តារាចម្រៀង និងសម្តែងលោក ហេង ប៊ុនលាភ និងភរិយា បណ្តើរគ្នាចូលកម្មវិធីសិល្បៈកន្លងមក។ រូបថត សហការី
ទោះបីពេលវេលារំលងអស់រយៈពេលប៉ុន្មានឆ្នាំក្តី ប៉ុន្តែតារាចម្រៀងម្ចាស់បទ «ទឹកភ្នែកស្វាមីស្រីឡង់សេ» និងជាតារាសម្តែងដ៏មានកេរ្តិ៍ឈ្មោះលោក ហេង ប៊ុនលាភ ហាក់នៅតែតុកស៊ិចជុំវិញរឿងរ៉ាវនៃការខាតបង់ប្រាក់តម្លៃរាប់ម៉ឺនរាប់លានដុល្លារ ដោយសារតែការរកស៊ីមិនស្មោះត្រង់នឹងគ្នា។
លោក ហេង ប៊ុនលាភ ជាអតីតប្រុសស្អាតចំណាត់ថ្នាក់លេខ២ កាលពីឆ្នាំ២០០១ ហើយលោកក៏បានក្លាយខ្លួនជាតារាចម្រៀងក្នុងផលិតកម្ម SSB ដោយមានលោក ហ្វៃ សំអាង ជាអ្នកផ្ចុងផ្តើម។ ក្នុងរយៈពេលដ៏ខ្លី លោក ហេង ប៊ុនលាភ ក៏បានផ្តើមភាពល្បីល្បាញតាមរយៈទឹកដមសំនៀងដ៏ស្រទន់មានមន្តស្នេហ៍ ហើយបទល្បីៗរបស់លោកមានដូចជា «ទឹកភ្នែកស្វាមីស្រីឡង់សេ» «ជីដូនកាកី» «សឹកហួសព្រោះស្នេហ៍» និងបទចុងក្រោយជាច្រើនទៀត។
ខណៈពេលដែលទីផ្សារចម្រៀង និងសម្តែងកាន់តែមានសន្ទុះ ស្រាប់តែលោក ហេង ប៊ុនលាភ បានសម្រេចចិត្តរៀបអាពាហ៍ពិពាហ៍ជាមួយកូនស្រីស្រស់សោភារបស់ថៅកែឡូនេសាទម្នាក់នៅខេត្តពោធិ៍សាត់ កាលពីអំឡុងឆ្នាំ២០០៧ ហើយលោកក៏បានផ្អាកការងារសិល្បៈ ស្រវាចាប់យកជំនួញដែលមានចំណូលខ្ពស់ជាងសិល្បៈ។
គួរបញ្ជាក់ថា ក្រោយរៀបអាពាហ៍ពិពាហ៍ នាពេលបច្ចុប្បន្ននេះ លោក ប៊ុនលាភ ទទួលបានបុត្រាចំនួនពីរនាក់។
លោក ហេង ប៊ុនលាភ។ សេត គឹមសឿន
នៅក្នុងរយៈកាលក្រោយរៀបការ ហើយធីបចោលសិល្បៈនោះ បើតាមអ្នកសិល្បៈដូចគ្នាបានទម្លាយឲ្យដឹងថា តារាចម្រៀង និងសម្តែង ហេង ប៊ុនលាភ ស្ទើរតែក្លាយជាសេដ្ឋីដីធ្លីវ័យក្មេងដ៏មានឥទ្ធិពលម្នាក់ ដោយសារតែលោកមានជំនួញជាច្រើនក្នុងដៃ ពិសេសនោះ គឺជំនួញដីធ្លី ដែល ហេង ប៊ុនលាភ ខ្លួនឯងបានហៅថា «ជំនួញព្រះធរណី»។
ខណៈពេលដែលចំណូលហូរចូលដូចហែកដំបូលច្រក ស្រាប់តែរំលងបានប៉ុន្មានឆ្នាំទស្សនិកជនមានការភ្ញាក់ផ្អើលយ៉ាងខ្លាំងនៅពេលដែលលោក ហេង ប៊ុនលាភ បានលេចមុខជាថ្មីលើវិថីសិល្បៈ តែពួកគេមើលតារារូបនេះស្ទើរតែមិនស្គាល់ដោយសារតែលោក ហេង ប៊ុនលាភ ធ្លាក់ខ្លួនស្គមស្គាំងយ៉ាងខ្លាំងមិនដឹងមូលហេតុ។ លោក ហេង ប៊ុនលាភ ហាក់បៀមទុក្ខ មិនព្រមនិយាយស្តីជុំវិញការធ្លាក់ខ្លួនស្គមឈឺនោះទេ។
