ដោយ ជិន ជេដ្ឋា
2016-05-12
ពលរដ្ឋដាក់ពាក្យប្រឡងនៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកំពង់ឆ្នាំង ដើម្បីទៅធ្វើការនៅប្រទេសកូរ៉េ នៅថ្ងៃទី១២ ខែឧសភា ឆ្នាំ២០១៦។ RFA/Chin Chetha
RFA/Chin Chetha
រយៈពេលបួនថ្ងៃនៃការចែកពាក្យប្រឡងសមត្ថភាពភាសាកូរ៉េ នៅខេត្តកំពង់ឆ្នាំង ដើម្បីមានឱកាសទៅធ្វើការងារនៅសាធារណរដ្ឋកូរ៉េ មានមនុស្សដាក់ពាក្យជិត ១ម៉ឺននាក់ (៨.៥០០នាក់)។ មន្ត្រីកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ យល់ថា រដ្ឋាភិបាលគួរបង្កើតការងារនៅក្នុងស្រុកឲ្យបានច្រើន ជាជាងមើលឱកាសការងារនៅក្រៅប្រទេស។
អង្គភាពអភិវឌ្ឍន៍ធនធានមនុស្សនៃក្រសួងមុខរបរ និងការងារ នៃសាធារណរដ្ឋកូរ៉េ សហការជាមួយគណៈកម្មាធិការបណ្ដុះបណ្ដាល និងបញ្ជូនពលករទៅបរទេស នៃក្រសួងការងារកម្ពុជា ប្រកាសថា ពលករពលការិនីខ្មែរដែលត្រូវប្រឡងជាប់នៅក្នុងវគ្គទី១៣ ឆ្នាំ២០១៦ នេះ មានជិត ១ម៉ឺននាក់ ក្នុងនោះ វិស័យឧស្សាហកម្ម ៤.៧០០នាក់ សំណង់ ១ពាន់នាក់ និងវិស័យកសិកម្ម ៣.៧០០នាក់។
ប្រធានមណ្ឌលចែកពាក្យប្រឡងប្រចាំខេត្តកំពង់ឆ្នាំង លោក សិរី វិបុល ថ្លែងក្នុងលក្ខខណ្ឌសុំមិនបញ្ចេញសំឡេងថា ចាប់ពីថ្ងៃទី៩ ដល់ថ្ងៃទី១២ ខែឧសភា គឺមានពលករពលការិនីចំនួន ៨.៥០០នាក់ ដែលអ្នកដាក់ពាក្យភាគច្រើនមកពីខេត្តបាត់ដំបង ពោធិ៍សាត់ និងខេត្តកំពង់ឆ្នាំង។ កំពង់ឆ្នាំង គឺជាមណ្ឌលចែកពាក្យប្រឡងមួយក្នុងចំណោមបីទីតាំងផ្សេងទៀត គឺនៅភ្នំពេញ តាកែវ និងកំពង់ចាម។
ជាងផ្សារដែកម្នាក់មកពីស្រុកកំពង់លែង ខេត្តកំពង់ឆ្នាំង លោក អៀន គង់ មានប្រសាសន៍ថា លោកសុខចិត្តបោះបង់ការងារផ្សារដែកចោល ហើយទៅធ្វើការងារនៅកូរ៉េ ដែលលំបាកជាងនេះក៏សុខចិត្ត ព្រោះផ្សារដែកទទួលបានប្រាក់ឈ្នួល ១០០ដុល្លារ មិនអាចទ្រទ្រង់ជីវភាពគ្រួសារបាន។ បើមានសំណាងប្រឡងជាប់ និងចេញទៅធ្វើការបានប្រាក់ខែច្រើន លោកស៊ូឃ្លាតប្រពន្ធកូនមួយរយៈសិន៖ «នៅនេះមានប្រាក់ខែតែ ១០០ដុល្លារ មើលទៅអត់គ្រប់ចាយខ្លួនឯងផង។ ឃើញគេដាក់ពាក្យ ចង់រៀន និងដាក់ពាក្យក្រែងលោបានទៅ ព្រោះនៅនេះលំបាករកការងារធ្វើដែរ។ អ៊ីចឹងប្រថុយៗក្រែងលោបានទៅ»។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា សង្កេតឃើញថា ការបញ្ជូនពលករតាមរយៈរដ្ឋទៅរដ្ឋនេះ មានភាពប្រសើរជាងការបញ្ជូនតាមរយៈភាគីទី៣ ឬក្រុមហ៊ុនបញ្ជូនពលករ ដែលកើតមានបញ្ហាច្រើន។ ប៉ុន្តែប្រព័ន្ធបញ្ជូនពលករនេះ ក៏មានបញ្ហាយឺតយ៉ាវបញ្ជូនបេក្ខជនបេក្ខនារីដែលប្រឡងជាប់ ចេញទៅធ្វើការដែរ ដែលបញ្ហានេះអាចជាប់ពាក់ព័ន្ធនឹងរឿងពុករលួយ៖ «មានការពិតកម្រិតណា ខ្ញុំមិនហ៊ានអះអាងទេ ប៉ុន្តែនេះជាការលើកឡើងរបស់ពលករ។ គាត់ត្អូញត្អែរថា អ្នកដែលប្រឡងជាប់មុន គួរតែត្រូវបានទៅមុន អ្នកដែលប្រឡងជាប់ក្រោយ តែជាក់ស្ដែងអ្នកដែលប្រឡងជាប់ក្រោយ បានទៅមុនអ្នកដែលប្រឡងជាប់មុន។ ប្រជាពលរដ្ឋជាប់ពីរលានដែលធ្វើការនៅក្រៅប្រទេស ភាគច្រើនជាកម្មករមិនសូវមានជំនាញទេ ពិសេសអត់សូវចេះភាសា។ ដល់អ៊ីចឹង គាត់ងាយនឹងរងគ្រោះដោយសារការជួញដូរ ឬកេងប្រវ័ញ្ចកម្លាំងពលរដ្ឋ។ល។»។
យ៉ាងណា ប្រធានមណ្ឌលចែកពាក្យប្រឡងសមត្ថភាពភាសាកូរ៉េ ប្រចាំខេត្តកំពង់ឆ្នាំង លោក សិរី វិបុល បដិសេធថា ឱកាសការងារនៅសាធារណរដ្ឋកូរ៉េ យឺតយ៉ាវ មិនជាប់ពាក់ព័ន្ធនឹងរឿងពុករលួយនោះទេ ព្រោះក្រសួង បានបញ្ជូនឈ្មោះអ្នកប្រឡងជាប់ទាំងអស់ទៅភាគីកូរ៉េ ប៉ុន្តែការចេញទៅធ្វើការមុន ឬក្រោយគ្នានោះ គឺអាស្រ័យទៅលើការជ្រើសរើសរបស់ថៅកែនៅសាធារណរដ្ឋកូរ៉េ ផ្ទាល់៕
No comments:
Post a Comment