មេធាវីអន្តរជាតិក្រោមកិច្ចសហការពីគណបក្សសង្គ្រោះជាតិ កំពុងពន្លឿនកិច្ចការរបស់ខ្លួនដើម្បីបញ្ជូនសំណុំរឿងប្រឆាំងអំពើមនុស្សឃាតទាំងអម្បាលមាណទៅតុលាការឧក្រិដ្ឋកម្មព្រហ្មទណ្ឌអន្តរជាតិ (ICC)។
ដោយ ម៉ម មុនីរតន៍
2014-01-20
លោក កឹម សុខា អនុប្រធានគណបក្សសង្គ្រោះជាតិ។
Photo: RFA
ការជំរុញខាងលើនេះ កើតមានស្របពេលដែលរដ្ឋាភិបាលកម្ពុជា ក្រោមគោលនយោបាយរបស់លោកនាយករដ្ឋមន្ត្រី ហ៊ុន សែន រងការចោទថា មានអំពើនិទ្ទណ្ឌភាព និងការរំលោភសិទ្ធិមនុស្សក្នុងដំណាក់កាលចុងក្រោយនេះដ៏ធ្ងន់ធ្ងរ ជាពិសេសការបាញ់បោះដោយសេរីប្រឆាំងពលរដ្ឋខ្លួន។
មន្ត្រីជាន់ខ្ពស់គណបក្សសង្គ្រោះជាតិ បានឲ្យដឹងថា ក្នុងរយៈពេលដ៏ខ្លីខាងមុខនេះ ក្រុមមេធាវីដែលមានជំនាញផ្នែកឧក្រិដ្ឋកម្មអន្តរជាតិ នឹងប្រមូលភស្តុតាងទាំងឡាយពាក់ព័ន្ធនឹងអំពើហិង្សានៅកម្ពុជា ដែលរដ្ឋាភិបាលរបស់លោកនាយករដ្ឋមន្ត្រី ហ៊ុន សែន បានប្រព្រឹត្តក្នុងពេលកន្លងទៅ និងថ្មីៗនេះ ដើម្បីតតាំងតាមផ្លូវច្បាប់នៅតុលាការឧក្រិដ្ឋកម្មព្រហ្មទណ្ឌអន្តរជាតិ ហៅកាត់ថា អាយ.ស៊ី.ស៊ី ក្នុងពេលខាងមុខនេះ។
លោក កឹម សុខា អនុប្រធានគណបក្សសង្គ្រោះជាតិ ឲ្យដឹងនៅថ្ងៃទី២០ មករា ថា គណបក្សសង្គ្រោះជាតិ បានចុះកិច្ចព្រមព្រៀងរួចហើយជាមួយមេធាវីអន្តរជាតិ កាលពីពេលថ្មីៗនេះ។លោកបន្តថា ការឈានដល់ចុះសន្យានេះ ក្រោយពីមានព្រឹត្តិការណ៍បាញ់បង្ក្រាបដ៏ហិង្សានៅផ្លូវវ៉េងស្រេង កាលពីដើមឆ្នាំ២០១៤ ប្រឆាំងក្រុមអ្នកតវ៉ារឿងប្រាក់ខែគោល។ លោក កឹម សុខា ឲ្យដឹងទៀតថា កិច្ចការនេះនឹងដំណើរការក្នុងពេល ២ខែទៀតយ៉ាងយូរ។
អ្នកវិភាគបញ្ហាសង្គមកត់សម្គាល់ថា កម្ដៅនយោបាយនៅពេលនេះ នឹងមិនថមថយឡើយ។មិនថយត្រង់ថា គ្រប់ដៃគូវិវាទទាំងពីរ ក្រៅពីមិនអាចសម្រុះសម្រួលដើម្បីទម្លាយភាពជាប់គាំងនេះហើយ លើសពីនេះទៀត ថែមទាំងបានប្រើប្រាស់ភាពស្របច្បាប់របស់ខ្លួនតាមប្រព័ន្ធតុលាការដើម្បីធ្វើឲ្យដៃគូម្ខាងទៀតត្រូវចុះខ្សោយហើយមិនអាចងើបតដៃបាន។
