ដោយ៖ ស៊ុន ណារិន | ថ្ងៃចន្ទ័ ទី9 ខែកញ្ញា ឆ្នាំ2013 | VoD
រដ្ឋមន្ត្រីចំនួនបីរូប
ដែលមិនធ្លាប់មានតំណែងជាតំណាងរាស្ត្រ
ត្រូវបានដាក់ឲ្យជាប់ឆ្នោតជាតំណាងរាស្ត្ររបស់គណបក្សប្រជាជនកម្ពុជា
សម្រាប់នីតិកាលទី៥នេះ ខណៈគណបក្សកាន់អំណាច
បានដាក់បញ្ចូលតំណាងរាស្ត្រថ្មី ជំនួសតំណាងរាស្ត្រចាស់
ប្រមាណជា២៦រូបទៀត។
នេះបើតាមការប្រៀបធៀបរវាងបញ្ជី
ឈ្មោះបេក្ខជនជាប់ឆ្នោតតំណាងរាស្ត្រនីតិកាលទី៥ ចេញផ្សាយដោយគជប
នឹងបញ្ជីឈ្មោះតំណាង រាស្ត្រសម្រាប់នីតិកាលទី៤។
តាមការផ្ទៀងផ្ទាត់ឈ្មោះ បង្ហាញថា
រដ្ឋមន្ត្រីចំនួនបីរូបនោះ មានលោក អ៊ឹម សិទ្ធី
រដ្ឋមន្ត្រីក្រសួងអប់រំ លោក ម៉ុក ម៉ារ៉េត រដ្ឋមន្ត្រីក្រសួងបរិស្ថាន
និងលោក សូ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍។
រដ្ឋមន្ត្រីទាំងបីរូបនោះ
មិនធ្លាប់មានដំណែងជាតំណាងរាស្ត្រឡើយសម្រាប់នីតិកាលទី៤។
តំណាងរាស្ត្រចំនួន២៦រូប
ដែលត្រូវបានគណបក្សប្រជាជនកម្ពុជា
ដាក់បញ្ចូលថ្មីទៅក្នុងបញ្ជីតំណាងរាស្ត្រនីតិកាលទី៥នេះ
ដែលមាននៅតាមខេត្តដូចជា ខេត្តបន្ទាយមានជ័យ មានចំនួន២រូប
ដែលក្នុងនោះមានលោក កែ គឹមយ៉ានផងដែរ បាត់ដំបងចំនួន២រូប កំពង់ចាម
ចំនួន៤រូប ដែលមានទាំងលោក អ៊ឹម សិទ្ធី កំពង់ស្ពឺ ចំនួន២រូប
ដែលមានកូនប្រុសនាយករដ្ឋមន្ត្រី គឺលោក ហ៊ុន ម៉ានី កំពត ចំនួន២រូប
កណ្តាលចំនួន៣រូប ក្រចេះចំនួន១រូប ខេត្តមណ្ឌលគិរី ចំនួន១រូប
ភ្នំពេញ ចំនួន១រូប គឺលោក កែប ជុតិមា ខេត្តព្រះវិហារ ១រូប
ខេត្តព្រៃវែង១រូប ពោធិ៍សាត់១រូប រតនគិរី១រូប សៀមរាប១រូប ព្រះសីហនុ
១រូប ស្ទឹងត្រែង១រូប ស្វាយរៀង១រូប តាកែវ២រូប ដែលមានលោក ម៉ុក
ម៉ារ៉េត និងលោក សូ ឃុន និង ប៉ៃលិន១រូប។
តំណាងរាស្ត្រមណ្ឌលព្រៃវែង លោក ជាម យៀប
មានប្រសាសន៍ថា ការផ្លាស់ប្តូរបេក្ខភាពតំណាងរាស្ត្រ
ជាប់ឆ្នោតរបស់គណបក្សប្រជាជនកម្ពុជា
គឺផ្អែកលើតម្រូវការចាំបាច់របស់គណបក្ស
ហើយមន្ត្រីដែលត្រូវផ្លាស់ចេញនោះ គណបក្ស មិនបោះបង់ចោលនោះទេ
ដោយនឹងមានការៀបចំតួនាទីថ្មី។
តាមបញ្ជីឈ្មោះតំណាងរាស្ត្រជាប់ឆ្នោត
រដ្ឋមន្ត្រីចំនួន១0រូប
ដែលមានតំណែងក្នុងជួររដ្ឋាភិបាលមុនការបោះឆ្នោតអាណ្ណតិទី៥
ត្រូវបានផ្លាស់ប្តូរពីការជាប់ឆ្នោតជាតំណាងរាស្ត្រ
បើទោះរដ្ឋមន្ត្រីទាំងនោះ បានឈរឈ្មោះជាបេក្ខជនពេញសិទ្ធិក៏ដោយ។
