ភ្ញៀវទេសចរឈរថតរូបអនុស្សាវរីយ៍នៅបរិវេណប្រាសាទតានៃដែលមានសភាពបាក់បែកទ្រុឌទ្រោម។ ផា លីណា
Fri, 3 June 2016 ppp
ហុង រស្មី
សៀមរាប: តានៃជាប្រាសាទមួយស្ថិតនៅក្នុងព្រៃចូលតាមផ្លូវលំតូច ពួនសម្ងំលាក់ខ្លួននៅភាគខាងជើងប្រាសាទតាកែវចម្ងាយប្រមាណ ៨០០ ម៉ែត្រ។
ប្រាសាទនេះត្រូវបានកសាងឡើងនៅចុងសតវត្សរ៍ទី ១២ នៅរាជ្យព្រះបាទជ័យវរ្ម័នទី ៧ សម្រាប់ឧទ្ទិសថ្វាយដល់ព្រះពុទ្ធសាសនាមហាយាន។
ប្រាសាទរាងតូចច្រឡឹងទំហំ ៥៥ គុណ ៤៧ ម៉ែត្រ ដែលមានសភាពទ្រុឌទ្រោមដោយអន្លើ នៅតែរំលេចនូវសម្រស់ទាក់ទាញក្រសែភ្នែកជាតិ និងអន្ដរជាតិ។
ដោយសារតែមានសភាពស្ងប់ស្ងាត់ មិនដូចបណ្ដាប្រាសាទជាប់ផ្លូវធំមានភ្ញៀវអ៊ូអរនោះ ទេសចរខ្លះបែរជាឆ្លៀតប្រព្រឹត្ដអំពើមិនគប្បីដែលអាចបំផ្លាញតួប្រាសាទ និងអាប់ឱនដល់វប្បធម៌ខ្មែរ។ ជនបរទេសដែលព្រហើនធ្វើផ្ដេសផ្ដាសនៅទីទេសចរណ៍ប្រវត្ដិសាស្ដ្រ បានឡើងជាន់លើតួប្រាសាទ ដំបូលប្រាសាទដោយគ្មានក្រែងញញើតការបាក់រលំ និងបាក់បែកសម្បត្ដិវប្បធម៌ប្រជាជាតិខ្មែរ។
យោងតាមសម្ដីរបស់លោកអ៊ំ ប៊ុន អាច អាយុ ៦២ ឆ្នាំ ជាសន្ដិសុខម្នាក់របស់អាជ្ញាធរអប្សរាក្នុងចំណោមសមាជិកពីរនាក់ បានឲ្យដឹងថា៖ «ខ្ញុំធ្លាប់ណែនាំដល់ភ្ញៀវជនជាតិស្បែកសប៉ុន្មានដងមកហើយជុំវិញការឡើងជាន់ដំបូលប្រាសាទដើរឆ្លងលេងចុះឡើងៗ»។
លោកបន្ដថា៖ «បើទោះបីជាទម្ងន់មនុស្សម្នាក់មិនអាចធ្វើឲ្យប្រាសាទខូចខាតយ៉ាងណាក៏ដោយ ក៏វាជាទង្វើមិនសមរម្យ និងបង្ហាញសកម្មភាពមិនគោរពដល់សម្បត្ដិម្ចាស់ស្រុក ហើយខ្ញុំក៏បារម្ភចំពោះសុវត្ថិភាពរបស់ពួកគេផងដែរ»។
ប្រាសាទតានៃមានសភាពស្ងប់ស្ងាត់ លាក់ខ្លួននៅខាងជើងប្រាសាទតាកែវ។ ផា លីណា
ការណែនាំភ្ញៀវគឃ្លើន លោកអ៊ំ ប៊ុន អាចក៏ជួបនូវការលំបាកដែរ ដោយភ្ញៀវខ្លះមិនខ្វល់ខ្វាយពីការព្រមាននេះឡើយ។
សន្ដិសុខដែលបម្រើការងារជាងមួយទសវត្សរ៍តាំងពីប្រាក់ខែ ២០ ដុល្លាររូបនេះបន្ថែមថា៖ «ភ្ញៀវរឹងរូសខ្លះ ទាល់តែមគ្គុទ្ទេសក៍មកណែនាំផ្ទាល់ទើបពួកគេស្ដាប់ បើមិនដូច្នោះទេ ពួកគេនៅតែបន្ដឡើងជាន់តួប្រាសាទដូចក្មេង»។
បើទោះបីជាប្រាសាទតានៃ មានសន្ដិសុខមើលការខុសត្រូវយ៉ាងណាក៏ដោយ ក៏ក្រុមឆ្លៀតឱកាសនៅតែអាចគេចពីភ្នែកពីច្រមុះឆ្មាំទាំងនោះបានដែរ។ មិនតែប៉ុណ្ណោះ ភ្ញៀវបរទេសមួយចំនួនតូចបានយកទីតាំងប្រាង្គប្រាសាទដ៏ស្ងប់ស្ងាត់នេះជាកន្លែងថតរូបអាក្រាតលេងសើច រួចបង្ហោះពេញបណ្ដាញសង្គមថែមទៀតផង។
បកស្រាយចំពោះការលេចធ្លាយរូបភាពអាក្រាតរបស់ភ្ញៀវទេសចរបរទេសនៅប្រាសាទតានៃនាពេលកន្លងមក លោកអ៊ំដែលផ្ដើមបំពេញការងារពីម៉ោង ៧ ព្រឹកដល់ម៉ោង ៥ ល្ងាច ប្រាប់ឲ្យដឹងថា៖ «រូបភាពនារីអាក្រាតទយគូទក្បែរដើមឈើជាមួយដៃគូពាក់មុខស្វានេះ ត្រូវបានថតនៅច្រកចូលខាងមុខនៃទិសខាងលិចប្រាសាទក្នុងឆ្នាំ ២០១៣»។
លោកបានប្រាប់ថា រូបនោះទំនងជាថតនៅចន្លោះម៉ោង ៥ ទៅ ៦ ល្ងាច ខណៈក្រុមសន្ដិសុខផ្លាស់ប្ដូរវេនជាមួយប៉ូលិសយាមកាមពេលយប់។
យ៉ាងណាមិញ លោកបានអះអាងថា គ្មានជនជាតិខ្មែរណាម្នាក់ប្រព្រឹត្ដអំពើមិនគប្បីចំពោះប្រាង្គប្រាសាទ និងទង្វើអសីលធម៌លើវប្បធម៌ជាតិដ៏ ផូរផង់របស់ខ្លួនឡើយ៕
1 comment:
that's what happen when '' you invite'' western culture in... they don't even respect their parents what do you think that they would do to others'?
Post a Comment