2015-08-25rfa
 |
| ស្ត្រីជនជាតិវៀតណាម ដើរកាន់សន្លឹកឆ្នោតលក់អោយពលរដ្ឋខ្មែរនៅក្នុងហាងកាហ្វេមួយកន្លែង ស្ថិតក្នុងទីរួមខេត្តស្វាយរៀង កាលពីថ្ងៃទី២១ ខែសីហា ឆ្នាំ២០១៥។
RFA/Tha Kitya
|
អង្គការលីកាដូ (LICADHO) និងប្រជាពលរដ្ឋខ្មែរ ស្នើឲ្យអាជ្ញាធរចាត់វិធានការទប់ស្កាត់ជនជាតិវៀតណាម ដែលចូលលក់ឆ្នោតយ៉ាងអនាធិបតេយ្យក្នុងខេត្តស្វាយរៀង ដោយពួកគាត់មើលឃើញថា បញ្ហានេះធ្វើអោយប៉ះពាល់ធ្ងន់ធ្ងរដល់សង្គមកម្ពុជា។ ទាក់ទិនបញ្ហានេះ ស្នងការនគរបាលខេត្តស្វាយរៀង ថា ការចេញចូលរកស៊ីរវាងប្រជាពលរដ្ឋទាំងពីរ គឺវៀតណាម និងខ្មែរនោះ គឺជារឿងធម្មតា។
ជារៀងរាល់ថ្ងៃនេះ គេសង្កេតឃើញថា ជនជាតិវៀតណាម កាន់តែច្រើនឡើងដើរលក់ឆ្នោតយ៉ាងអនាធិបតេយ្យនៅតាមហាងកាហ្វេ តាមភោជនីយដ្ឋាននានា និងតាមទីប្រជុំជន នៅក្នុងប្រទេសកម្ពុជា ក្រោមភ្នែកច្រមុះរបស់អាជ្ញាធរខ្មែរ។
មើលតែមួយជ្រុងក្នុងខេត្តស្វាយរៀង ប៉ុណ្ណោះ គឺពលរដ្ឋខ្មែរអះអាងថា យ៉ាងហោចណាស់មានជនជាតិវៀតណាម ជាង ១០០នាក់ មានក្មេងចាស់ ស្រី ប្រុស ដើរកាន់សន្លឹកឆ្នោតលក់អោយពលរដ្ឋខ្មែរជាសាធារណៈដោយគ្មានលាក់បាំងនោះទេ។
យុវជនសម្បុរខ្មៅម្នាក់រៀបរាប់ថា បញ្ហាជនជាតិវៀតណាម ចូលមកលក់សន្លឹកឆ្នោតនេះ គឺអាជ្ញាធរខ្មែរនៅខេត្តស្វាយរៀង ហាក់មិនចាប់អារម្មណ៍ទប់ស្កាត់នោះឡើយ ដោយចាត់ទុកថា ជារឿងកំប៉ិកកំប៉ុកទៅវិញ។ តែយ៉ាងណាសម្រាប់លោកមើលឃើញថា វាអាចធ្វើអោយប៉ះពាល់ដល់សណ្ដាប់ធ្នាប់សង្គម និងពិបាកគ្រប់គ្រងជនអន្តោប្រវេសន៍៖ «ខ្ញុំអំពាវនាវអោយអាជ្ញាធរគ្រប់លំដាប់ថ្នាក់ ទាំងនាយករដ្ឋមន្ត្រី ជួយអន្តរាគមន៍ដោះស្រាយការពារសណ្ដាប់ធ្នាប់សង្គម ជាពិសេសគឺអនុវត្តច្បាប់អន្តោប្រវេសន៍របស់យើង»។
សន្លឹកឆ្នោតដែលមានប្រភពចេញពីទីក្រុងហូជីមិញ ប្រទេសវៀតណាម ហើយត្រូវបានគេនាំចូលមកលក់ឲ្យប្រជាពលរដ្ឋខ្មែរទិញផ្ទៀងនោះ គឺក្នុងតម្លៃ ២.០០០ ទៅ ២.៥០០រៀល ក្នុង ១សន្លឹក ដែលជនជាតិវៀតណាម ចំណេញចាប់ពី ១.០០០ ទៅ ១.៥០០រៀល ក្នុង ១សន្លឹកដែរ។
