ស្ដាប់ ឬ ទាញយកសំឡេង
អាកាសយានដ្ឋានអន្តរជាតិភ្នំពេញ
RFA/Uon Chhin
លោក អាត់ ធន់ ប្រធានសហភាពការងារកម្ពុជា ស្ថិតក្នុងចំណោមមេដឹកនាំផ្សេងទៀត បានឲ្យដឹងថា ការធ្វើកូដកម្មនេះ សហភាព ឬសម្ព័ន្ធសហជីពជិត ១០ស្ថាប័ន បានជូនដំណឹងទៅក្រុមហ៊ុនគ្រប់គ្រងអាកាសយានដ្ឋានអន្តរជាតិភ្នំពេញ រួចហើយ កាលពីថ្ងៃទី៦ ខែមករា។ លោកបន្តថា ការធ្វើកូដកម្មនេះ នឹងចាប់ផ្ដើមនៅព្រឹកថ្ងៃទី២៩ ខែមករា។
លោក អាត់ ធន់ បន្ថែមថា គោលបំណងនៃការធ្វើកូដកម្មនេះ គឺដើម្បីទាមទារឲ្យថៅកែក្រុមហ៊ុនគ្រប់គ្រងអាកាសយានដ្ឋានអន្តរជាតិភ្នំពេញ ទទួលយក លោក និន កុសល ដែលត្រូវក្រុមហ៊ុនបណ្ដេញពីការងារ កាលពីឆ្នាំ២០១២ ឲ្យចូលធ្វើការជាធម្មតាវិញ៖ «ទី១ ឲ្យក្រុមហ៊ុនទទួលយក លោក និន កុសល ដែលជាអគ្គលេខាធិការសហជីពនៅព្រលានយន្តហោះអន្តរជាតិភ្នំពេញ បញ្ឈប់ពីការងារហ្នឹង ឲ្យចូលធ្វើការវិញ និងបង់ប្រាក់សំណង ឬប្រាក់រំលឹកផ្សេងៗ ពេលគាត់ឈប់ពីការងារទាំងអស់ពេលចូលធ្វើការងារវិញ។ ទី២ ស្នើឲ្យនិយោជកបញ្ឈប់ការធ្វើទុក្ខបុកម្នេញ ឬតាមចាប់កំហុស ដែលខ្លួនមិនពេញចិត្ត ដោយសារតែការចូលសហជីពជាដើម និងទី៣ ស្នើឲ្យបញ្ឈប់ចំពោះការធ្វើទុក្ខបុកម្នេញ និងទទួលស្គាល់នូវលក្ខខណ្ឌការងារមួយចំនួនទៀត ដែលមាននៅក្នុងព្រលានជាដើម»។
បញ្ហានេះដែរ កាលពីថ្ងៃទី១៧ ខែមករា ក្រុមហ៊ុនគ្រប់គ្រងអាកាសយានដ្ឋានអន្តរជាតិភ្នំពេញ បានផ្ញើលិខិតឆ្លើយតបទៅមេដឹកនាំសហជីពថា ក្រុមហ៊ុនខ្លួនមិនអាចទទួលយក លោក និន កុសល ឲ្យចូលធ្វើការវិញបានទេ ព្រោះបុគ្គលនេះលែងជាបុគ្គលិកក្រុមហ៊ុនតាំងពីថ្ងៃទី២៥ ខែឧសភា ឆ្នាំ២០១២ មកម្ល៉េះ។ ជាងនេះ រាល់ការប្រមូលផ្តុំធ្វើកូដកម្មនៅមុខអាកាសយានដ្ឋានអន្តរជាតិភ្នំពេញ មានតែសាលារាជធានីភ្នំពេញទេ ទើបមានសិទ្ធិសម្រេច។
លោក ឡុង ឌីម៉ង់ មន្ត្រីនាំពាក្យសាលារាជធានីភ្នំពេញ មានប្រសាសន៍ថា នៅក្នុងកាលៈទេសៈនេះ ការប្រមូលផ្តុំណាមួយកើតឡើង លុះត្រាមានច្បាប់អនុញ្ញាតពីអាជ្ញាធរ ឬក្រសួងមហាផ្ទៃ ជាមុន។ បើមិនដូច្នេះទេ អាជ្ញាធរនឹងមានវិធានការ៖ «ខ្ញុំគិតថា បញ្ហាការហែក្បួន ឬការសម្ដែងមតិនៅលើទីធ្លាសាធារណៈនេះ គឺថា ត្រូវតែមានការសុំច្បាប់ពីអាជ្ញាធរមូលដ្ឋាន ពីអាជ្ញាធររាជធានីភ្នំពេញនេះឯង។ អ៊ីចឹង បើសិនជាការជួបជុំណាមួយ ការហែក្បួនណាមួយ ឬការសម្ដែងមតិណាមួយនៅលើទីសាធារណៈ ដែលមិនមានការអនុញ្ញាត គឺជាការខុសទៅនឹងបញ្ញត្តិរបស់យើង។ ហើយមួយទៀត ក៏វាខុសទៅនឹងសេចក្តីប្រកាសរបស់ក្រសួងមហាផ្ទៃ។ អ៊ីចឹង យើងមិនអាចឲ្យមានការជួបជុំណាមួយទេ បើមិនមានការសុំច្បាប់ពីអាជ្ញាធររាជធានីទេ»។
យ៉ាងក៏ដោយ លោក អាត់ ធន់ បានបញ្ជាក់ថា សមាជិក និងសម្ព័ន្ធសហជីពជិត ១០ស្ថាប័ន បានរក្សាជំហរធ្វើកូដកម្មពីមុខអាកាសយានដ្ឋានអន្តរជាតិភ្នំពេញ មិនផ្លាស់ប្ដូរទេ នៅព្រឹកថ្ងៃទី២៩ ខែមករា ខាងមុខ ព្រោះយល់ថា ការធ្វើកូដកម្មមិនចាំបាច់សុំច្បាប់ទេ គឺគ្រាន់តែជូនដំណឹងទៅម្ចាស់ក្រុមហ៊ុន និងចម្លងជូនអាជ្ញាធរ ឬស្ថាប័នពាក់ព័ន្ធជាការស្រេច៕
No comments:
Post a Comment