាំង លោក ម៉ម ឈឿម បញ្ជាក់ថា ពាក្យបណ្ដឹងរបស់ប្រជាពលរដ្ឋបានចូលដល់ការិយាល័យអន្ដរវិស័យរបស់សាលាខេត្ត ហើយអាចបញ្ជូនដល់ដៃអភិបាលខេត្តលោក ឈួរ ច័ន្ទឌឿន នៅក្នុងសប្ដាហ៍ទី១ នៃខែកញ្ញា ឆ្នាំ២០១៥ ខាងមុខ។
ប្រធានសហគមន៍ព្រៃឈើភ្នំព្រះធាតុ លោក ប៊ុន យ៉ូន ថ្លែងថា ផ្ទៃដីព្រៃសហគមន៍ទំហំ ៦៨២ហិកតារ ដែលទទួលស្គាល់ដោយអាជ្ញាធរភូមិឃុំ និងស្រុកកាលពីឆ្នាំ២០១០ ត្រូវនាយប៉ុស្តិ៍នគរបាលរដ្ឋបាលឃុំពាមឈ្មោះ ពៅ សំបូរ និងមន្ត្រីនគរបាលឃុំស្វាយជុក ឈ្មោះ អ៊ុក ឌី ព្រមទាំងអ្នកពាក់ព័ន្ធជាច្រើននាក់ទៀតតែមិនស្គាល់ឈ្មោះ បានឈូសដីព្រៃអស់ប្រមាណ ៥ហិកតារហើយ នាពេលបច្ចុប្បន្ន៖ «មូលហេតុដែលខ្ញុំចង់ដាក់ដល់ទីរួមខេត្ត (សាលាខេត្ដ) ព្រោះអីមើលទៅមេភូមិ មេឃុំ និងមេស្រុកក៏មិនអើពើនឹងរឿងរបស់សហគមន៍ទេ។ ប្រជាពលរដ្ឋកើតទុកមិនសុខចិត្ត គាត់ថា ឲ្យយើងខ្ញុំជាប្រធានសហគមន៍ នាំគ្នាក្រោកឈរទាមទារយកដីសម្រាប់ទុកបម្រើនៅក្នុងសហគមន៍វិញ»។
ចំណែកតំណាងប្រជាសហគមន៍មកពីភូមិគ្រាំងកន្ទ្រោល លោក ឡេវ លឹម បញ្ជាក់ថា ក្រុមជនល្មើសព្យាយាមចូលកាប់រុករានព្រៃសហគមន៍ធ្វើកម្មសិទ្ធិតាំងពីឆ្នាំ២០១២ ប៉ុន្តែអ្នកទាំងនោះបានកាប់ និងឈូសព្រៃកាន់តែខ្លាំងចាប់ពីចុងខែមិថុនា ឆ្នាំ២០១៥។ លោកថា ពលរដ្ឋទាំង ៧ភូមិ នៃឃុំពាម ដែលមើលគោក្របី និងអាស្រ័យអនុផលព្រៃឈើនៅទីនោះ បារម្ភខ្លាចបាត់បង់ព្រៃសហគមន៍យ៉ាងខ្លាំង។
វិទ្យុអាស៊ីសេរី មិនអាចរកប្រភពទាក់ទងលោក ពៅ សំបូរ និងលោក អ៊ុក ឌី ដែលក្រុមពលរដ្ឋអះអាងថា ជាសមត្ថកិច្ចប៉ូលិសមូលដ្ឋាន ដើម្បីឆ្លើយតបចំពោះការចោទប្រកាន់នេះបានទេ នៅថ្ងៃទី២៨ ខែសីហា។ ប៉ុន្តែមេឃុំពាម លោក យី ផេង ថ្លែងថា ទីតាំងដីដែលកំពុងមានជម្លោះនោះ ពិតជាមានអ្នកចូលទៅកាប់ព្រៃដាំដើមស្វាយមែន តែមន្ត្រីប៉ូលិស និងអ្នកខ្លះទៀតមានលិខិតកាន់កាប់ដីទទួលស្គាល់ដោយអាជ្ញាធរភូមិឃុំតាំងពីឆ្នាំ២០០៤ គឺមុនពេលដែលបង្កើតជាព្រៃសហគមន៍នៅឆ្នាំ២០១០។
លោក យី ផេង បញ្ជាក់ថា កាលណោះការគ្រប់គ្រងទឹកដីរដ្ឋបាលរបស់ឃុំពាម ជាមួយឃុំជិតខាងមិនទាន់មានភាពច្បាស់លាស់នៅឡើយទេ ស្របពេលគ្នានោះក៏មានពលរដ្ឋខ្លះនៅឃុំជិតខាងបានលក់ដីនៅតំបន់នោះ ដោយមានការទទួលស្គាល់ដោយអាជ្ញាធរមូលដ្ឋាន។ ប៉ុន្តែកាលណោះលោកមិនដឹងរឿងអ្វីច្បាស់ឡើយ ព្រោះលោកទើបឡើងធ្វើជាមេឃុំពាមនៅឆ្នាំ២០០៩។
ក្រុមតំណាងសហគមន៍ភ្នំព្រះធាតុ នាំគ្នាឡើងឡានត្រឡប់ទៅផ្ទះវិញ បន្ទាប់ពីដាក់ពាក្យបណ្ដឹងចូលសាលាខេត្តរួច ដោយសង្ឃឹមថា ទទួលបានដំណោះស្រាយក្នុងពេលដ៏ឆាប់ខាងមុខពីអាជ្ញាធរខេត្ត៕
No comments:
Post a Comment