នៅក្នុងការជួបជុំមួយរវាងប្រជាពលរដ្ឋនៅខេត្តសៀមរាប
ជាមួយមេដឹកនាំគណបក្សសង្គ្រោះជាតិ នៅថ្ងៃព្រហស្បតិ៍ ទី១២ កញ្ញា
ពួកគាត់បានរិះគន់ចំពោះការដឹកនាំប្រទេស ជាពិសេសការគ្រប់គ្រង
និងការអភិវឌ្ឍនៅខេត្តសៀមរាប។
ការដឹកនាំមិនមានតម្លាភាព និងភាពអយុត្តិធម៌
គឺដើមចមដែលពួកគាត់ចាត់ទុកថា
បានធ្វើឲ្យការរស់នៅពួកគាត់មានគម្លាតខុសគ្នាឆ្ងាយរវាងអ្នកមាន
និងអ្នកក្រ។
ពលរដ្ឋម្នាក់រស់នៅក្រុងសៀមរាប លោកស្រី លីណា បានបង្ហាញទស្សនៈថា
អំពើពុករលួយបានធ្វើឲ្យពលរដ្ឋក្រីក្រពុំមានឱកាសឈានទៅរកជីវភាព
ធូរធារ ឬងើបចេញរួចពីភាពក្រីក្របានទេ
ទោះបីប្រជាពលរដ្ឋនៅទីនេះល្បីល្បាញថាបានទទួលមរកតពីដូនតាដ៏
ស្តុកស្តម្ភយ៉ាងណាក្តី។
លោកស្រីបន្តថា ភ្ញៀវទេសចរគេពិបាកនឹងជឿថា ម្ចាស់មរកតអង្គរវត្តដ៏ល្បីល្បាញបានក្លាយជាសុំទានទៅវិញ។
ប្រជាពលរដ្ឋនៅសៀមរាប ភាគច្រើនពុំមានក្តីសង្ឃឹមថា
ពួកគាត់នឹងមិនមានភាពរីកចម្រើនទៅមុខទេ
ដរាបណាពុំមានការផ្លាស់ប្ដូរមេដឹកនាំថ្មី
ដោយសារមេដឹកនាំកំពូលនៅតែព្យាយាមប្រមូលផ្តុំអំណាចក្តោបក្តាប់
ប្រទេសបន្តគ្នាតាំងពីឳម៉ែរហូតដល់កូនចៅបន្តបន្ទាប់គ្នា។
ពលរដ្ឋម្នាក់ទៀតឈ្មោះ ភើយ ភេន បានឲ្យដឹងដែរថា
អាជ្ញាធរខេត្តសៀមរាប ពីមួយអាណត្តិទៅមួយអាណត្តិនៃការបោះឆ្នោត
កាន់តែមានអំណាចគាបសង្កត់ប្រជាពលរដ្ឋ រើសអើងរវាងអ្នកមាន
និងអ្នកក្រ និងពុំមានសិទ្ធិ
ឬឱកាសស្មើគ្នាក្នុងការធ្វើអ្វីមួយនោះឡើយ។
ភាពអយុត្តិធម៌ក្នុងសង្គមពីមួយថ្ងៃទៅមួយថ្ងៃ
កាន់តែធ្វើឲ្យប្រជាពលរដ្ឋឈឺចាប់
ហើយជំរុញឲ្យពួកគាត់ចង់ផ្លាស់ប្ដូរមេដឹកនាំតាមរយៈការបោះឆ្នោត
ប៉ុន្តែពួកគាត់ហាក់មានការខកចិត្តដោយសារ គ.ជ.ប។
ពលរដ្ឋតែងតែចោទប្រកាន់ គ.ជ.ប ថាមានភាពលម្អៀងទៅបក្សកាន់អំណាច
ប៉ុន្តែ គ.ជ.ប វិញ តែងតែចោទប្រកាន់ចំពោះពាក្យចោទប្រកាន់បែបនេះ។
វិទ្យុអាស៊ីសេរី ពុំទាន់អាចទាក់ទងអាជ្ញាធរខេត្តសៀមរាប
ពន្យល់ជុំវិញទស្សនៈប្រជាពលរដ្ឋបាននៅឡើយ នៅល្ងាចថ្ងៃព្រហស្បតិ៍
ទី១២ កញ្ញា។
ទោះយ៉ាងណា អ្នកស្រុកសៀមរាប ម្នាក់ទៀត លោកស្រី សុវណ្ណ បានថ្លែងថា
អាជ្ញាធរ ឬរដ្ឋាភិបាលថ្មីគួរតែគិតគូរពីការគ្រប់គ្រងប្រទេស
ការអភិវឌ្ឍនានា ដោយយុត្តិធម៌ តម្លាភាព
និងសុំកុំឲ្យប្រជាពលរដ្ឋឈឺចាប់
ដោយសារជីវភាពពលរដ្ឋមានគម្លាតគ្នាឆ្ងាយពីមន្ត្រី
និងសែស្រឡាយមួយចំនួន។
ប្រជាពលរដ្ឋក៏បានគាំទ្រការប្រកាសធ្វើមហាបាតុកម្មរបស់គណបក្ស
សង្គ្រោះជាតិ នៅប៉ុន្មានថ្ងៃខាងនេះ
ដើម្បីទាមទារយុត្តិធម៌តម្លាភាពនៅថ្ងៃបោះឆ្នោតអាណត្តិទី៥ នេះ
និងជំរុញឲ្យបង្កើតគណៈកម្មការឯករាជ្យមួយស៊ើបអង្កេតភាពមិនប្រក្រតី
នៃលទ្ធផលឆ្នោតនេះ៕
No comments:
Post a Comment