ដោយ៖ ស៊ុន ណារិន | ថ្ងៃចន្ទ ទី23 កុម្ភៈ 2015,
លោកនាយករដ្ឋមន្រ្តី ហ៊ុន សែន និងលោក អាឡិច
លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ ប្រតិកម្មនឹងអ្នករិះគន់រដ្ឋាភិបាលដែលមិនបានពន្យារទិដ្ឋាការដល់សកម្មជនការពារព្រៃឈើនៅតំបន់អារ៉ែង លោក លោក អាឡិចហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) ឲ្យបន្តរស់នៅប្រទេសកម្ពុជាបន្តទៀត។
ប្រតិកម្មរបស់លោកនាយករដ្ឋមន្រ្តី ហ៊ុន សែន ត្រូវបានធ្វើឡើងបន្ទាប់ពីសង្គមស៊ីវិលមួយចំនួន និងអ្នកនយោបាយបានរិះគន់រដ្ឋាភិបាលចំពោះចំណាត់ការលើសកម្មជនបរទេសជនជាតិអេស្ប៉ាញ លោក អាឡិច។
ក្នុងពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រង លោកនាយករដ្ឋមន្រ្តី ហ៊ុន សែន មានប្រសាសន៍ថាប្រទេសកម្ពុជាជារដ្ឋអធិបតេយ្យមួយ ហើយប្រសិនបើជនបរទេស និងប្រជាជនខ្មែរណាបំពាន គឺត្រូវតែមានទោស។ លោកនាយករដ្ឋមន្រ្តីបន្តថា ករណីនេះ កំពុងតែធ្វើឲ្យស្ថានការណ៍កាន់តែអាក្រក់ ដែលអាចនឹងនាំឲ្យមានការបណ្តេញចេញ និងត្រូវចូលបញ្ជីខ្មៅរបស់រដ្ឋាភិបាលកម្ពុជា។ លោកបញ្ជាក់ថា«គេសុខចិត្តឲ្យនៅរហូតដល់អស់ទិដ្ឋាការ។ អញ្ចឹងយើងចេញទៅសិនទៅ រួចហើយចាំសុំត្រឡប់មកវិញ វាទាស់ខុសអី។ ចាំបាចប់ង្កើតស្ថានភាពនេះ(ឲ្យកាន់តែអាក្រក់)។ តែគេបណ្តេញចេញហើយ វាត្រូវចូលក្នុងបញ្ជីខ្មៅ។ វាចប់ហើយ។ អាហ្នឹងហើយគេថាចង់ជ្រុល…»។
លោកនាយករដ្ឋមន្រ្តី ក៏បានស្នើឲ្យអ្នកនយោបាយមួយចំនួនពិចារណាលើករណីនេះ ដោយលើកឡើងថាមិនមានជនបរទេសណាដែលស្រឡាញ់ខ្មែរជាងប្រជាជនខ្មែរនោះទេ។ លោកបានថ្លែងថា«មិនថាជនបរទេសបំពានទេ ជនជាតិខ្មែរបំពានក៏ត្រូវតែមានទោសដែរ។ អំណាចរដ្ឋ ម្យ៉ាងទៀត ក៏សូមផ្តាំផ្ញើអ្នកនយោបាយមួយចំនួន សូមបញ្ជាក់ឲ្យហើយ គ្មានបរទេសណា ស្រឡាញ់ខ្មែរជាងខ្មែរទេ។ ប៉ុន្តែសង្ឃឹមថារឿងអស់ទាំងនេះ ត្រឹមតែរដ្ឋមន្រ្តីមហាផ្ទៃ ដោះស្រាយបានហើយ។ គេទៅរំខានដល់ព្រះមហាក្សត្រណោះ»។
លោកនាយករដ្ឋមន្រ្តី ក៏បានរិះគន់អ្នកនយោបាយមួយចំនួន ដែលបានសរសេរលិខិតសុំអន្តរាគមន៍ពីព្រះមហាក្សត្រ ដែលលោកចាត់ទុកថានេះជារឿងរំខានព្រះមហាក្សត្រ។ លោកបន្តថាត្រឹមតែរដ្ឋមន្រ្តីក្រសួងមហាផ្ទៃ ដោះស្រាយបញ្ហានេះបានហើយ។ លោកនាយករដ្ឋមន្រ្តីបន្តថារដ្ឋាភិបាលបានកំពុងតែទាក់ទងទៅស្ថានទូតអេស្ប៉ាញ ដើម្បីឲ្យលោកអាឡិចចេញទៅក្រៅប្រទេសតាមសម្រួល។
លោក អាឡិច ប្រាប់VODនៅថ្ងៃចន្ទនេះលោកនឹងចាកចេញពីប្រទេសកម្ពុជាមួយរយៈសិន ប្រសិនបើមានការសន្យាជាក់លាក់ថានឹងមានការផ្តល់ទិដ្ឋាការឲ្យលោកអាចរស់នៅកម្ពុជាវិញ។ ប៉ុន្តែលោកថាលោកមិនមានជំនឿថាបានត្រឡប់មកកម្ពុជាវិញទេ។
