អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី (Surya Subedi) ផ្ដល់បទសម្ភាសន៍ដល់អ្នកកាសែត នាមុខទីស្ដីការគណៈរដ្ឋមន្ត្រី នៅថ្ងៃទី២២ ខែឧសភា ឆ្នាំ២០១៣។
RFA/Leng Maly
តំណាងគណបក្សជាប់ឆ្នោតទាំងពីរ គ្រោងនឹងជួបអ្នករាយការណ៍ពិសេសអង្គការសហប្រជាជាតិ លោក សុរិយា ស៊ូប៊ែឌី នៅថ្ងៃទី២០ មិថុនា ដើម្បីជជែកអំពីការកែទម្រង់បោះឆ្នោត និងអំពីពលករខ្មែរដែលថៃ បញ្ជូនមកកម្ពុជា វិញ។
តំណាងគណបក្សទាំងពីរគ្រោងជួបគ្នានេះ បន្ទាប់ពីការចរចារកដំណោះស្រាយនយោបាយរួមមិនទាន់ចេញ ហើយក៏មិនទាន់កំណត់ពេលវេលាច្បាស់លាស់ ដើម្បីជួបគ្នាជាថ្មីនៅឡើយ។
មន្ត្រីជាន់ខ្ពស់គណបក្សប្រជាជនកម្ពុជា និងមន្ត្រីជាន់ខ្ពស់គណបក្សសង្គ្រោះជាតិ គ្រោងនឹងជួប លោក សុរិយា ស៊ូប៊ែឌី (Surya Subedi) អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្ស ក្នុងជំនួបដាច់ដោយឡែកពីគ្នានៅថ្ងៃទី២០ មិថុនា។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា នៅថ្ងៃសុក្រ ទី២០ មិថុនា លោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ នឹងជួប លោក សុរិយា ស៊ូប៊ែឌី នៅម៉ោង ២ និង ៣០នាទីរសៀល តែការជួបពិភាក្សាអំពីបញ្ហាអ្វីខ្លះនោះ លោកមិនទាន់ដឹងនៅឡើយ។
ដោយឡែកអនុប្រធានគណបក្សសង្គ្រោះជាតិ វិញ លោក កឹម សុខា នឹងដឹកនាំគណៈប្រតិភូជួប លោក សុរិយា ស៊ូប៊ែឌី ដែរនៅថ្ងៃទី២០ មិថុនា វេលាម៉ោង ៥ល្ងាច។
មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ឲ្យដឹងនៅថ្ងៃទី១៩ មិថុនា ថា ការិយាល័យឧត្ដមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស បានយល់ព្រមតាមការស្នើសុំរបស់គណបក្សសង្គ្រោះជាតិ ដើម្បីសុំជួប លោក សុរិយា ស៊ូប៊ែឌី នេះ។ លោកបញ្ជាក់ថា គណបក្សសង្គ្រោះជាតិ នឹងរាយការណ៍បីចំណុចសំខាន់ៗជូន លោក សុរិយា ស៊ូប៊ែឌី គឺទី១ បញ្ហាគោរពសិទ្ធិមនុស្សនៅកម្ពុជា មានបញ្ហាដីធ្លី និងករណីរដ្ឋាភិបាលយោធាថៃ បញ្ជូនពលករខ្មែរមកកម្ពុជា វិញ។ ទី២ រាយការណ៍អំពីការកែទម្រង់ការបោះឆ្នោតនៅកម្ពុជា និយាយពីដំណើរការជាប់គាំងនៃការចរចានៃគណបក្សទាំងពីរ និងទី៣ គណបក្សសង្គ្រោះជាតិ នឹងរាយការណ៍អំពីការកែទម្រង់ប្រព័ន្ធយុត្តិធម៌៖ «ការបោះឆ្នោតយើងរាយការណ៍ពីអ្វីដែលកំណែទម្រង់ ដែលគណបក្សសង្គ្រោះជាតិ ចង់បាន ការជាប់គាំងនៃការចរចា ហើយនឹងពន្យល់បន្ថែមពីបំណងកំណែទម្រង់នេះ ក្នុងន័យឲ្យមានដំណោះស្រាយមួយសម្រាប់ការបោះឆ្នោតជាទូទៅ ពីឥឡូវទៅលើកក្រោយៗទៀត»។
