ប្រជានេសាទខេត្តកំពង់ឆ្នាំងថាបទល្មើសនេសាទនៅបឹងទន្លេសាបកើនឡើង
ដោយ ជិន ជេដ្ឋា
2016-06-22
របាំងសាច់អួនក្រឡាញឹកដែលក្រុមឈ្មួញ និងពលរដ្ឋមានធនធានដាក់នៅក្នុងទឹកដីឃុំពោធិ៍ និងឃុំកំពង់ហាវ ស្រុកកំពង់លែង ខេត្តកំពង់ឆ្នាំង។ រូបថតថ្ងៃទី១៦ ខែតុលា ឆ្នាំ២០១៤
RFA/Chin Chetha
ប្រជានេសាទ និងអនុប្រធានសហព័ន្ធនេសាទតំបន់១៤ នៅស្រុកជលគីរី ខេត្តកំពង់ឆ្នាំង អះអាងថា បទល្មើសដាក់សម្រាស់ក្នុងបឹងទន្លេសាបដើម្បីចាប់ត្រីក្នុងរដូវបិទនេសាទ នៅបន្តកើតមានកាន់តែច្រើនឡើង តែអាជ្ញាធរ ឬមន្ត្រីជំនាញ មិនសូវអើពើទប់ស្កាត់ឡើយ។ ប៉ុន្តែអាជ្ញាធរមានសមត្ថកិច្ច ច្រានចោលការអះអាងរបស់ពលរដ្ឋ និងតំណាងសហព័ន្ធនេសាទនេះ។
អ្នកស្រុកជលគីរី ដែលភាគច្រើនជាពលរដ្ឋប្រកបមុខរបរនេសាទជាលក្ខណៈគ្រួសារ ឲ្យដឹងនៅថ្ងៃទី២១ ខែមិថុនា ថា សម្រាស់ស្អេកស្កះពេញដៃបឹងទន្លេសាបក្នុងឃុំមួយចំនួន នៃស្រុកជលគីរី បានបង្កឲ្យស្ទះលំហូរទឹក ដីដុះ ទឹកទន្លេរាក់ និងបំផ្លាញត្រីពងកូន។
បន្ទាប់ពីបទល្មើសរុញជន និងឆក់ត្រីថយចុះ ប៉ុន្តែសកម្មភាពដាក់សម្រាស់កាន់តែច្រើននៅភូមិពាមពពេច ស្វាយផ្អែម និងភូមិទន្លេក្រៅ ជាដើម។
អនុប្រធានសហព័ន្ធនេសាទតំបន់១៤ ដែលឃ្លាំមើលសកម្មភាពនេសាទនៅឃុំកោះថ្កូវ ជលសារ និងឃុំពាមឆ្កោក នៃស្រុកជលគីរី គឺលោក ឌុល ប៊ុនថា មានប្រសាសន៍ថា បទល្មើសនេសាទនៅស្រុកជលគីរី គ្មានសញ្ញាថយចុះឡើយ បើទោះបីជារដូវបិទនេសាទបានប្រកាសកាលពីថ្ងៃទី៣១ ខែឧសភា ទៅហើយក្ដី។ លោកថា អាជ្ញាធរ និងមន្ត្រីជំនាញអសកម្ម ហើយទំនងជាប្រព្រឹត្តអំពើពុករលួយផង នៅពេលចុះបង្ក្រាបបទល្មើសម្ដងម្កាល៖ «យើងមើលទៅមន្ត្រីពាក់ព័ន្ធដែលធ្វើការងារផ្នែកជលផលឆ្នាំនេះ អត់មានឃើញសោះ ឃើញតែគេហ៊ុម គេទារ (លុយ) បានតាមចិត្ដ ហើយចំពោះអ្នកតូចតាចដូចខ្ញុំអី ដាក់មងអត់បានហូបទេនៅតាមទន្លេនោះ។ មួយរយៈពេលនេះឃើញអ្នកដែលប្រព្រឹត្តបានរួចខ្លួនរហូត អត់ឃើញសមត្ថកិច្ចអីចុះធ្វើការងារផង។ ទៅមើលតាមខ្នងទួលខាងលើមាត់ទន្លេ ដូចដើមសន្ទៃធំៗត្រូវបានគេកាប់យកទៅដាក់អស់ហើយ រកតែម្លប់ចងគោអត់បានផង តាមមាត់បឹងអី»។