ក្នុងខេត្តកណ្តាល
មានការផ្លាស់ប្តូរលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម
ខេត្តកំពង់ធំ មានការផ្លាស់ប្តូរ លោក ថោង ខុន រដ្ឋមន្ត្រីក្រសួងទេសចរណ៍
ខេត្តកែប មានការផ្លាស់ប្តូរ លោកចម ប្រសិទ្ធ
រដ្ឋមន្ត្រីក្រសួងពាណិជ្ជកម្ម រាជធានីភ្នំពេញ មានការផ្លាស់ប្តូរ លោក
អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនិតិសម្បទា
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
ចំណែកខេត្តក្រចេះ មានការផ្លាស់ប្តូរ
លោក អ៊ឹម ឈុនលឹម រដ្ឋមន្ត្រីក្រសួងដែនដី នគរោបនីយកម្ម និងសំណង់
ខេត្តកំពង់ស្ពឺ ដូរ លោក ឆាយ ថន
រដ្ឋមន្ត្រីក្រសួងផែនការពីតំណាងរាស្ត្រ។ ខេត្តកំពង់ចាម
មានការផ្លាស់ប្តូរ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន លោក ជា
សុផារ៉ា រដ្ឋមន្ត្រីក្រសួងអភិវឌ្ឍជនបទ លោក វង សូត
រដ្ឋមន្ត្រីក្រសួងការងារ លោក មិន ឃិន រដ្ឋមន្ត្រីក្រសួងធម្មការ និងសាសនា
ពីតំណាងរាស្ត្រ។ចំណែកខេត្តកំពង់ឆ្នាំង លោក ត្រាំ អ៊ីវតឹក
រដ្ឋមន្ត្រីក្រសួងសាធារណៈការ និងដឹកជញ្ជូន
មិនជាប់ឆ្នោតជាតំណាងរាស្ត្រទេ ខេត្តតាកែវ លោក ច័ន្ទ សារុន
រដ្ឋមន្ត្រីក្រសួងកសិកម្ម
មិនជាប់ជាក៏មិនជាប់ជាតំណាងរាស្ត្រដែរ។
មិនទាន់មានមានការកំណត់ពីគណបក្ស
ប្រជាជនកម្ពុជា ថាតើរដ្ឋមន្ត្រីទាំង១០រូប
ដែលបានផ្លាស់ប្តូរពីការជាប់ឆ្នោតជាតំណាងរាស្ត្រ
ទៅឲ្យអ្នកផ្សេងវិញ នឹងនៅតែទទួលតំណែងជារដ្ឋមន្ត្រី
សម្រាប់ក្រសួងដដែលនៅនីតិកាលទី៥នេះ ឬយ៉ាងណា។
ចំណែកតំណាងរាស្ត្រគណបក្សសង្គ្រោះជាតិ មិនមានការផ្លាស់ប្តូរនោះទេ បើតាមបញ្ជីឈ្មោះជាប់ឆ្នោតរបស់គជប។
គជប បានប្រកាសជាផ្លូវការថា
គណបក្សប្រជាជនកម្ពុជា ទទួលបាន៦៨អាសនៈ
ប្រហែលជា៤៨.៨ភាគរយនៃអ្នកចូលរួមបោះឆ្នោតសរុប៦.៦៣លាននាក់
ហើយគណបក្សសង្គ្រោះជាតិ ទទួលបាន៥៥អាសនៈ ស្មើនឹង៤៤.៥ភាគរយ គឺ២.៩២
លានសំឡេង។គណបក្សប្រជាជនកម្ពុជា បានបាត់បង់តំណាងរាស្ត្រចំនួន២២រូប
បើប្រៀបធៀបពីការបោះឆ្នោតអាណ្ណត្តិទី៤ កាលពី២០០៨
ដែលទទួលបាន៩០អាសនៈ៕
(លទ្ធផលផ្លូវការ នៃការបោះឆ្នោតជ្រើសតាំងតំណាងរាស្រ្ត នីតិកាលទី៥ ថ្ងៃទី២៨ ខែកក្កដា ឆ្នាំ២០១៣/ប្រភពពីwww.cpp.gov.kh)
សរសេរមកកាន់ លោក ស៊ុន ណារិន តាមរយៈsun_narin@vodhotnews.com
No comments:
Post a Comment