Former Khmer Rouge Foreign Minister Ieng Sary.
ប៉ៃលិនៈ មន្ត្រីនគរបាលមូលដ្ឋានម្នាក់បានឲ្យដឹងថា កូនប្រសាប្រុសរបស់អតីតមេដឹកនាំខ្មែរក្រហមមួយរូប បានបាក់កស្លាប់ ក្នុងហេតុការណ៍គ្រោះថ្នាក់ចរាចរណ៍ រថយន្តបុកម៉ូតូ ហើយក្រឡាប់ធ្លាក់ចូលក្នុងប្រឡាយដែលគ្មានទឹកដក់ កាលពីព្រឹកថ្ងៃអង្គារ នៅតាមបណ្ដោយផ្លូវជាតិលេខ ៥៧ ត្រង់ចំណុចផ្លូវកោង ក្នុង ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោក ជុំ វឿន នាយនគរបាលប៉ុស្តិ៍ ឃុំស្ទឹងកាច់ បានប្រាប់ឲ្យដឹងថា ជនរងគ្រោះស្លាប់មានឈ្មោះ ប៊ុន លឹម អាយុ ៥៥ឆ្នាំ ជាថៅកែទឹកកក ស្នាក់នៅក្នុង ភូមិអូរតាប្រាង្គ សង្កាត់ប៉ៃលិន ក្រុងប៉ៃលិន ដែលត្រូវជាកូនប្រសាលោក អៀង សារី អតីតមេដឹកនាំជាន់ខ្ពស់មួយរូប ក្នុងរបបកម្ពុជាប្រជាធិបតេយ្យខ្មែរក្រហម បានបាក់កស្លាប់ភ្លាមៗ នៅនឹងកន្លែងកើតហេតុ ឯអ្នកបើកម៉ូតូម្នាក់ឈ្មោះ ហ៊ុន សុផល ភេទស្រី អាយុ ២២ ឆ្នាំ បានរងរបួសធ្ងន់។
តាមសាក្សីអះអាងប្រាប់នគរបាលថា មុនពេលកើតហេតុ គេឃើញលោក ប៊ុន លឹម បើករថយន្តម៉ាកតូយ៉ូតាមួយបាំងកន្លះ ពណ៌ខ្មៅ ពាក់ស្លាកលេខថៃ ធ្វើដំណើរតាមផ្លូវជាតិលេខ ៥៧ ក្នុងល្បឿនលឿន។ លុះមកដល់ចំណុចកើតហេតុក៏បានជ្រុលទៅបុកម៉ូតូមួយគ្រឿង បើកបរដោយឈ្មោះ ហ៊ុន សុផល ពីក្រោយពេញទំហឹងធ្វើឲ្យរថយន្តក្រឡាប់ជាច្រើនត្រឡប់ធ្លាក់ពីផ្លូវជាតិចូលប្រឡាយគ្មានទឹក បណ្ដាលឲ្យអ្នកបើកបររថយន្តស្លាប់ក្នុងរថយន្ត រីឯអ្នកបើកបរម៉ូតូរងរបួសជាទម្ងន់។
លោកមេប៉ុស្តិ៍ស្ទឹងកាច់ បន្តថា សពជនរងគ្រោះត្រូវក្រុម គ្រួសារសាច់ញាតិនាំយកទៅធ្វើបុណ្យ ចំណែកអ្នកបើកបរម៉ូតូដែលរងរបួសធ្ងន់នោះ ត្រូវសមត្ថកិច្ច និងក្រុមគ្រួសារដឹកយកទៅសង្គ្រោះនៅមន្ទីរពេទ្យ ខេត្តបាត់ដំបង៕
3 comments:
Ah Ieng Sary was Ah Mer Yum Phubal !!
We don't need to know and we don't care.
Karma!!!!
Post a Comment