ឆ្លើយតបនឹងការលើកឡើងនេះ អភិបាលស្រុកជលគីរី និងជាប្រធានគណៈកម្មការចុះបង្ក្រាបបទល្មើសនេសាទថ្នាក់ស្រុក គឺលោក យ៉ិន សាវ៉េន បដិសេធថា ក្រោយពីបិទនេសាទករណីដាក់សម្រាស់ ឬបទល្មើសផ្សេងទៀតនៅក្នុងទឹកដីស្រុកជលគីរី មិនកើតមានគួរឲ្យកត់សម្គាល់នោះទេ។ ចំពោះករណីដាក់សម្រាស់ លោកបញ្ជាក់ថា មកដល់រដូវនេះ ប្រជានេសាទលែងដាក់សម្រាស់ហើយ៖ «អាហ្នឹង (ការលម្អៀងនៃការអនុវត្តច្បាប់) ជាទ្រឹស្ដីសម្រាប់ពួកគាត់ទេ ប៉ុន្តែអ្វីដែលជាទិដ្ឋភាពច្បាប់ គឺយើងធ្វើដូចៗគ្នា។ ក្នុងរដូវមិនបិទនេសាទ វាអាចមានបទល្មើសខ្លះៗ ហើយក្នុងបទល្មើសហ្នឹង យើងខិតខំប្រឹងធ្វើណាស់ ទាំងការដែលប្រជាជនដាក់សម្រាស់ក្ដី ឬបញ្ហាជន ប៉ុន្តែក្នុងពេលដែលបិទនេសាទនេះ គឺមិនមានអ្វីដែលគួរឲ្យកត់សម្គាល់ទេមកទល់ម៉ោងនេះ»។
មន្ត្រីសម្របសម្រួលសហគមន៍នៃអង្គការសម្ព័ន្ធភាពដើម្បីអភិរក្សធនធានជលផល (FACT) ខេត្តកំពង់ឆ្នាំង លោក អ៊ុក សុផាត សង្កេតឃើញថា បទល្មើសដាក់សម្រាស់នៅស្រុកជលគីរី ពិតជាកើតមានច្រើនជាងឆ្នាំកន្លងទៅ បើប្រៀបធៀបនឹងបណ្ដាស្រុកដទៃនៃខេត្តជាប់បឹងទន្លេសាបមួយនេះ៖ «និយាយរួម ទាំងរដូវបិទ និងរដូវបើកនេសាទ គឺមិនអាចដាក់សម្រាស់បានទេ។ ឆ្នាំនេះមានការកើនឡើងណាស់សកម្មភាពដាក់សម្រាស់នៅស្រុកជលគីរី»។
ច្បាប់ស្ដីពីជលផលមាត្រា២០ ចំណុចទី៣ បានហាមឃាត់ដាច់ខាតចំពោះការនេសាទដោយដាក់សម្រាស់ ឬមធ្យោបាយផ្សេងទៀតដែលធ្វើឲ្យត្រី ឬវារីសត្វកុំ។ ចំពោះទោសបញ្ញត្តិនៃអំពើល្មើសនេះ នៅក្នុងមាត្រា១០០ នៃច្បាប់ជលផលចែងថា ត្រូវផ្ដន្ទាទោសក្រោមបទល្មើសជលផលថ្នាក់ទី២ ដែលត្រូវដាក់ពន្ធនាគារពីមួយឆ្នាំទៅបីឆ្នាំ និងពិន័យជាប្រាក់ពីប្រាំលានរៀល ទៅហាសិបលានរៀល៕
No comments:
Post a Comment