ដោយ៖ ញឹម សុខន | ថ្ងៃសុក្រ ទី27 មិថុនា 2014, VOD
តំណាងរាស្ត្រជាប់ឆ្នោតបក្សជំទាស់ មួយរូប នៅថ្ងៃសុក្រនេះ បានរិះគន់ ជាសាធារណៈថា បក្សកាន់អំណាច កំពុងធ្វើឲ្យ លិទ្ធិប្រជាធិបតេយ្យ នៅកម្ពុជា ដើរថយក្រោយ ខណៈប្រជាពលរដ្ឋ នៅតែមិនអាច សម្តែងមតិ នៅទីលានប្រជាធិបេយ្យ។
ជាថ្មីម្តងទៀត តំណាងរាស្ត្រជាប់ឆ្នោតគណបក្សសង្គ្រោះជាតិ លោក រៀល ខេមរិន្ទ្រ បានប្រាប់អ្នកសារព័ត៌មាន ជិតទីលានប្រជាធិបតេយ្យ នៅថ្ងៃទី២៧ខែមិថុនាឆ្នាំ២០១៤នេះថា បើរដ្ឋាភិបាល នៅតែបន្តបិទទីលានប្រជាធិបតេយ្យ មិនឲ្យប្រជាពលបានសម្តែងមតិនោះ បង្ហាញថា កម្ពុជាមិនមែនជាប្រទេសដែលប្រកាន់លទ្ធិប្រជាធិបតេយ្យទេ។
លោក រៀល ខេមរិន្ទ្រ ជំរុញឲ្យរដ្ឋាភិបាល បើកទីលានប្រជាធិបតេយ្យ ឲ្យប្រជាពលរដ្ឋបានសម្តែងមតិឡើងវីញ ដើម្បីធានាសិទ្ធិពលរដ្ឋដែលមានចែងក្នុងច្បាប់ និងផ្តល់សេរីភាព ដល់សមត្ថកិច្ចដែលបានដាក់ពង្រាយដេកចាំទាំងយប់ទាំងថ្ងៃ។
វិធានការបិទទីលានប្រជាធិបតេយ្យ របស់រដ្ឋាភិបាលនេះ ត្រូវបានតំណាងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោក សុរិយា ស៊ូប៊ែឌី ចាត់ទុកថា ប្រជាធិបតេយ្យនៅកម្ពុជាក្នុងរយៈដ៍ខ្លីនេះបានរួមតូច ដែលជាកង្វល់របស់អ្នកឃ្លាំមើលការរំលោភសិទ្ធិមនុស្ស។
VOD មិនអាចសុំអត្ថាធិប្បាយពីអ្នកនាំពាក្យក្រសួងមហាផ្ទៃលោក ខៀវ សុភ័គ បានទេ ដោយមិនមានអ្នកលើកទូរស័ព្ទ។ ប៉ុន្តែអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ អះអាងថា ទីលាននឹងបើកឲ្យប្រជាពលរដ្ឋសម្តែងមតិឡើងវិញ នៅពេលណាមានសេចក្តីណែនាំពីរដ្ឋាភិបាល។
បច្ចុប្បន្ននេះ ទីលានត្រូវបានហ៊ុមព័ទ្ធដោយបន្លាលួសច្រើនជាន់ និងដាក់ពង្រាយកងកម្លាំងប្រដាប់អាវុធយាមទាំងយប់ទាំងថ្ងៃ ទប់ស្កាត់ការព្យាយាមជួបជុំណាមួយ។
នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា លោក ស្រី រស់ សុភាព ឲ្យដឹងដែរថា រដ្ឋាភិបាលផ្តល់សច្ចាប័នជាមួយអង្គការសហប្រជាជាតិ ស្តីពីការគោរពសិទ្ធិមនុស្ស គ្មានហេតុណាមួយដែលរដ្ឋាភិបាល បិទទីលានប្រជាធិបតេយ្យទេ។
ទីលានប្រជាធិបតេយ្យ ត្រូវបានក្រសួងមហាផ្ទៃ ចេញសេចក្តីណែនាំឲ្យសាលារាជធានីភ្នំពេញ ប្រកាសហាមជួបជុំតាំងពីថ្ងៃទី៤ ខែមករា ឆ្នាំ២០១៤ បន្ទាប់ពីមានព្រឹត្តិការណ៍បាញ់សម្លាប់ និងចាប់ខ្លួនក្រុមកម្មករតវ៉ាទាមទារប្រាក់ឈ្នួល នៅផ្លូវវ៉េងស្រេង រាជធានីភ្នំពេញ៕
សូមសរសេរមកលោក ញឹម សុខន តាមរយៈ sokhorn@vodhotnews.com
No comments:
Post a Comment