គួររំឮកថា កាលពីថ្ងៃទី១៦ ខែកុម្ភៈ ប្រធានគណបក្សសង្រ្គោះជាតិ លោក សម រង្ស៊ី បានផ្ញើលិខិតជូនរដ្ឋមន្ត្រីក្រសួងមហាផ្ទៃ លោក ស ខេង ដោយស្នើឲ្យលោក ស ខេង អន្តរាគមន៍ទៅនាយកដ្ឋានអន្តោប្រវេសន៍នៃក្រសួងមហាផ្ទៃ បន្តទិដ្ឋាការឲ្យលោក អាឡិច ដើម្បីអាចមានសិទ្ធិបន្តស្នាក់នៅក្នុងប្រទេសកម្ពុជា។ចំណែកអនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភាលោក កឹម សុខា ក៏បានផ្ញើលិខិតមួយទៅប្រធានរដ្ឋសភាលោក ហេង សំរិន និងមួយទៀតផ្ញើថ្វាយព្រះមហាក្សត្រដែលមានខ្លឹមសារដូចគ្នា គឺសុំឲ្យអន្តរាគមន៍ទៅស្ថាប័នពាក់ព័ន្ធជួយបន្តទិដ្ឋការដល់លោក អាឡិចបានស្នាក់នៅក្នុងទឹកដីកម្ពុជា ដើម្បីជួយការពារធនធានធម្មជាតិនៅកម្ពុជា។
ចំណែកឯអង្គការសមាគមជាង៣០បានចេញសេចក្តីថ្លែងការរួមមួយដោយសម្តែងការសោកស្តាយចំពោះសេចក្តីសម្រេចចិត្តមិនបន្តទិដ្ឋាការជូនលោក អាឡិច ។ អង្គការសមាគមទាំងនោះចាត់ទុកលោក អាឡិច ថាជាបុគ្គលមួយរូបដែលឈានមុខគេក្នុងការធ្វើយុទ្ធនាការ ការពារតំបន់អារ៉ែងមិឲ្យមានការកសាងទនប់វារីអគ្គិសនី ដែលគេជឿថា ការកសាងទំនប់វារីអគ្គិសនីនេះ នឹងអាចប៉ះពាល់ដល់ដីលំនៅដ្ឋានរបស់ជនជាតិជងនៅទីនោះ ។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថាលិខិតឆ្លងដែនរបស់លោក អាឡិចនឹងត្រូវផុតកំណត់នៅថ្ងៃទី២០ ខែកុម្ភៈ តែលោកអាឡិចអាចបន្តស្នាក់នៅកម្ពុជាបាន ដោយមិនបាច់ទៅសុំបន្តទិដ្ឋាការថ្មី ដោយត្រូវបង់ប្រាក់ពិន័យ៥ដុល្លារក្នុង១ថ្ងៃ។ លោកថា លោកអាឡិច គឺជាជនបរទេសមិនមែនអន្តោប្រវេសន៍ ដែលក្រសួងមហាផ្ទៃមិនអាចយកច្បាប់អន្តោប្រវេសន៍ ទៅអនុវត្តលើបុគ្គលនោះបានទេ ។
អ្នកគ្រប់គ្រងបច្ចេកទេសស៊ើបអង្កេតនៃអង្គការលីកាដូ លោក អំ សំអាត ទទួលស្គាល់ថាក្នុងប្រទេសនីមួយៗពិតជាមាននីតិរដ្ឋ និងអធិបតេយ្យភាពទឹកដីរបស់ខ្លួនមែន ប៉ុន្តែរាល់ការអនុវត្តច្បាប់ឬបទដ្ឋានអ្វីមួយគួរតែស្របទៅតាមមជ្ឈដ្ឋានអន្តរជាតិដែរ។ លោកបន្តថាក្នុងនាមជាសង្គមស៊ីវិលលោកនៅតែទទូចឲ្យរដ្ឋាភិបាលបន្តទិដ្ឋការដល់ជនបរទេសជួយសង្គមជាតិខ្មែរម្នាក់នេះ ហើយថាប្រសិនបើរដ្ឋាភិបាលមានចេតនាបណ្តេញបរទេសរូបនេះចេញមែននោះ នឹងធ្វើឲ្យកម្ពុជារងការរិះគន់ពីអន្តរជាតិ ។
មន្ត្រីនាយកដ្ឋានជនបរទេសមិនអន្តោប្រវេសន៍ លោក សុខ វាសនា មានប្រសាសន៍ថាបើទិដ្ឋាការផុតកំណត់៣០ថ្ងៃ តាមអនុក្រឹត្យ ត្រូវចាប់បញ្ជូនជនមិនមែនអន្តោប្រវេសន៍នោះចេញពីកម្ពុជា ។ លោកលើកឡើងថា«តាមច្បាប់របស់យើង អនុក្រិតយើង វាលើស៣០ថ្ងៃគាត់ត្រូវតែបង់ផាកពិន័យ ហើយចាប់បញ្ជូនចេញ អត់មានបញ្ហា ឬក៏យើងមិនបានហាមឃាតថាអត់ឲ្យគាត់ចូលវិញទេ ចឹងគាត់មានសិទ្ធិគ្រាន់តែផុតទិដ្ឋាការហ្នឹង ឲ្យគាត់អញ្ជើញចេញ ហើយមានសិទ្ធិចូលមកវិញសុំទិដ្ឋាការថ្មីម្តងទៀត»។
លោក អាឡិច ជាជនជាតិអេស្ប៉ាញដែលបានមករស់នៅលើទឹកដីកម្ពុជានេះជាង១០ ឆ្នាំមកហើយ និងចេះនិយាយភាសាខ្មែរបានយ៉ាងច្បាស់លាស់ ព្រមទាំងបានបង្កើតសមាគមការពារព្រៃឈើមួយឈ្មោះថា មាតាធម្មជាតិ ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
No comments:
Post a Comment