ទាក់ទិនបញ្ហានេះដែរ មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តស្វាយរៀង លោក នុត បូពិណ្ណរ័ត្ន គត់សម្គាល់ថា សកម្មភាពជនជាតិវៀតណាម ដើរលក់ឆ្នោត បានចាប់ផ្ដើមកើតឡើងវិញពេញបន្ទុក ក្រោយពីតំណាងរាស្ត្របក្សប្រឆាំងផ្អាកដឹកនាំពលរដ្ឋខ្មែរចុះពិនិត្យព្រំដែន។
លោកសង្កេតឃើញថា ការចេញចូលរបស់ជនជាតិវៀតណាម ទាំងនោះ គឺខុសនឹងច្បាប់៖ «មិនមានអីត្រូវនឹងច្បាប់ទេ ជនជាតិវៀតណាមខ្លះ ល្ងាចឡើងចេញទៅវិញ ហើយអ្នកខ្លះជួយផ្ទះដេកនៅហ្នឹង ហើយមកទាំងម៉ូតូដែលមានស្លាកវៀតណាម តែខ្មែរយើងធ្លាប់ទៅវៀតណាម គឺគ្មានម៉ូតូណាទៅបើកតាមជាយក្រុងអីទេ»។
ជាការឆ្លើយតបចំពោះបញ្ហានេះ ស្នងការនគរបាលខេត្តស្វាយរៀង លោក កឹង ឃន មានប្រសាសន៍ថា ការចេញចូលរបស់ប្រជាពលរដ្ឋរស់នៅជាប់ព្រំដែននៃប្រទេសទាំងពីរគឺជារឿងធម្មតា ព្រោះប្រជាពលរដ្ឋទាំងសងខាងចូលព្រឹក ហើយត្រឡប់ទៅកាន់ប្រទេសកំណើតវិញរៀងៗខ្លួននៅពេលល្ងាចដូចៗគ្នា។
ទោះយ៉ាងណា លោកក៏មិនអាចបញ្ជាក់បានទេថា តើការលក់ឆ្នោតជាតិវៀតណាម នៅក្នុងប្រទេសកម្ពុជា នេះ ជាការលក់ដោយស្របច្បាប់ ឬក៏អត់ច្បាប់នៅឡើយ៖ «ស្រប (ច្បាប់) មិនស្របអី អាហ្នឹងបើយើងទៅរកស៊ីស្រុកគេ មានគេមករកស៊ីនៅស្រុកយើងក៏មានដូចតែគ្នាហ្នឹង»។
មន្ត្រីសម្របសម្រួលនៃអង្គការសិទ្ធិមនុស្សលីកាដូ ដដែលបញ្ជាក់ថា ឆ្នោតគឺជាល្បែងស៊ីសងដែលវាខុសនឹងច្បាប់កម្ពុជា តែរយៈពេលច្រើនឆ្នាំមកហើយ ពុំឃើញមានការអប់រំណែនាំណាមួយ និងពុំមានការចាប់បង្ក្រាបមេឆ្នោតនោះទេ ដោយលោកសង្ស័យថា អាចជាការត្រូវរ៉ូវគ្នាប្រព្រឹត្តអំពើពុករលួយពីសំណាក់អាជ្ញាធរក្នុងស្រុក។
បញ្ហាបណ្ដោយឲ្យជនជាតិវៀតណាម លក់ឆ្នោតដោយគ្មានការទប់ស្កាត់ និងគ្រប់គ្រងត្រឹមត្រូវនេះ គឺធ្វើប៉ះពាល់ធ្ងន់ធ្ងរដល់សង្គម និងសេដ្ឋកិច្ចជាតិកម្ពុជា។ ប៉ះពាល់ព្រោះថា លំហូរសាច់ប្រាក់ចេញទៅក្រៅប្រទេសតាមរយៈការទិញសន្លឹកឆ្នោត ដែលគេមិនអាចប៉ាន់ស្មានបានក្នុងមួយថ្ងៃៗ។ ជាងនេះទៅទៀត មន្ត្រីអង្គការសិទ្ធិមនុស្សលីកាដូ ថា វៀតណាម មិនបានបង់ពន្ធជូនកម្ពុជា ឡើយ និងធ្វើអោយប៉ះពាល់ដល់សណ្ដាប់ធ្នាប់ទៀតផង ដែលបញ្ហានេះ អាជ្ញាធរកម្ពុជា មិនគួរមើលរំលងនោះទេ៕
No comments:
Post a Comment