ភ្នំពេញៈក្រសួងការបរទេសនៃប្រទេសបារាំង បានចេញសេចក្តីថ្លែងការណ៍មួយ នៅថ្ងៃចន្ទនេះ ដោយសម្តែងការ សោកស្តាយចំពោះអំពើហិង្សា ដែលបានបណ្តាលឲ្យមានការបាត់បង់ជីវិតមនុស្សជាច្រើននាក់ ហើយសូមរំលឹកអំពីការប្រកាន់ខ្ជាប់របស់ខ្លួនចំពោះសេរីភាពក្នុងការធ្វើបាតុកម្មអហិង្សា។
សេចក្តីថ្លែងការណ៍របស់ក្រសួងការបរទេសបារំាង បានបន្តថា ប្រទេសបារាំងតាមដានយ៉ាងយកចិត្តទុកដាក់អំពីស្ថានការណ៍នៅប្រទេសកម្ពុជា ដោយអំពាវនាវ ជាការសំខាន់ ឲ្យមានការចរចារនយោបាយអាចចាប់ផ្តើមឡើងវិញយ៉ាងឆាប់រហ័ស ប្រកបដោយភាពស្ងប់ស្ងាត់និងការអត់ធ្មត់ ដើម្បីឲ្យភាគីទាំងឡាយអាចធ្វើការរួមគ្នាជាប្រយោជន៍ដល់ដំណើរការល្អនៃស្ថាប័ននានា។
រហូតមកដល់នេះ គណបក្សជាប់ឆ្នោតទាំងពីរ មិនទាន់ចេញសេចក្តីជូនដំណឹងណាមួយ ពាក់ព័ន្ធនឹងការចរចាគ្នា ដើម្បីដោះស្រាយនូវវិបត្តិនយោបាយនៅកម្ពុជាឡើយ បន្ទាប់ពីកាលពីថ្ងៃទី២ មករា គណបក្សសង្គ្រោះជាតិ ដែលជាគណបក្សប្រឆាំងបានសម្រេចលុបចោលកិច្ចចរចា ជាមួយនឹងគណបក្សប្រជាជនកម្ពុជា ហើយថ្កោលទោសកងកម្លាំងប្រដាប់អាវុធ ក្រោមការដឹកនាំរបស់គណបក្សប្រជាជន ដោយសារបានប្រើអំពើហិង្សាបង្ក្រាបបាតុករអហិង្សា ដែលទាមទារដំឡើងប្រាក់ខែ ហើយព្រមទាំងចាប់ខ្លួនព្រះសង្ឃ តំណាងសហជីព និងកម្មករមួយចំនួន និងមួយថ្ងៃក្រោយមក កងកម្លាំងរដ្ឋាភិបាលបានធ្វើការបង្រ្កាបដោយហិង្សា បាញ់កាំភ្លើងគ្រាប់ពិតទៅលើការតវ៉ាទាមទារដំឡើងប្រាក់ខែ របស់កម្មករនៅកន្លែងមួយទៀត ដែលបានបណ្តាលឲ្យកម្មករយ៉ាងតិចចំនួន ៤ នាក់បានស្លាប់និងរងរបួសធ្ងន់ជាង ៣០ នាក់ ហើយកងកម្លាំងរបស់រដ្ឋាភិបាលក៏បានរងរបួសជាច្រើននាក់ផងដែរ។
មេដឹកនាំទាំងពីររូបរបស់គណបក្សសង្គ្រោះជាតិ បច្ចុប្បន្នកំពុងប្រឈមនឹងដីកាកោះហៅឲ្យចូលខ្លួន ដោយសាលាដំបូងរាជធានីភ្នំពេញ ពាក់ព័ន្ធនឹងដំណើររឿងដូចគ្នាគឺ «ការញុះញង់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ខណៈពេលដែលសហគមន៍អន្តរជាតិ និងអង្គការសង្គមស៊ីវិលក្នុងស្រុកផ្សេងទៀត អំពាវនាវឲ្យគណបក្សទាំងពីរត្រលប់ចូលតុចរចាវិញ។
No comments:
Post a Comment