ចំណែកប្រទេសកម្ពុជា បានផ្ដល់សច្ចាប័នរួចហើយនៅទីក្រុងរ៉ូម (Rome) កាលពីខែមករា ឆ្នាំ២០០២ ថាជារដ្ឋដែលប្រឆាំងអំពើឧក្រិដ្ឋមនុស្សជាតិ និងឧក្រិដ្ឋកម្មសង្គ្រាម ជាសមាជិករបស់តុលាការព្រហ្មទណ្ឌអន្តរជាតិ អាយ.ស៊ី.ស៊ី។ ចាប់ពីពេលនោះមក ប្រទេសកម្ពុជា បានក្លាយជាសមាជិកតែមួយគត់របស់តុលាការឧក្រិដ្ឋកម្មព្រហ្មទណ្ឌអន្តរជាតិ អាយ.ស៊ី.ស៊ី នៅក្នុងតំបន់អាស៊ីនេះ។
ផែនការចម្បងរបស់តុលាការឧក្រិដ្ឋកម្មព្រហ្មទណ្ឌអន្តរជាតិនេះ គឺផ្ដោតលើកិច្ចការ ឬមានយុត្តាធិការគ្របដណ្ដប់មួយចំនួន ដូចជាប្រឆាំងការរំលោភបំពានដ៏ហិង្សាទៅលើប្រជាពលរដ្ឋ និងប្រឆាំងចំពោះការរំលោភបំពានពីភាគីម្ខាងលើបញ្ហាបូរណភាពដែនដីមកលើរដ្ឋដែលជាសមាជិករបស់ខ្លួន។ ក្រៅពីនេះ តុលាការព្រហ្មទណ្ឌអន្តរជាតិ អាយ.ស៊ី.ស៊ី នេះ ក៏ទទួលការផ្ទេរសិទ្ធិធ្វើសេចក្ដីវិនិច្ឆ័យលើសំណុំរឿងពីក្រុមប្រឹក្សាសន្តិសុខអង្គការសហប្រជាជាតិដែរ ថ្វីបើតុលាការនេះ ពុំមែនជាផ្នែកមួយនៃសមាជិករបស់ក្រុមប្រឹក្សាសន្តិសុខអង្គការសហប្រជាជាតិក៏ដោយចុះ។
បើទោះជាបែបណា កាលពីថ្ងៃទី១៨ មករា នៅខេត្តក្រចេះ លោកនាយករដ្ឋមន្ត្រី ហ៊ុន សែន បានព្រមានទៅដៃគូនយោបាយរបស់លោក គឺមេដឹកនាំគណបក្សសង្គ្រោះជាតិ ទាំងពីរថា គប្បីប្រើប្រាស់នយោបាយឲ្យល្មមៗបានហើយ។ ការថ្លែងសារនយោបាយនេះ អាចរាប់បានថា ជាការថ្លែងសារនយោបាយដ៏កម្ររបស់លោក ហ៊ុន សែន នៅតាមបណ្ដាខេត្ត ក្រោយការបោះឆ្នោតរួច។ លោក ហ៊ុន សែន បានបញ្ជាក់ថា គិតមកដល់ពេលនេះ គណបក្សប្រជាជនកម្ពុជា អត់ធ្មត់ណាស់ពេកទៅហើយ រហូតដល់ធ្វើមិនដឹងមិនឭ ដើម្បីទុកផ្លូវក្នុងការផ្សះផ្សានយោបាយ។
សម្រាប់អ្នកឃ្លាំមើលការវិវត្តន៍ស្ថានការណ៍សង្គម លោក សុខ ទូច បណ្ឌិតវិទ្យាសាស្ត្រនយោបាយ ធ្លាប់ចាត់ទុកថា អ្នកនយោបាយកម្ពុជា ពុំដែលគិតគូរពីផលប្រយោជន៍ជាតិរួមទេ។ ប៉ុន្តែផ្ទុយទៅវិញ ពួកគេច្រើនយកវេទិកាជួបជាមួយប្រជាពលរដ្ឋនិយាយរឿងនយោបាយដើម្បីអំណាច៕
No comments:
Post a Comment