ការគ្រោងជួបអ្នករាយការណ៍ពិសេសអង្គការសហប្រជាជាតិ របស់តំណាងគណបក្សសង្គ្រោះជាតិ នេះ នៅបន្ទាប់ពីដំណើរការចរចារវាងគណបក្សសង្គ្រោះជាតិ និងគណបក្សប្រជាជនកម្ពុជា បានផ្អាកមិនទាន់កំណត់ពេលជួបគ្នាជាថ្មីទៀត។ គណបក្សទាំងពីរមិនឯកភាពគ្នាលើការជ្រើសរើសសមាសភាព គ.ជ.ប ដោយអនុម័តសំឡេង ២ភាគ៣ និងសំឡេងភាគច្រើនដាច់ខាត ឬ ៥០ភាគរយបូក១ នៃសំឡេងសភាទាំងមូល។
ប្រធានក្រុមបច្ចេកទេសចរចាគណបក្សប្រជាជនកម្ពុជា លោក ព្រុំ សុខា និងជារដ្ឋលេខាធិការក្រសួងមហាផ្ទៃ មានប្រសាសន៍ថា ការគ្រោងជួបតំណាងគណបក្សសង្គ្រោះជាតិ និងលោក សុរិយា ស៊ូប៊ែឌី នេះ ជាសិទ្ធិរបស់គណបក្សនេះ។ លោក ព្រុំ សុខា បញ្ជាក់ថា ការទាមទារអនុម័តក្នុងសភាលើការជ្រើសតាំងសមាសភាព គ.ជ.ប ដោយសំឡេង ២ភាគ៣ នេះ ជាឧបសគ្គនៃការចរចាទៅវិញ៖ «គាត់លើកឡើងថា គណបក្សប្រជាជនកម្ពុជា ធ្លាប់ឯកភាពមិនត្រឹម ២ភាគ៣ ទេ គឺកូសុងស៊ីស តាមពិតគាត់ច្រឡំខ្លួនគាត់ទេ ការដែលជួបតាមទូរស័ព្ទរវាងឯកឧត្តម សម រង្ស៊ី និងសម្ដេច ហ៊ុន ហែន កាលពីថ្ងៃទី៩ នោះ គឺជជែកគ្នាព្រមព្រៀង ខ្ញុំមានទាំងឯកសារ និងខ្សែអាត់ទៀត គឺថាព្រមព្រៀងជាឯកច្ឆន្ទលើការរៀបចំបញ្ជីឈ្មោះ គ.ជ.ប បញ្ជីនេះឆ្លងតាមគណៈកម្មការអចិន្ត្រៃយ៍នៃរដ្ឋសភា ដើម្បីរដ្ឋសភាអនុម័ត ហើយសភាអនុម័តនេះ យើងអត់ដែលនិយាយថា ត្រូវតែអនុម័ត ២ភាគ៣ ទេ គឺអនុម័ត ៥០បូក១តាំងពីដើមមក»
។
មកទល់ពេលនេះ គណបក្សទាំងពីរមិនទាន់កំណត់កាលបរិច្ឆេទជួបគ្នាចរចាជាថ្មីនៅឡើយ។ លោក ព្រុំ សុខា អះអាងថា លោកចង់ឲ្យមានការដោះស្រាយបញ្ហានយោបាយនេះដោយសន្តិវិធី រវាងខ្មែរ និងខ្មែរ ក្នុងការចរចារកដំណោះស្រាយនយោបាយ តែលោកក៏គាំទ្រឲ្យមានការគាំទ្រពីសហគមន៍អន្តរជាតិដែរ។
នាយកប្រតិបត្តិនៃអង្គការឃ្លាំមើលការបោះឆ្នោត ខុមហ្វ្រែល (Comfrel) លោក គល់ បញ្ញា អោយដឹងថា ប្រសិនបើគណបក្សប្រជាជនកម្ពុជា ចង់ធ្វើកំណែទម្រង់ គ.ជ.ប ពិតប្រាកដមែន គួរតែអោយគណបក្សដទៃទៀតចូលរួមក្នុងដំណើរការកែលំអ គ.ជ.ប។ លោកថា ធ្វើដូច្នេះគណបក្សប្រជាជនកម្ពុជា នឹងអាចគេចផុតពីការស្តីបន្ទោសនៅថ្ងៃមុខ។ ប៉ុន្តែ ប្រសិនបើគណបក្សកាន់អំណាចមួយនេះនៅរឹងរូសចង់ប្រើវិធីសាស្ត្របោះឆ្នោតតាមមតិភាគច្រើនដាច់ខាត ឬ ៥០ភាគរយបូក១ ដើម្បីកែរដ្ឋធម្មនុញ្ញ និងជ្រើសតាំងសមាជិក គ.ជ.ប នោះ គ.ជ.ប ដែលរងការរិះគន់យ៉ាងធ្ងន់ធ្ងរពីមជ្ឈដ្ឋានជាតិ និងអន្តរជាតិ ថាលម្អៀងទៅគណបក្សប្រជាជនកម្ពុជា នេះ នឹងនៅតែដដែលគ្មានការផ្លាស់ប្ដូរ៕
No comments:
Post a Comment