ដោយរក្សាអាថ៌កំបាំងនៃការធ្លាក់ខ្លួនអស់រយៈពេលជាច្រើនឆ្នាំ ទើបតែពេលនេះ លោក ហេង ប៊ុនលាភ បានទម្លាយប្រាប់ ភ្នំពេញ ប៉ុស្តិ៍ ថា នៅក្នុងអំឡុងពេលនេះ លោកខាតបង់ឡុងចុងរឿងជំនួញដីធ្លីរាប់លានដុល្លារ។
ក្នុងអារម្មណ៍ហាក់ដូចជាឆ្អែតចិត្តទាំងមិននឹកស្មាន លោក ហេង ប៊ុនលាភ និយាយថា៖«នៅក្នុងអំឡុងខ្ញុំផ្អាកសិល្បៈនោះ ខ្ញុំមានជំនួញជាច្រើនមុខ ហើយជំនួញធំនោះគឺដីធ្លី។ តែនៅពេលនេះ ខ្ញុំមានជំនួញតូចតាចតិចតួចប៉ុណ្ណោះ។ នោះគឺដោយសារតែខ្ញុំបានខាតបង់យ៉ាងធំលើជំនួញព្រះធរណីនេះ»។
លោកបន្តថា៖«នៅពេលនោះ ខ្ញុំធ្វើជំនួញដីធ្លីតម្លៃរាប់លានដុល្លារជាមួយបរទេស ពេលយើងទៅមើលដីម្តងៗសុទ្ធតែជួលអេឡេកុកទ័រ ជិះមួយម៉ោង ២-៣ពាន់ដុល្លារឯណោះ ព្រោះដីរាប់ម៉ឺនហិកតា តែខ្ញុំបានខាតយ៉ាងធ្ងន់ធ្ងរដោយសារការរកស៊ីមិនមានភាពស្មោះត្រង់នឹងគ្នា»។
លោកបន្តទៀតថា៖«នៅពេលនោះ ខ្ញុំបានសម្ងំលាក់ខ្លួនជាច្រើនឆ្នាំ ទើបបានគ្រាន់បើបន្តិចនៅពេលនេះ ហើយឥឡូវខ្ញុំមានជំនួញតូចតាចប៉ុណ្ណោះ»។
លោកបញ្ជាក់ថា៖«នៅពេលនេះ ខ្ញុំពិបាករកស៊ីណាស់ ព្រោះធ្លាប់តែកាន់លុយធំ...»។
ជាមួយនឹងទុក្ខកង្វល់តុកស៊ិចនោះ លោក ហេង ប៊ុនលាភ បានលេចមុខជាថ្មីនៅលើវិថីសិល្បៈសម្តែង ដែលនៅពេលនេះលោកកំពុងថតភាពយន្តភាគឲ្យផលិតកម្មរ៉ុក រឿង «ទឹកចិត្តប្រពន្ធ»។
លោកនិយាយថា៖«នៅពេលនេះ ខ្ញុំចង់លម្ហែឲ្យបាត់តុកស៊ិចខ្លះ។ ខ្ញុំមកថតកុនវិញ ខ្ញុំបានជួបមិត្តភកិ្ត ថតសម្តែងទៅហាក់ធូរអារម្មណ៍ម្យ៉ាងដែរ ហើយបានចំណូលបន្ថែមផង»។
តែទោះបីជាយ៉ាងណាលោកបានបញ្ជាក់ថា៖«ខ្ញុំមិនអាចមកលេងសិល្បៈ១០០ភាគរយទេ ខ្ញុំនៅជាប់ការងារផ្ទាល់ខ្លួនជាច្រើនទៀតត្រូវមើលការខុសត្រូវ ពិសេសមុខជំនួញនៅសេសសល់របស់ខ្ញុំ»៕
1 comment:
He is a nice looking Cambodian man.
Post a Comment